شهادة الامام موسى الكاظم ع


صوت اسمعه من السجن..موسى ابن جعفر يون
وَحده يلاقي مصيره.. ويلفض انفاسه الاخيره

................................
چني اسمع صوت ونه جوه قضبان السجن
ونه شاغت روحي منها وطحنت بگلبي طحن
موسى ابن جعفر اظنه ايامه خلصن وانگضن
صوت شومن سجنه اسمع حيل مليان ابحزن

چنه يتشاهد اسمعه .. يلتوي والسم يگطعه
گربت منه المنيه .. يريد بس واحد يطلعه

عليه من ضاع الهوه.. موسى عالگاع التوه
وجرحت وجهه الحصيره.. ويلفض انفاسه الاخيره
................................
يصارع الموت ويسمه والنفس منه انگطع
تمردت احشاء چبده وچبده من حلگه طلع
يلوج ابن الزهره لنه ماگدر يحمل وجع
يصيح من يلحگ عليه وصوته ما واحد سمع

يصيح من يلحگ عليه.. واني ابن سيد البريه
السم مرد ياناس چبدي.. وطاح چبدي ابين اديه

عالارض موسى انرمه.. وطاح وي چبده دمه
سالت ادمايه غزيره.. ويلفض انفاسه الاخيره
................................
مات موسى وسلم امره وبالسجن عمره انگضه
مات مشتاگ العياله وشوفت اوليده الرضه
ماحضن معصومه بنته ولا من القاسم حضه
احرمه شوفت بنينه سجنه والنوب القضه

ماحضه بشوفت بنينه.. بالسجن خلص سنينه
بلمت اولاده واختهم .. مات ماكحلها عينه

ماعرف الهم رسم.. مات منهم منحرم
شتاگ لبنيته الزغيره.. ويلفض انفاسه الاخيره
................................
موسى ابن جعفر يوادم هذا ضنوت فاطمه
هذا ابن قلاع خيبر حيدره حامي الحمه
اربع احماميل جثته تشيلها وتگطر دمه
وعالجسر ياناس جسمه بذله ياحيف انرمه

ميت وگيد السلاسل.. من الجدام الراسه واصل
بثاره ياهو اللي يداعي .. عنه ياهو اللي يقاتل

ماحضر واحد اله.. من اخوته ولا هله
ولا عمام ولا عشيره.. ويلفض انفاسه الاخيره
................................
مات وگيود الحديد مربطه بجسمه بقت
من مكان اگيوده دمه سال والكاع ارتوت
وما فزع واحد يشيله جنازته من انرمت
لاعمام ولا عشيره اتشيل ابن جعفر اجت

عالجسر مرميه جثته.. تكسر الخاطر وحدته
يامصيبه ويامصيبه.. وياهضيمتها غربته

شكثر هالمنظر صعب.. بقه مرمي عله الدرب
مافزع واحد يجيره .. ويلفض انفاسه الاخيره
................................
نفس جده حسين موسى ثنينهم ماتوا غدر
ثنينهم ضلت جثثهم بحر شمس ذاك الظهر
بس فرق موسى ابن جعفر چانت اثيابه ستر
بس الحسين بذبحته هدومه سلبوها الكفر

موسى ابن جعفر حبيبه..بكربله هدومه سليبه
وعلى ارمال الغاضريه.. جثته بدمها خضيبه

جده أموذر وگع .. وعالرمح راسه انرفع
ضلوعه مرضوضه وكسيره.. ويلفض انفاسه الاخيره



الشاعر عقيل الحسناوي..