НЕГА МАКТАБ ДИРЕКТОРЛАРИ ЎҚИТУВЧИЛАРГА 20 СОАТДАН ОРТИҚ ДАРС БЕРМАЯПТИ?
#Савол
Мактабда она тили ва адабиёт фанидан 27 соат дарсим бор эди. Куни кеча директоримиз: «Энди ҳеч кимга 20 соатдан ортиқ дарс берилмайди, ХТБдан шундай кўрсатма олдик» деб мени ҳам дарсимни қисқартириб янги бир ўқитувчини ишга олди. Ахир 20 соат дарс олсак ойлик маошимиз озайиб кетадику. Директоримизнинг бу хатти-ҳаракати қонунийми?
#Жавоб
Ўзбекистон Республикаси Вазирлар Маҳкамасининг 2005 йил 21 декабрдаги 275-сонли қарори билан тасдиқланган Халқ таълими ходимлари меҳнатига ҳақ тўлаш тўғрисида низомнинг 18-бандига кўра алоҳида ҳолларда халқ таълими муассасаларида ходимнинг розилиги билан касблар (лавозимлар)ни бирга қўшиб олиб боришга, шунингдек ўзининг асосий иши билан биргаликда ишда вақтинча бўлмаган ходимларнинг вазифаларини бажаришга йўл қўйилади.
Бунда лавозимларни бирга қўшиб олиб бориш бўйича иш вақтининг жами давом этиши йиллик жами 1548 соат иш вақтининг 50 фоизидан, яъни йил мобайнида 774 соатдан ортиқ бўлиши мумкин эмас. (яъни бир ўқитувчига 30 соатгача дарс бериш мумкин)
Шунингдек, Вазирлар Маҳкамасининг 2012 йил 18 октябрдаги 297-сонли қарори билан тасдиқланган “Ўриндошлик асосида ҳамда бир неча касбда ва лавозимда ишлаш тартиби тўғрисида Низом” иловасининг 6-бандига мувофиқ умумтаълим мактаблари ўқитувчиларининг айнан шу муассасада белгиланган меҳнат нормасидан ортиқ бўлган, лекин ушбу иш тури бўйича иш вақти нормал давомийлигининг 50 фоизидан кўп бўлмаган иши ўриндошлик асосида ишлаш ҳисобланмайди ҳамда улар меҳнатига тасдиқланган тарификация асосида ҳақ тўланади.
Ундай бўлса нега мактаб директори 20 соатдан ортиқ дарс бермаслиги мумкин?
Шуни эсдан чиқармаслик лозимки, мактаб директори мансабдор шахс сифатида мактабдаги бўш иш ўринларини (вакант лавозимларни) маҳаллий мехнат органига (меҳнат биржага) тақдим этиб бориши лозим.
Масалан, она тили ва адабиёт фанидан жами 57 соат мавжуд дейлик ва дарс соатлари:
1-ўқитувчига: 28 соат
2-ўқитувчига: 29 соат миқдорда тақсимланган бўлса бундай ҳолатда 1-ўқитувчининг 8 соати, 2-ўқитувчининг 9 соати ортиқча дарс соати ҳисобланиб, жами 17 соатни мактаб директори ҳудудий меҳнат ва бандлик бўлимига бўш иш ўрни сифатида тақдим этиши, шу 17 соат учун бошқа фуқаро иш сўраб келса, унга иш бериши керак. (албатта қонунчиликда белгиланган тартибда)
Мактаб ходимларини қўшимча дарс соати билан таъминлаш мақсадида бўш иш ўринларини яшириб турса бўлмайдими?
Бундай вазиятда мактаб директори «Аҳолини иш билан таъминлаш тўғрисида»ги Қонунни бузган ҳисобланади ва маъмурий жавобгарликка тортилади.
Ушбу қонунга мувофиқ иш берувчи бўш иш жойлари (вакант лавозимлар) бор-йўқлиги тўғрисидаги маълумотларни, олдиндан (камида икки ой олдин) маҳаллий меҳнат органига мўлжалланаётган ишдан озод қилишлар тўғрисидаги ахборотларни, бўшаб қоладиган ҳар бир ходимни кўрсатган ҳолда тақдим этишга мажбурдир.
Мактаб директори ахборотни ўз вақтида тақдим этмаса ва бўш иш жойларини (вакант лавозимларни) яширса Маъмурий жавобгарлик тўғрисидаги кодекснинг 229-моддаси талабларини бузган ҳисобланади.
Яъни МЖ кодекснинг 229 моддасига кўра:
Бўш иш ўринларини яшириш, бўш иш ўринлари ёки ҳар бир ходим бўшатиб олиниши кутилаётганлиги тўғрисидаги ахборотни ўз вақтида тақдим этмаслик, иш билан таъминлашга кўмаклашиш давлат жамғармасига ажратмаларни тўлашдан бўйин товлаш мансабдор шахсларга энг кам иш ҳақининг ўн бараваридан йигирма беш бараваригача миқдорда жарима солишга сабаб бўлади.
Худди шундай ҳуқуқбузарликлар маъмурий жазо чораси қўлланилганидан кейин бир йил давомида такроран содир этилган бўлса мансабдор шахсларга энг кам иш ҳақининг йигирма беш бараваридан эллик бараваригача миқдорда жарима солишга сабаб бўлади.
Шуни эслатиб ўтамизки, агар мактаб директори ортиқча дарс соатларини бўш иш ўрни сифатида меҳнат ва бандлик бўлимига тақдим этсада, лекин ҳеч ким иш сўраб келмаса, сиз 30 соатгача дарс ўтишингиз мумкин.
👉
@chiyal94maktab👈