Shoir-tarjimon Shuxrat tavallud topgan kun
Atoqli adib va shoir Shuxrat (Gulom Alimov) asosan nasr va nazmda ijod etib, elga tanilgan bo‘lsa-da, badiiy tarjima sohasida ham ibrat bo‘larlik ko‘pgina ishlar qildi, zamonlar osha eskirmaydigan go‘zal tarjimalari bilan kitobxon qalbidan joy oldi. Shuxrat 1918 yilning 19 aprelida tavallud topib, foniy olamda 76 yil umr kechirdi. Sinovlarga, xayot mashaqqatlariga to‘la yillarni boshdan o‘tkazdi. Balki ana shu sitamli kechmishlar sababmi, adib tinimsiz ijod qildi, nasrda, she'riyatda, dramaturgiyada, publitsistika va badiiy tarjimada o‘ziga xos namunalar qoldirdi. Albatta, savol tug‘iladi - nega sitamli kechmishlar sabab deya. Gap shundaki, badiiy ijod dard xosilasi, iztirob, ruxiy qiynoqlar natijasi. Shuxratning xayotida ana shunday yurak o‘rtanishlariga, dard bilan yonib kuylashiga bois bo‘lgan alamli kunlar ko‘p kechdi. Ikkinchi jahon urushi jangohlarida qo‘liga qurol tutib kurashdi, yaralanib, urush asoratlarini ham dilida, ham tanasida tuydi. Daxshatli muxorabaning zaxmi ketmay, otasi Aminjon akani tuproqqa qo‘ydi. Keyin... keyin sotqinlik, xiyonat va turli fitnalarning qurboniga aylanib, aybsiz aybdor bo‘lib, sovuq o‘lkalarda bir necha yillarni o‘tkazdi. Darxaqiqat, adib yig‘lagan ko‘pu kulganlar oz bo‘lgan zamonda yashadi. Baxoli qudrat ijod qildi. "Shinelli yillar", "Oltin zanglamas", "Jannat qidirganlar" romanlarini yaratdi. "Oqibatli kishilar", "Bir kecha fojiasi" nomli qissalar, "Besh kunlik kuyov", "Qo‘sha qaringlar', "Ona qizim" pyesalarini yozdi. Ijodiy tarjimai xolni she'r bilan boshlab, she'r bilan poyoniga yetkazdi. 1935 yilda ilk she'rlari matbuotda e'lon qilingandan boshlab hisob qilinsa, xayot sanalarining biror kun-xaftasi yuqqi, she'rga somelik bo‘lmasa. Shu tariqa shoirning "Xayot nafasi", "Qardoshlar", "Sening sevging", "Ishqingda yonib", "Kechki nurlar", "Lirika", "Yoshligimning davomi", "Qalbim jilosi", "Shaydo ko‘ngil", "Hali tun uzoq" kabi o‘nlab lirik to‘plamlari dunyo yuzini ko‘rdi. Aytish o‘rinliki, adib xayotining barcha murakkab, taxlikali yillari yuqorida zikr etilgan qator asarlarning dunyoga kelishiga doyalik qildi. Shu alfozda dardu armonlar gox-goxida yuz ko‘rsatadigan kuvonch-shodliklar bilan qo‘shilib, XX asr o‘zbek adabiyotining yana bir atoqli namoyandasini namoyon etdi.