قصيدة للمشاية

يحسين اجينالك مشي والرايات بيدينه
والله ماننساك ابد يل انت ماناسينه
******************
يوم اربعينك سيدي نگصد الك مشايه
نهتف اباسمك ياشهم وباسم راعي الرايه
للموت نبقه الكم تبع شيعه ونظل وفايه
ابلياك مايسوى العمر نقسم وحگ هادينه
والله ماننساك ابد يل انت ماناسينه
******************
يحسين اجينالك مشي عالجدم يامولانه
وامك يبن سيد الرسل هيه اللي تتلگانه
وعودك علي حامي الحمه طول الدرب ويانه
وتسمعه نبضات الگلب لمن يجي يحيينه
والله ماننساك ابد يل انت ماناسينه
******************
ندري اليزورك سيدي باجر يحصل الغانمه
من اهوال ساعات الحشر امك تخلصه فاطمه
وهذا الحجي اقسم علي بالمعتلي رب السمه
حسين انت مصباح الهدى كل الدهر يهدينه
والله ماننساك ابد يل انت ماناسينه
******************
درب عدل يبن العدل بس المحب يندله
وكلمن يعوفك يالولي بيمانه صارت خله
حسين انت قران المله وانت الحمد والبسمله
لولاك دين الله انمحى يبن الوصي والينه
والله ماننساك ابد يل انت ماناسينه
******************
هذا المشي ماينمنع غصبن على كل ناصبي
بي رحمة الله الواسعه مخصوصه لاولاد التبي
الراحن حرمهم عالهزل والوادم الهن تصطبي
والماشي يتلگه الضعن ودمعه يهل من عينه
والله ماننساك ابد يل انت ماناسينه
******************
نواسي بمشينه المنتظر ابن الحسن مهدينه
اليحضر ويانه بكل وكت ولكربله يماشينه
ويبجي على الصاير وذر والگطّعوا جفينه
وحنه نگله يالوعد عجل بجيتك لينه
والله ماننساك ابد يل انت ماناسينه
******************
عجل بجيتك يالولي وسل عالكفر بتارك
والسبوا عماتك غصب اخذ انت منهم ثارك
وهتف يثارات السبي ويا ثار حرگت دارك
ادب اعداك بصارمك النكروا نبينه ودينه
والله ماننساك ابد يل انت ماناسينه
******************
خادم اهل البيت / ابومحمد العاشور(07810010732)