.
ابلا محمل اصعد يا گمر نوگ الهزيله
ومن كثر السياط انحفر متن العقيله
ردتك كافلي
وصحت ادللي
.....
ليل خلص وانته ماكو انته تدري شلون مَر
النار بخيامي وعباتي وانه عيني اعله النهر
گضه الليل اجمع يتامه وآآه حين الفجر طر
صَعدة الناگه بغيابك اشد من ذاك السهر
عباس وجروح السبي فدوه الجروحك
وشنفع روحي وفاركِت ياخويه روحك
روح انته إلي
.....
طر فجر ليلة مصابك واعتلت شمس الحزن
وانه يا عباس حيلي محترگ جدم ومتن
النسمه تحنيني بغيابك ظهري چن ظهر الغصن
وصورتك واگفه ابعيني ودمع روّاهه الجفن
بجدمي اشعر احرورة جمر يحرگني ادري
بس انه ياخويه بقت عيني اعله خدري
آآهك تعتلي
...
طفن خيماتك وبعده بگلبي جمرك ما طفه
وراسك يدورني احسهه عالرماح وما غفه
الذابحك ،، سوطه ذبحني وگلبه بعده ما شفه
يشتِم حسين واسمعه الحز وريده من الگفه
ومتشفي اجه بضحكه شِمِر چتّف اديه
يحاچيهم اخذوهه سبي هالخارجيه
يا غيرة علي
....
چنت بوجوه الضمايه اتشوف دمعة فاطمه
ومن يهز الرايه چفك جربه يرسم بالسمه
وهسه يا عباس ضعنك يشكي فگدك مو ضمه
كربله خويه بوداعك گاعهه ارماد ودمه
مجبوره امشي وفرگتك يا خويه كلفه
وللسبي اصعدهه ابلا غطه والناگه عجفه
هم ما ينجلي
.....
شلون اصيحك وانه صوتي ضاع من كثر الالم
وعطر چفك تيهيته وطاغي دخان الخيم
راح اعوفك يا كفيلي يابو گلب الما سِلم
ما اگلك صد اليه ادري بعيونك سهم
اشكيلك الليل المضه لكل لحظه ابچي
شكرا للعيون البقت بدموعي تحچي
ظل دمعي ايهلي
....
سعد هادي الشمري
@saadhadi83
