Саккизинчи март

Бугун байрам, бугун яйра, кул, Она,
Бугун тўлсин қучоғингга гул, Она.
Аммо битта қизинг бўлса беҳаё,
Байрам дема, юзларингни юл, Она!

Кўчаларда қизинг юрса дарбадар,
Наҳслар билан тоғма-тоғу, жарма-жар.
Эрга тегмай, уйингда туғса агар,
Байрам дема, юзларингни юл, Она!

Ҳар эркак қўйнига ўзин отса у,
Кўринганга танасини сотса у.
Ёт элларнинг зиндонида ётса у,
Байрам дема, юзларингни юл, Она!

Битта қизинг ичса вино ё ароқ,
Битта қизинг чекса наша ё тарёк,
Чилим чекса – сенинг бошингга таёқ,
Байрам дема, юзларингни юл, Она!

Қизинг шайтон либосини буюрса,
Жинлар расмин киндигига урдирса.
Саҳналарда кўкси очиқ югурса,
Байрам дема, юзларингни юл, Она!

Битта қўймай, қошин териб ташласа,
Битта қўймай, сочин териб ташласа.
Эркакман деб даво қила бошласа,
Байрам дема, юзларингни юл, Она!

Эркак билан майдонларда олишса,
Эркак билан баб-баравар солишса.
Солишганда эркак ундан қолишса,
Байрам дема, юзларингни юл, Она!

Умри ўтса ел каби, шамол билан,
Боши тўлса бемаъни хаёл билан.
Турмуш қурса эркакмас, аёл билан,
Байрам дема, юзларингни юл, Она!

Токи қизинг иймонини унутса,
Раҳмон қолиб, шайтоннинг қўлин тутса.
Келажагин уммон ортидан кутса,
Байрам дема, юзларингни юл, Она

(с) Каримберди Турамурод