الحصل أمبارح وبإختصار شديد/
منقول
كنا في شارع النيل ومترسين الشارع كلو ومترسين بي جهة جامعة الخرطوم هندسة، جاتنا تاتشرات دعم سرييع ياها تاتشراتهم وناسهم وأشكالهم البنشوفها كل يوم في الإعتصام وجا معاهم دفارين ولودر شالو الترس الأول بتاع شارع النيل مع كلية هندسة ودخلو علي الثوار في الترس البعديه وبدو يفكو فينا ذخيرة حية وقنابل صوتية لحدي ما حصلونا كبري الحديد وهناك ارتكزت تاتشراتهم ونحنا قاعدين هناك والناس بتقع قدامنا بالرصاص واصابات مباشرة في الراس وكمية بتاعت ذخيرة إتفكت فينا ما عادية ونحنا ما شايفين حاجه لمن وصلنا الكبري بس رصاص ودوشكا وثنائي بيتفكا ما معروف بيمشي وين والناس الجمبك بتقع في الأرض والمكان الجمبي بقى دم كلو وفي ٣ تاتشرات جيش كانت مرتكزة قريب لينا لكن ما اتحركو ولا فكو طلقة واحدة، الضرب كان شغال قريب الساعه وحاجة وشفنا مدرعات تابعة للدعم السريع جات داخلة انا جريت بالشارع التاني عشان امشي بي وراهم الترس التاني لحقته الترس ولقيت فيهو شباب كتار ارتكزنا قريب للمدرعات والرصاص لسه شغال جات شرطة عسكرية سايقة وراها تاتشرات دعم دخلو لناس الترس وفكو فيهم رصاص والناس مرات بتجري علي التاتشرات ودايرا تطلع فيها عدييل من كتر الغضب والهلوسة العشناها وبعديها بي نص ساعه القوات حقت الدعم السريع بدت تنسحب شويه شويه ووراهم جيش بيرجع فيهم والناس ماشه وراهم وبتهتف رغم الرصاص لحدي ما وصلناهم نهاية شارع النيل وسحبو مدرعاتهم ونحنا رجعنا التروس واقوى كمان وبقينا في المصابين الكتار.
نحنا ماعارفين الحصل شنو ولا المجلس العسكري قال شنو لكن الضربونا ديل دعم سريع وشفناهم ياهم الشفع البنلاقيهم في الميدان كل يوم، مافي كتائب ظل ولا مندسين بيكون عندهم أسلحة زي دي ولا مدرعات كتيرة زي، ما كان في إي تضارب بيناتهم ولا اشتباك كانو منظمين ومتناسقين وعارفين نفسهم بيعملو في شنو.
ياجماعة أفراد الجيش المعانا جوه الاعتصام في جزأ منهم مجردين من سلاحههم وكانو بيبكو معانا بي دموعهم لانهم ماقادرين يحمونا /البحير انو ليه ديل مامسلحين وديلك مسلحين وبساعدو في الدعم السريع على القتل ؟
أكتر ليلة مأساوية مرت على في حياتي بعد ليلة وفاة والدي ربنا يرحمو ليلة أمس دم في كل إتجاه في الارض في ملابسنا في جسمنا / والاصعب من كده إحساس العجز الكنت فيهو بالجد ماف أصعب من إنك تشوف حد بيضيع قدامك وانت ماقادر تنقذ روحو .
وما أصعب من إنك تشوف دم إخوانك سائلة في الارض وانت دمك جارية في عروقك جوه.
////الغريبة المجلس العسكري بقول ديل مندسين !!
واقسم لكم بما شفتو قدام عيني لا في مندسين ولا جن احمر الحكاية الحكيتها دي ده الشئ الحصل وقدام عيونا وأي زول كان في القيادة أمس عارف الكان بضربنا زخيرة منو ؟
#الاستباح دمنا وروحنا في شهر رمضان منو ؟
الناس الاستشهدت افضل مننا والله انا اقتنعت بي كده صيام وحر وهجير بالنهار وشهادة بعد اتمام صيام
