#ҳадис #тариҳимуҳаммадия
Nabaviy odob-ahloq
Ummu Salama rodiyallohu anhodan rivoyat qilinadi:
"Rosululloh sollallohu alayhi vasallam qiroat qilganlarida oyatlarni ajratib-ajratib o‘qirdilar".
(Abu Dovud va Ahmad rivoyatlari)
Abdulloh ibn Abu Hamsa rodiyallohu anhu aytadilar:
"Nabiy sollallohu alayhi vasallam bilan u zot Payg‘ambar etib yuborilishlaridan oldin bir savdo ishi kildim. Menda u zotning bir oz haqlari qoldi. Meni uni turgan joylariga keltirib berishni va’da qildim. Ammo unutib qo‘ydim. Uch kundan keyin yodimga keldi.
Kelsam, u zot joylarida turibdilar. Meni ko‘rib: "Ey yigit, meni mashaqqatga qo‘yding-ku, uch kundan buyon shu yerda intizor bo‘lib turibman" dedilar".
(Abu Dovud rivoyati)
Huzayfa rodiyallohu anhudan rivoyat qilinadi:
"Rosululloh sollallohu alayhi vasallam boshlariga biron yumush tushsa, namoz o‘qishga chog‘lanardilar".
(Abu Dovud va Ahmad rivoyatlari)
Abu Bakr rodiyallohu anhudan rivoyat qilinadi:
"Rosululloh sollallohu alayhi vasallam o‘zlarini xursand qilgan biror ish sodir bo‘lsa, Allohga shukrona o‘laroq sajda qilar edilar".
(Abu Dovud va Ibn Moja rivoyatlari)
Anas rodiyallohu anhudan rivoyat qilinadi:
"Rosululloh sollallohu alayhi vasallam biror kishidan xafa bo‘lsalar: "Peshonasi tuproqqa belangur (ya’ni sajda qilgur), unga nima bo‘lyapti?" der edilar".
(Bayhaqiy rivoyati)
Oisha rodiyallohu anhodan rivoyat qilinadi:
"Rosululloh sollallohu alayhi vasallam tahorat olishda, soch tarashda va kavush kiyishda, qo‘yingki, barcha ishlarda o‘ng tomondan boshlar edilar".
(Buxoriy va Muslim rivoyatlari)
Abdulloh ibn Busr rodiyallohu anhudan rivoyat qilinadi: "Rosululloh sollallohu alayhi vasallam bir qavm eshigi oldiga kelsalar, eshikka yuzlanib turmasdilar, balki o‘ng yoki chap tomonlari bilan turib "Assalamu alaykum, Assalamu alaykum" der edilar".
(Abu Dovud rivoyati)
@ansoriyya1
