* * *

Дилгир оқшомларда дилимни суяб,
Гавжум кўчаларда кезарман танҳо.
Телбадай ўзимдан ўзимни сўраб,
Ҳеч нарса топмаган оқилман, аммо.

Ҳаёт гувлаб ўтар гулдурак отиб,
Ғолиб мағлубман-у, мағлуб ғолибман.
Бу эски дўконга ўзимни сотиб,
Қайтимига азоб сотиб олибман.

Заъфарон кундузлар тўкилиб борар,
Қоғозга тўкилар тундай кўзларим.
Умрим кўйлаклари йиртилиб борар,
Қўрғонин топширар Кузга ёзларим.

Қулфли юрагимни қандай очайин,
Қандай босай ичда зилзилаларни.
Билмаслик истарман, билганим сайин,
Бу кўҳна... бу янги... мангу асарни.


© Эшқобил Шукур

2000

https://t.me/Eshqobil_Shukur_ijodi