САХОВАТ ВА КЎМАК: 228 миллиард 608 миллион сўмдан зиёд хайрия маблағи йиғилди
«Маҳалла» хайрия жамоат фондидан маълум қилинишича, «Саховат ва кўмак» жамғармаси ҳисобрақамига давлат ва нодавлат ташкилотлари, ҳомийлар, кўп сонли кўнгиллилар ва жисмоний шахслар томонидан шу кунга қадар жами 228 миллиард 608 миллион сўмдан зиёд хайрия маблағлари келиб тушган.
Маблағларни сарфлаш бўйича жойлардаги ҳар бир сектор раҳбари, маҳалла фуқаролар йиғинлари масъул ходимлари билан биргаликда ҳар бир оила, фуқароларнинг моддий аҳволи ўрганилиб, ҳафталик ёрдам кўрсатиладиган эҳтиёжманд оилалар рўйхати, уларга берилиши керак бўлган маблағлар ҳажми шакллантирилди.
Халқ депутатлари Кенгашларининг қарорлари асосида карантин даврида ижтимоий ҳимояга муҳтож, кўп болали, ёлғиз ва ногирон, вақтинча ишсиз бўлган 365 минг 976 оилага 161 миллиард 660 миллион сўм хайрия маблағи сарф этилди.
Хусусан, 259 минг 53 оилага 51 миллиард 743 миллион сўмлик кундалик истеъмол товарлари ва озиқ-овқат маҳсулотлари тўплами берилган бўлса, 4 минг 88 оила 8 миллиард 435 миллион сўмдан зиёд дори-дармон, ҳимоя ниқоблари ва антисептик воситалари билан таъминланди.
Бундан ташқари, эҳтиёжманд оилаларга бошқа турдаги маҳсулотлар ва нақд пул кўринишидаги маблағлар берилди.
Шунингдек, Сирдарё вилояти Сардоба туманида сув тошқинидан жабр кўрган оилаларга «Саховат ва кўмак» жамғармаси ҳисобидан жами 4 миллиард 300 миллион сўмлик озиқ-овқат маҳсулотлари, ҳимоя ниқоблари, ва антисептик воситалари ва бошқа зарурий маҳсулотлар етказиб берилди.
Жорий йилнинг 13-23 июль кунлари 28 минг 285 оила учун 20 миллиард 738 миллион сўм хайрия маблағлари йўналтирилди.
Кундалик истеъмол товарлари, озиқ-овқат маҳсулотлари, дори-дармон, ҳимоя ниқоблари ва антисептик воситалари, бундан ташқари кундалик истеъмол товарлари, яъни ёғ, ун, шакар каби маҳсулотлар ҳомийлик ва хайрия марказларига топширилди. 1 миллиард 475 миллион сўмдан зиёд нақд пул кўринишидаги маблағлар оилаларга етказилди.