ليلة الأنصار عليهم السلام
الصاحب الزين .. بس انته يحسين
ماشفنه مثلك سيدي بهل عاطفه
اصحابك احنه وعلمتنه اعله الوفه
.................
منين نبدي وانته بالدنيه البدايه
العمر بس وياك حسينه بكفايه
انريد بين ايدك نفوت اعله المنايه
واسمك اعله اشفافنه ايضل للنهايه
بكل گلب مكتوب ... انته اغله محبوب
وهنياله كلمن موته يمك لو لفه
اصحابك احنه وعلمتنه اعله الوفه
................
بالجروح انريد نلتذ من كثرهه
جروح طفك تختلف لو هب عطرهه
الجثه لو طاحت اجفوفك تنتضرهه
انصارك وارواحنه ابئيدك امرهه
وقررنه كل راي .. بيدك يمولاي
انته الحكيم اعلينه راعي المعرفه
اصحابك احنه وعلمتنه اعله الوفه
.................
الدنيه هاي العيشه بيهه مره وحده
وألك يامحله العمر كون ايتبده
السيف من هاي المناحر مانرده
واليموت شلون يخسر ونته عنده
يامحله السيوف .. من عينك تشوف
كدامك انطيح ودمانه نازفه
اصحابك احنه وعلمتنه اعله الوفه
..................
تملكت وجدانه يابن محمد
وشوكنه يحسين الك مالحضه يبرد
العمر ذاك الفات كل بيبانه تنسد
اليوم بين ايدك جديد العمر ورد
تفداك السنين .. لو طحنه ميتين
نمشي وعليك اگلوبنه اتضل خايفه
اصحابك احنه وعلمتنه اعله الوفه
...................
ابد ماشفنه وله انشوف بحنانك
ياحسين بكل گلب اصبح مكانك
اغله من هذا الهوه انته بكل زمانك
لايذين احنه برحمتك وبأمانك
بيك الصبر حار .. ياسر الاسرار
خالد تضل طول الزمن وسمك شفه
اصحابك احنه وعلمتنه اعله الوفه
....................
وين يحصل هل فخر والشرف لينه
نموت وحسين السبط راضي علينه
اليوم بدمانه توقعلك ادينه
نفدي هاي ارواحنه يحسين اجينه
ماتبقه محتار .. ذوله احنه انصار
تعايشنه وياك وفلا نحمل جفه
اصحابك احنه وعلمتنه اعله الوفه
محمد هادي العقابي
#الناشر_مهدي_البوغبیش
🔻قنواتنا المتواضعة ونتشرف بانضمامكم الینا
💠⚜قناة القصائد الملحنه⚜💠
🔰⚜عشاق الحسین⚜🔰
👇👇👇👇👇
🆔
https://t.me/joinchat/AAAAAD9wBech3XfcE5G4KA
💠⚜کروب عشاق الحسین للتلحین القصاید⚜💠
👇👇👇👇
🆔
https://t.me/joinchat/ATZm8RUUWrk-KHq7rcmdHA
