حسين أسمع مني بس احجاية
لو رحت ياهو اليضل وياية
جني أشوف اكبالي ..... تنذبح يالغالي
ومنهة أصبح بالضعن مشاية
..........
غالطت بعيوني نظرات المصاب
شكد تمنيت الحقيقة جن سراب
واني فوك التل وتاني بالجواب
خوية كوم انفض عباتي من التراب

عله التل الزينبي وانطر خبر ...
وجني أشوف المذبح اكبالي صور ...
ايحز نحر دلالي ..... وتنذبح يالغالي
شعجب كلبي ما عرضلي بهاية
ومنهة أصبح بالضعن مشاية
..........

خوية كلشي بروحتك يصبح ضلام
وراح اقرة الفاتحة عن السلام
انتة بس تروح يعني اشكف سهام
حجاية مني اسمعها مضمون الكلام

اليروح بنية اهلة ترشلة ماااي...
الماي شح راح آني اشمرلك كفاي...
وانتة تدري اشحالي .... وتنذبح يالغالي
جفن عيني اخذة هوة وماية
ومنهة أصبح بالضعن مشاية
...............
نظرة منك تسوة أيام العمر
كلب اليودعك فلا يحمل صبر
امعاتب اوية الريح لتطلع الفجر
مو تجيني الشمس وتجيب الشمر

من يجي الذبّاح لا يصعد عليك ....
لا يثنّي ركبتك ويحز اديك ......
وياك ياخذ بالي ...... وتنذبح يالغالي
وشيبتك ياضنوتي امدماية
ومنهة أصبح بالضعن مشاية
.........

حلمي وياك انتهة بأرض الطفوف
وروحي ماتت من متت واني أشوف
راسك اعلة العسكر بدمة يطوف
وين ذيج الهيبة ليش بكلبي خوف

علة الرمح السمهري رأسك علة .....
هم الك رجعة الطفوف اتزلزلة .....
الحالي ماضل والي ...... وتنذبح يالغالي
وآنة اعرفنك كفوو الاحجاية.....
ومنهة أصبح بالضعن مشاية ....
...........
يجر بية كلبي يم المشرعة
يم كفيلي يكلي أمشي انودعة
عيوني ماتقبل أشاهد مصرعة
رآيتة بصفة وجفوفة امكطعة

شعجب مايشعر كفيلي بحالتي ....
مو وعدني لا متنزل دمعتي ....
اتبعثرت آمالي ..... وتنذبح يالغالي
خوة حيلي وطاح يم الراية ...
ومنهة أصبح بالضعن مشاية ....

........

الشاعر عباس الگرغولي

@ALkarakoly