بنت بتحكي ماما كانت عاملة بسلة ورز على الغدا .. وبابا رجع من الشغل تعبان .. قعدنا على الأكل وبدأنا ناكل ..كلت معلقتين رز وحطيت معلقة بسلة على الرز وبدوق لقيت #البسلة_حادقة جدا جدا متتاكلش .. ومن الظاهر إن ماما وقع منها غصب عنها أو سهو ملح زيادة .. لسه هتكلم لقيت بابا بيقولها الأكل طعمه جميل أوي النهاردة

أمي إستغربت جدا لإنها حست بملوحة الأكل هي كمان .. وأمي مش متعودة تدوق الأكل وهي بتطبخ لانها شبه حافظة المعايير

قالتله يعني الأكل مش حادق .. قالها لا جميل وبعدين أوقات بحب الأكل حادق شوية .. تسلم ايدك يا ست الكل .. خلص أكل وقام وقالها كوباية شاي من إيديكي الحلوين بقى

قمت وغسلت إيدي ورحتله وهو قاعد بيقرأ الجرنال مستني الشاي .. ومن عادتي إني كنت بهزر معاه دايما فقلتله : بقى بذمتك يا راجل الأكل طعمه حلو .. ده حادق كانه معمول من بحر اسكندرية

قال لي وهو بيبتسم : يا بنت يعني أمك عمرها ما عملتلنا أكل حلو ولا عمرها بسطتنا .. وتعبانة وراجعة هي كمان من شغلها وواقفة على رجليها بتعمل اكل وشرب متستحقش كلمة حلوة حتى .. متلاقيش إيد تسندها وقت ما تقع .. هننسى كل الحلو اللي عملته في حياتها ونعلق المشنقة عشان غلطة مش مقصودة ..
يا بنتي أمك بتتعب عشانا ومش قصاد ده متلاقيش كلمة ترد روحها .. هنستفيد إيه اننا نضايقها أو نهز ثقتها في نفسها .. تراهنيني ان الأكل المرة الجاية هيبقى أطعم من أي مرة ..
الكلمة الحلوة والحنية يا بنتي مبتبقاش في اوقات الفرح بس حتى في الشدة الكلمة الحلوة ليها تأثير السحر .. جبرت بخاطر أمك لأني حلفت ما أكسر نفسها لأن نيتها طيبة ونقية ..وهي كمان بتجبر بخاطري وبتستحملني .. يبقى مردش الجميل ولو بكلمة .. وبعدين ربنا يا بنتي رده ليا في ولادي و بيجبروا بخاطري هما كمان أهو يا عسل

بتقولي يومها قمت معيطة وابويا علمني درس يعني إيه وجعلنا بينكم مودة ورحمة .. قمة الرحمة والمودة طبقها أبويا الله يرحمه .. عمره ما كسر بنفسها ولا قالها كلمة تضايقها .. كان دايما حنين ..لأنه كان مدرك قد إيه هي بتتعب عشان جوزها وولادها .

#جبر_الخواطر_على_الله والكلمة الحلوة بتصنع المعجزات وبتفتح كل الابواب المقفولة وتقصر علينا كل الطرق الطويلة وتهون الوجع ..
علاج رباني لا بفلوس ولا بيتباع في صيدليات .. والروشتة سهلة كاتبها الرحيم جل شأنه ..
ربنا يجعلنا جابرين خواطر الناس ويوقف لنا ولاد الحلال اللي يجبروا بخاطرنا
#قولوا_آمين 😊