Dublyaj sanʼati

😂 Sanjar Saʼdullayev – Shohruhxondan tortib Junsang va Po‘lat Alandar kabi minglab obrazlarni o‘zbek tilida gapirtirgan dublyajimiz afsonasi!

Oʻzbek dublyaj sanʼatida o‘zidan o‘chmas iz qoldirib ketgan afsonaviy dublyaj ustasi Sanjar Saʼdullayevning ovozi avvaliga ekranlardagi filmlar orqali ko‘plab xonadonlarga, keyin esa ushbu xonadon sohiblarining qalblarga kirib borgan desak mubolag‘a bo‘lmaydi. Sanjar aka faoliyati mobaynida “Qashqirlar makoni” (Po‘lat Alandar), “Qish sonatasi” (Junsang), “Ichkarida” (Komissar Yusuf, Sarp, Hasan qizil yanoq), “Sevgi iztirobi” (Kamol), “So‘yla, Qoradengiz” (Vedad) kabi mingdan ortiq seriallar va badiiy filmlardagi bosh qahramonlarga ovoz bergan. Ayniqsa, tomoshabinlar uning ovozi bilan gapirgan bollivud qiroli Shohruhxon ijro etgan obrazlarni o‘zgacha iliq mehr bilan sevib tomosha qilishgan, tinglashgan va qalblariga muhrlashgan. Shubhasiz! Uning kabi darajaga, martabaga va ehtiromga sazovor bo‘lish har bir inson uchun katta sharafdir.

Sanjar Sa’dullayev 1954-yilning 10-iyul sanasida Toshkent shahrida tug‘ilgan. Toshkent Davlat teatr va sa’nat institutining drama va kino aktyorligi bo‘limida tahsil olgan. Ijodkor o‘zbek dublyaj san’atining eng taniqli va eng reytingi baland aktyorlaridan hisoblanardi. Uni muxlislar sirli aktyor deya ko‘p-ko‘p ta’riflashgan. Sababi u san’at sohasi vakillaridan farqli o‘laroq, o‘zini ommadan uzoq tutishga harakat qilardi, kameralar qarshisiga chiqmasdi, intervyular bermasdi, hattoki o‘z shaxsiy surati ijtimoiy tarmoqlarda aylanishini istamas edi. Ha, hozirgi kunda mashhur bo‘lish uchun nomini bulg‘ab bo‘lsa ham “qora piar” qilishdan uyalmaydiganlar talaygina. Biroq, shunday ulkan iste’dod sohibi, xalq mehrini qozona olgan ijodkor bunday qilishni istamagan. Bunga sabab sifatida ijodkorning omma ichida bemalol, erkin va oddiy shaxs bo‘lib yurishni afzal ko‘rganini keltirishimiz mumkin. Balki, shunisi ham tog‘ri bo‘lgandir.

2021-yilning 4-dekabr sanasida xalqning mana shunday sevimli ijodkori Sanjar Saʼdullayev 67 yoshida oramizni tark etdi. Bunga ham birpasda ikki yarim yil bo‘pti. Biroq, aminmanki u o‘lmaydi. Uning qoldirgan nodir ijod namunalari, u ovoz bergan va sevimli bo‘lib ulgurgan filmlar hali uzoq yillar davomida saqlanib qolinadi, tomosha qilinadi, eslanadi. Ha, u boqiy yashaydi…

Ikrom Ro‘zimurodov

👍 T.me/dublyajsanati 🎙