الشاعر حسن لعيبي الحريشاوي

يلرايح لبو السجاد زور واطلب مرادك
وكله انا بشهر شعبان مستبشر بميلادك
عليك بزينب وعباس ياسيدي وبولادك
تكضيها كل حاجه العندي

الشاعر حسن لعيبي الحريشاوي

زهيري

أيام خير وفرح هلن عليه وجن
ماكو حزن للكلب لادمع تارس وجن
وابليس مهموم ظل عقله تايه وجن
ابليس وي العده حنظل شرابه وسام
غابر حقدهم قبل ميصير حام وسام
ابشعبان رب السمه للنبي حط وسام
بمولد انوار اربعه فرحانه انسن وجن

الشاعر حسن لعيبي الحريشاوي

لولادة الامام المهدي عجل الله فرجه الشريف

ياغيم يحجب شمس ياضوه الماغايب
ياعشك ماينوصف بيك اليحب ذايب
كلنه تحت امرك مولاي ننتظرك
بيك اليحب ذايب
***********************
يابسمه يارحمه يانعمه يهواك الكلب
مبتشره سامره مزدهره يانور الدرب
القربك الربك وبحبك ذايب كل محب
تردد طيور السمه لحن الهوه العالي
واتناغي اهل الارض بيها انولد غالي
يملي الارض عطرك مولاي ننتظرك
بيك اليحب ذايب
***************************
فرحانه دنيانه ويانه والكون ابتشر
معهوده موعوده بوجوده ساعات الفجر
هادينه والينه غالينه هذا المنتظر
يهدي جميع البشر ويحارب العايل
مايظل باجر ظلم لاحكم للجاهل
رب السمه ينصرك مولاي ننتظرك
بيك اليحب ذايب
**************************
ياصابر ياذاكر يااخر سادات البشر
تمحيها تنهيها تطويها رايات الكفر
بالكلمه والهمّه والرحمه حتما تتصر
تهدم اصول الكفر مايبقه ابد ظالم
تملي الارض بالعدل ياسيدي القائم
ماواحد اياخرك مولاي ننتظرك
بيك اليحب ذايب

********************************
ياجنه مانعنه حارمنه من عدها الزمن
تانينه نادينه ظلينه بهموم وحزن
ياشاري للباري واّداري تتحمل محن
ياريت تتقبّلّه كلمن اجه نادم
عندك امير وملك متاكد الخادم
نتغذه من فكرك مولاي ننتظرك
بيك اليحب ذايب

*********************************
انظرها واحظرها غيرّها ايام الهظم
من الغادر والماكر والناكر اصحاب الظلم
ياحجه كل مهجه تترجه منهم تنتقم
ماعدنه دونك وطن حتى الوطن غربه
موسهله عندك تظل حال المحب صعبه
مانحتمل هجرك مولاي ننتظرك
بيك اليحب ذايب


الشاعر حسن لعيبي الحريشاوي

لوفاة عم النبي ووالد امير المؤمين ابوطالب بن عبد المطلب رضوان الله عليه


صغّروا شانك يبو الشان الجبير
والسبب معروف والمقصد خطير
يابوطالب مبتلي انته جي والد علي
صّغّروا شانك يبو الشان الجبير



**********


شككوا بايمانك وكالوا بعد
جامل المختار ما اسلم ابد
جاهلي اصلك ولا لك معتقد
والهدف معروف من هذا القصد
قرروا زله على حيدر تنحسب
مشرك التاريخ ابو طالب كتب
انكتب عنك جاهلي انته جي والد علي
صّغّروا شانك يبو الشان الجبير



*************



من كفل طه وحمل لاجله الصعب
ونال من الهجرة لوعات وتعب
كسب ذم العالم ولوم العرب
عاف داره وعاش بديار الغرب
شلون كافر قيّموك بيا قياس
وانته للتوحيد دكيت الاساس
احقادهم ماتنجلي انته جي والد علي
صغّروا شانك يبو الشان الجبير


***********


دّور التاريخ واستقصي الخبر
الجده اسماعيل وينه من الكفر
سيرته واخباره مابيهن اثر
لاعبد اصنام لانار وحجر
المالكه زله على حماّي الحمه
كالوا انته كافر ابرب السمه
بنار باجر تنصلي انته جي والد علي
صغّروا شانك يبو الشان الجبير



**********



بالروايات الضعيفه ابلاسند
كالوا بيوم القيامه اهل الحقد
ابراسك النيران تاكل للابد
والقسيم هناك حيدر والمدد
رادوا الشبهات كلها تنحجب
عن ابوسفيان ولاجله حرب
للصنم كالوا ولي انته جي والد علي
صغّروا شانك يبو الشان الجبير



*******



يلطلعت انته عكس كلمن يكول
لا الك توحيد بالدين واصول
والمواقف الك تشهد بالقبول
يلكضه نحبك على صدر الرسول
شلون يافخر الهواشم يابدر
شلون تتساوة مثل حرب وصخر
ارفضوا شانك يعتلي انته جي والد علي
صّغّروا شانك يبو الشان الجبير


الشاعر حسن لعيبي الحريشاوي

بمناسبه المبعث النبوي الشريف


جيت يا نور الرساله برحمه للوادم اجيت
ظلمه وافعال الرديه من زمن غابر محيت
من اجلنه يبو الزهرة أوضاع مره تحمليت
يلشفت ماشافه واحد شكثر بالدنيا ابتليت
يلشفت ظلم وخيانه وناس ماترحم لكيت
ياذنب سويته الهم وها كثر منهم جنيت
حجريرمونك وتنطي ثمر يا شجرة اعتليت
ما شفت راحه بحياتك جم درب موحش مشيت
خذوا من وقتك الغالي وخير الهم قدميت
ليش كلهم سعوا ضدك بخير للضدك دعيت
الدنيا متروسه بظلاله فرغتها أو وشليت
قدمت راحتك ألهم عفت ديره وعفت بيت
عفت دنيا ومال عفته ودين ربك دوريت
ردت خير الناس كلها يوم لأجله توجهيت
لاردت سلطة وحكومه ولاردت بالدنيا صيت
جيت تهدي الناس كلها هذا سعيك من سعيت
غيريت الدنيا هاذي وناس ماتندل هديت
روحي إلك فدوه وحياتي يلي للباري وفيت


الشاعر حسن لعيبي الحريشاوي

يلبعيد اصبحت عني موتي لوتدري قريب
چا نسيتك لوزماني وادم اتشبهك يجيب
اظن مو محبوب عندك وانته عندي اغله حبيب
ترضه مالي قيمه بعدك باقي علهامش غريب
شلون ترضه يابوصالح ارجع وظني يخيب
عليك اقسم ترضه عني بصاحب الشيب الخضيب
البرمح مرفوع راسه وجسمه علغبره سليب
وبعظم حسرات زينب الظلت ابحركه ونحيب
وبالكفيل الغاب عنها الماتظن عنها يغيب
ترضه اعيش ابلايه معنى ومالي من عطفك نصيب
وانا المتاني طلعتك من المهد حد المشيب
بلارضاك اجروحي حد الموت ماالهن طبيب

الشاعر حسن لعيبي الحريشاوي

اليوم ياشيعة صدك لطم الصدر
الكاظم المسموم نعشه على الجسر
***************************
اليوم ياشيعه صدك وكت اللطم
علامام الشاف ويلات وظلم
ياحسافه بهلشكل عمره انختم
مات مسموم بفعل اهل الغدر

**************************
عمره خلص صبر وهموم ومرار
ابسجن اظلم مايمر بيه النهار
لااهل يمه ولاظل عنده جار
تعده صبر ايوب موسى بالصبر

****************************
السلاسل حزّن الجف والعظم
بياذنب هارون منه ينتقم
بياشريعه استدل ويوجه تهم
احقاد يمكن هاي من سابع ظهر

**************************
دنيا غربه وسجن مامر بيه ضوه
ومن دموع الغربه اسف خده انجوه
بعد شمل الاهل مايرجع سوه
الامر رب الكون صابر ينتظر

***************************
بياسبب هذا التجني والقمع
شغيّر بدين النبي وشحط بدع
برعب ظل هارون مايدري شسمع
من سجود الكاظم يعيش ابخطر

الشاعر حسن لعيبي الحريشاوي

لاستشهاد الامام الكاظم عليه السلام وزن الميمر


لزيارتك هذا اليوم جيتك امامي الكاظم

*************************
يانور لله ابن الحجج ياحجه
للدين قدّمت العمر والمهجه
تقبلني رايد سيدي واترجه

يلكاظي نحبك مسموم مارحم بيك الظالم
******************************
هذا الحقد معلوم واضح امره
من يوم كال الوحي الجدك اقره
اول حقد كسروا اظلوع الزهره

واضح حقدهم معلوم جي عابد انته وعالم
***************************
انته الامام الصالح انته الزاهد
ولله ذاكر ياتقي وياعابد
بقعر السجن صابر ولله ساجد

مايهم حيلك مهدوم بس كون دينك سالم
*********************************
شمامرن الصعبات ثابت انته
بماحملك ربك حفظته وصنته
لجله العذاب وماجره اتحملته

ماهمّك الراد ايلوم ابعزمك يزيد اللايم
*******************************
نفس المسيره المشه عليها اجدادك
سّطّرت اروع ملحمه بامجادك
بقعر السجن هارون تضعف رادك

خاسر الظنك مهزوم لويوم تضعف واهم
********************************
نال الخزي الظالم شينفع قصره
مذموم تاريخه وحياته وعصره
سجنك مجد صار وقيودك ثوره

خلدّك فعلك للدوم للابد ذكرك دايم

الشاعر حسن لعيبي الحريشاوي