ما حنيتو _ أولا مريتو
ذوبني الهجر شمعه أبضلام الموت
أحن الكم حنين النوك _ غريبه وعذباني الشوك
أنه زينب _ أنه زينب _ أنه زينب
..................................
أخت عباس أنه بس الوكت غادر
كريب الموت إلي أبعد وكت باجر
بعيد حسين أخوي أبكربله أمسافر
أخر شوفه شفته شابكه الحافر

من أجروحه _ أتبدت روحه
وتطشر ضوه بين الترب والخيل
عفته أبلا هدم مسحوك
غريبه وعذباني الشوك
أنه زينب _ أنه زينب _ أنه زينب
.................................
أحن المن أحن والذكره تاذيني
صورهم بالذبح مافاركت عيني
شهكة جم طفل للطف توديني
لسه أبأذني أسمعهه وتبجيني

لسه أطفالي _ تتراوالي
أجرهم بيدي من بين السحك والنار
بين الضايع ومسحوك
غريبه وعذباني الشوك
أنه زينب _ أنه زينب _ أنه زينب
.....................................
أنه العشت الألم لوعه أبأثر لوعه
أنه الشفت الكمر جفينه مكطوعه
صوره أبعيني من حسين مطبوعه
الخيول العشره غارت كسرة ضلوعه

هظمت حالي _ مات أكبالي
أوبدت رحلة سبي فوك الهزل للشام
أطلع سوك أطب أبسوك
غريبه وعذباني الشوك
أنه زينب _ أنه زينب _ أنه زينب
................................
رجعني الوكت للشام متعوبه
أبعبايه أمن الهضم محروكه متروبه
كأني للسبي أيام مطلوبه
مكتوبه المنيه أبغربه مكتوبه

تربي أعيوني _ لا تنسوني
أنه بحاجة متن يسندلي التابوت
بعيده والنفس مبيوك
غريبه وعذباني الشوك
أنه زينب _ أنه زينب _ أنه زينب
..............................
الأخت وكت المنيه أبحاجة أخوتهه
عزيزه وما تطيح أبغربه دمعتهه
وحشه أبلا أهل تنزت جنازتهه
وحيده الليله بتكم وي منيتهه

أبكسرة خاطر _ روحي أتهاجر
أحن وكربله أبعيده عن أرض الشام
أبونين الفاكد المخنوك
غريبه وعذباني الشوك
أنه زينب _ أنه زينب أنه زينب
...............................
وداعآ يا حياتي أخواني ماجوني
بألف ياوسفه راحت تغمض أعيوني
وداعآ للسياط الشلت أمتوني
أموت وغربه للمدفن يشيعوني

ما شيعوني _ أولا حضروني
أخواني والأجل خيم علي ياحيف
عكب ذاك السبي والنوك
غريبه وعذباني الشوك
أنه زينب _ أنه زينب _ أنه زينب
...............................

حسين باهض الحلفي