بلغوا عني ولو آية 💙✨

لما تحس إنك مرهق و مستنزف نفسياً او جسديا ً أدعي الدعاء دا :

"اللهم أخرجني من حولي إلى حولك، ومن عزمي إلى عزمك، ومن ضعفي إلى قوّتك، ومن انكساري إلى عزّتك، ومن ضيق اختياري إلى براح إرادتك
لا إله إلا أنت سبحانك انى كنت من الظالمين"⁦ 💙

حتىٰ كِمَامتك اللي إنتَ بتلبسها دي عبادة عظيمة عند ربنا، وبتاخد أجر عليها.

- د حازم شومان.

عارف يعنى ايه. "كل يوم هو في شأن"
يعنى فـ لحظة يفرج همك وكربك,وفـ لحظة تانية يجبر كسرك,يعنى تبقى مُش عارف تعمل ايه من كتر التفكير ومش عارف تحسبها ازاى,وفجاة تلاقى كُل حاجة اترتبت واتحلت ,يعنى بتقى زعلان وهتموت من الوجع والزعل ع حاجة كان نفسك فيها,وتلاقى ربنا وهّبك حاجة كنت بتحلم بيها,يعنى واحد يمشى من حياتك ييجى واحد يتمنئ رضاك,يعنى من الاخر كدة ربنا مُش هيشوف قلبك متعلق بحاجة ويخذله فيها,ولاّن هو رب القلب,فطبيعى ينجيك ويعديك من كل ضيق,صبراً كل حاجة هتبقى تمام والله.
صلاه الفجر

#قصص_الأنبياء
#الحلقة_الحادية_عشرة
#نوح_عليه_السلام_الجزء_الأول
#الدعوة_إلى_توحيد_الله

وقفنا المرة إللي فاتت عند موت إدريس عليه السلام وإنه كان بيدعو الناس لعبادة ربنا ويذكرهم دايما بالله وإنه أول من جاهد في سبيل الله،
بعد موت إدريس عليه السلام كل البشر كانوا على التوحيد، يعني كانوا عارفين إن ربنا هو الإله الخالق الرازق ملوش أي شريك وإن مفيش إله يعبدوه غيره وإن في جنة وفي نار👌

كان عندهم معاصي منتشرة بينهم وظهر الفساد وابتعدوا عن الشرع ...لكن مكنش في شرك بالله في الأرض نهائي،

في وسط المعاصي والفساد ده كان في بعض الصالحين،
وكان الناس بيحبوهم بس مش بيقلدوهم،
يعني زي بعض الناس إللي في زمانا دلوقتي يقولولك إحنا بنحب الدين والمشايخ والعلماء بس من بعيد من غير يعملوا زي ما بيقولوا لهم، من غير ما يطبقوا كلامهم يعني😅

المهم الصالحين دول كانوا بيأمروا الناس بالمعروف وينهوهم عن المنكر وكان ليهم أماكن معينة بيدعوا الناس فيها ،
زي تقريبا كده مجالس العلم عندنا،

فلما مات الصالحون الشيطان وسوس للناس إنهم يعملوا في الأماكن دي زي نُصُب تذكاري =خلينا نقول تماثيل =
ويسموا التماثيل بأسماء الصالحين دول،
قال يعني عشان كل ما يعدّوا من أمام التماثيل دي يفتكروا
الصالحين وأيامهم فيتشجعوا للعبادة كأنهم موجودين معاهم،

وفعلا صنعوا التماثيل دي....ومفيش واحد من الجيل ده عَبد التماثيل دي خالص... كلهم كانوا عارفين قصة هؤلاء الصالحين،
لما مات الجيل إللي كان عايش مع الصالحين وعارفين قصتهم؛ الشيطان وسوس للجيل إللي بعدهم إن آباؤهم كانوا بيعبدوا التماثيل دي وكان المطر بينزل بسبب عبادتهم للتماثيل، فعبدوا التماثيل دي فعلا😶
وهنا نلاحظ إن الشيطان نفسه طويييييل أوي👌
هو مكنش مستعجل أهم حاجة يحقق هدفه،
زرع بذرة في جيل وحصد الثمرة في الجيل إللي بعده،
عشان كده ربنا قالنا :
"لَا تَتَّبِعُوا خُطُوَاتِ الشَّيْطَانِ ۚ وَمَن يَتَّبِعْ خُطُوَاتِ الشَّيْطَانِ فَإِنَّهُ يَأْمُرُ بِالْفَحْشَاءِ وَالْمُنكَرِ"

لو اتبعنا خطوات الشيطان إللي هي ساعات ممكن تكون حاجات مُباحة أصلا هيوصل بينا الحال إننا نقع في الغلط😞
يعني مثلا بنت تتساهل في الاختلاط مع الرجال،
وشوية شوية تبدأ تكلمهم خاص،
وشوية شوية تبدأ تتلكك عشان تبعتله أي سؤال، وشوية شوية تبدأ تشتكيله أحزانها وتستشيره في حياتها...... لحد ما نوصل لآخر مشهد إللي كلكم أكيد حافظينه خلاص من كتر ما هو متكرر في واقعنا للأسف،
ساعتها هي بتستعيد شريط القصة من أوله بتلاقي إن أول خطوة كانت السبب الأول في النتيجة دي،
ولو كانت من البداية عاملة حدود ومنتبهة لموضع خطواتها خطوة خطوة ورا الشيطان، مكنش التساهل المتدرج ده حصل👌
والشيطان ما جالهاش في أول خطوة دي قال لها مباشرة "صاحبي فلان".. لا ده أخذها عالهادي خالص بالتدريج.

مثال كمان:
شاب بيقعد مع شباب بيشربوا سجاير، وبيقول مش هشرب.. مرة عالتانية طب هجرب عشان أخد فكرة بس..... لحد المشهد الأخير إللي كلكم برده عارفينه وإللي في أحيان كتير بيوصل لإدمان المخدرات كمان.
والشيطان في أول خطوة دي ما جالوش قاله اشرب مخدرات.. لأ اخده برده عالهادي خالص بالتدريج
وقيسوا على كده...
افتكروا كده موقف كنا مفكرين إن بدايته عادية وفي الآخر وقعنا في الغلط واحنا عمرنا ما تخيلنا أبدا إن الحال يوصل بينا لكده...فخدوا بالكم من خطوات الشيطان اقطعوا الطريق عليه من الأول👌

المهم نرجع لقصتنا😁
الناس عبدوا الأصنام وكان أول مرة تُعبد الأصنام على وجه الأرض، فربنا بعث أول نبي مُرسل وهو نوح عليه السلام،
وكان بين بعثته وبين موت آدم عشرة قرون يعني ألف سنة،
قال رجل : يا رسول الله: أَنبيٌّ كان آدم؟
قال: نعم مُكَلّم.
قال: فكم كان بينه وبين نوح؟
قال: عشرة قرون.

وربنا بعث نوح لقومه يعني هو رسول لقومه هو بس،
وكانت رسالته واضحة:
يا جماعة اعبدوا ربنا إللي خلقنا كلنا ومفيش إله غيره..اعملوا إللي يرضيه وابعدوا عن إللي يغضبه 👌
" لَقَدْ أَرْسَلْنَا نُوحًا إِلَى قَوْمِهِ فَقَالَ يَاقَوْمِ اعْبُدُوا اللَّهَ مَا لَكُمْ مِنْ إِلَهٍ غَيْرُهُ"
ولو تركتم عبادة التماثيل دي واستغفرتم... ربنا هيغفرلكم إللي فات،
"أَنِ اعْبُدُوا اللَّهَ وَاتَّقُوهُ وَأَطِيعُونِ * يَغْفِرْ لَكُمْ مِنْ ذُنُوبِكُمْ"

ويرضى عنكم ويبارك لكم في ذريتكم ويرزقكم الأموال وينزل عليكم الأمطار وهتعيشوا في سعادة وفي الآخر هتدخلوا الجنة:
"فَقُلْتُ اسْتَغْفِرُوا رَبَّكُمْ إِنَّهُ كَانَ غَفَّارًا * يُرْسِلِ السَّمَاءَ عَلَيْكُمْ مِدْرَارًا * وَيُمْدِدْكُمْ بِأَمْوَالٍ وَبَنِينَ وَيَجْعَلْ لَكُمْ جَنَّاتٍ وَيَجْعَلْ لَكُمْ أَنْهَارًا"

الكلام واضح ومنطقي أهه مفيش فيه أي مشكلة💁‍♂️
يا ترى بقى كان إيه رد قوم نوح على كلام نوح عليه السلام؟

ده إللي هنعرفه في الجزء الجاي إن شاء الله.

◇هتلاقوا المصادر إللي كتبت منها القصة في التعليقات للي عايز يرجعلها👇

حتّى وإن بَدت مُعتِمة دونَ بصيصِ أملٍ سيأتي الجبرُ المغنِي وستغدُوا القلوبِ عامِرة بشُعاعِ نورٍ ينيرُ دروبِ الظلامُ الحالِك بينَ أرجَاءِ الأفِئدَة، وتذكروا دومًا أنَّ ﷲ دارُنا، وجارُنَا، وحسِيبنا، وأنَّه لا ملجأ من ﷲ إلا إليه، وأن الظُلُمَاتُ لها وقت وسنتجلي فيه، غدًا ستَندَثِر الهُمُوم، وستُمحَىٰ النُدُوب، سيأتي وقت نَمضِي فيه دُونَ أدنَىٰ حُزنٍ أو مَسَاسِ ألَمٍ فِي قُلوبنَا، سَنَحْيا بَعْـد كُربَتِنا لِنَصِل إلى السَلام الذِي لا بعده سَلاَم، إلى أن نصل للنهاية التي نرجُوها، حتى نقُول ها قدْ جعلَها ربي حقًا، ها قَدْ جُبرنا ..

#نـورا_نـصـر💙.

حدثني عن الكريم الجميل سبحانه ..

ج/ ربنا الذي لا نعمة إلا منه، أرحم بنا من الأم بولدها، يفرح بتوبة عبده مع استغنائه عنه، ويحلم عليه عند المعصية مع قدرته عليه!

يجيب المضطر ولو كان مشركًا، وينصر المظلوم ولو كان كافرا، ويشمل الكل برحمته العامة، ويخص أولياءه برحمته الخاصة نورا وعافيةً وهدايةً وتسديدا، ويرزق عبده، ويمن عليه بتوفيقه للخير، ويزينه في قلبه، ويتقبله منه على ما فيه من نقص وعلل، ويثيبه عليه ثواب الأبد في جنة الخلد!

فالحمد لله لا نحصي ثناء على الله ، هو سبحانه كما أثنى على نفسه!

الحمد لله ثم الحمد لله ثم الحمد لله.

الشيخ وجدان العلي

‏لو يعلم النائمون عن صلاة الفجر وما فيها من لذه عظيمه لـ جلسوا الدهر مستيقظين لـ نيلها، لا تحرم نفسك لذتها فهي نور يومك .💙

مبطل صلاة ليه ؟!

مش معنى أن فيه صلاه فاتتك، أو راحت عليك نومه لصلاه الفجر يبقى تبطّل صلاه ..

مش معنى أنك عملت ذنب فتضعف فتبطّل صلاه ..

مش معنى أنك يأست من كل حاجه و تعبت فتبطّل صلاه ..

مش معنى أنك مش حاسس بلذّه الصلاه فتبطّل صلاه ..

الصلاه ترمومتر حياتك ، بيظبّط نفسيتك ، مش هقولك هتبقى سعيد أوووي، بس هقولك أنك هتستشعر الراحه ال هتخليك قادر تعيش..

جرعه أكسچين، الأكسچين مش هيجعلك حاسس بسعاده بس بيخليك تقدر تعيش و تكمّل و من غيره مفيش حاجه هتضمد جروحك ..

الصلاه هتهذّبك أكتر، فيه مره حد راح قال للنبيّ صل الله عليه وسلم أن فيه واحد بيصلّي و بيعمل كبيرة من الكبائر، فرَد النبيّ و قال " ستنهاهُه صلاته يوماً "

فحاول مهما كان حالك تتمسّك بالصلاه و بالمُحاوله ربنا هيمدّك و يعينك، فمتبطّلش صلاه 💙!"

#الصلاة_أكسچين

#قصص_الأنبياء
#الحلقة_العاشرة
#بين_آدم_ونوح
#إدريس_عليه_السلام

اتكلمنا المرة إللي فاتت عن نبي الله شيث عليه السلام، وعرفنا إن النبي إللي جاء بعده كان إدريس عليه السلام،
"وَاذْكُرْ فِي الْكِتَابِ إِدْرِيسَ إِنَّهُ كَانَ صِدِّيقًا نَبِيًّا "
كان إدريس عليه السلام أول نبي يُشرِع القتال في سبيل الله في عهده،
والقتال كان لأن قوم قابيل أو القوم إللي كانوا عايشين في السهل أفسدوا في الأرض وتعدّوا على أهل الإيمان من إللي بيسكنوا الجبل،
فجهز إدريس عليه السلام الجيوش وهجم عليهم بالخيول والمشاة فهزمهم وقتل منهم فكان ده سبب في التقليل من شرورهم،
ويُقال إن هو أول من كتب بالقلم وعلّم الناس الكتابة،
وربنا أثنى عليه ورفع مكانته،
"وَرَفَعْنَاهُ مَكَانًا عَلِيًّا"

☆ولما أقول لكم "يُقال" يعني دي صيغة تضعيف للخبر، بيستخدمها العلماء عشان يبينوا إنها معلومة مش مؤكدة.

رسول الله ﷺ كان قابل إدريس عليه السلام في ليلة الإسراء وهو في السماء الرابعة،
وفي قصة بيذكرها كثير من المفسرين عن ابن عباس رضي الله عنه،
إنه سأل كعب الأحبار عن قوله تعالى:
"وَرَفَعْنَاهُ مَكَانًا عَلِيًّا"
فقاله إن ربنا أوحى لإدريس عليه السلام إنه بيعطيه كل يوم مثل أجر بني آدم كلهم في زمانه،
لإن إدريس عليه السلام كان بيدعو الناس بجِد وقوة وكان مجتهد في الدعوة إلى الله بشكل عظيم،
فلما إدريس عرف الأجر العظيم إللي بياخده ده حب إنه يزوّد من عمره عشان يضاعف من عمله وبالتالي أجره يزيد💁‍♂️
فكان لإدريس عليه السلام صاحب من الملائكة ،
فقال له على إللي ربنا أوحى له به، وقال له على رغبته إنه عايز عمره يزيد فكان عايز يكلم ملك الموت إنه يسيبه ولا يقبض روحه في موعدها ويؤخر معاده👌
فالمَلك أخذه وطلع بيه للسماء وهم طالعين قابلوا ملك الموت نازل واتقابلوا كلهم في السماء الرابعة فأخبر المَلك إللي هو صاحب إدريس عليه السلام ملك الموت بالحكاية فقاله ملك الموت وأين إدريس؟!
فقاله معايا هنا، فقال له ملك الموت :
سبحان الله ! ربنا أمرني إني أقبض روحه في السماء الرابعة فتعجبت إزاي أقبض روحه في السماء وهو على الأرض فسأل المَلك إللي هو صاحب إدريس :
كم الباقي من عمر إدريس ؟
فقال ملك الموت : لم تبق له طرفة عين فنظر الملك على إدريس عليه السلام وكان شايله على جناحه فلقاه مات.
وده قول كثير من المفسرين في تفسير قوله تعالى:
" وَرَفَعْنَاهُ مَكَانًا عَلِيًّا"

☆بمناسبة الكلام عن ملك الموت، في سؤال ممكن يكون محير كثير من الناس هو:
إزاي ملك الموت يقدر يقبض أكثر من روح في نفس الوقت،
يعني لو أكثر من واحد جاءت ساعة وفاته إزاي ملك الموت بيقبض أرواحهم كلهم في نفس الوقت😳

شوفوا،
ربنا بيقرب لملك الموت مسافات الأرض حتى تكون بين إيده زي القصعة يعني زي الطبق إللي بيكون بين إيدنا يأخذ من حيث شاء،
وملك الموت له أعوان بيساعدوه في إخراج الروح من الجسد لحد ما يوصلوها للحلقوم،
فأول ما توصل الروح للحلقوم يقبضها ملك الموت👌

◇ملحوظة بقى:
قصة موت إدريس عليه السلام إللي قلتها دي من الإسرائيليات👆
وأنا تعمدت أقولهالكم عشان اشرحلكم يعني إيه إسرائيليات وحكمها إيه عندنا في الإسلام👌

□الإسرائيليات معناها:
الأخبار والروايات المنقولة عن بني إسرائيل، يعني بني إسرائيل عندهم معلومات وأخبار من الأمم إللي فاتت من بداية آدم عليه السلام وحتى بعثة رسول الله ﷺ.

☆حكمها إيه طيب؟!
حكمها إننا لا نصدقها ولا نكذبها لقول رسول الله ﷺ :
"لا تصدقوا أهل الكتاب ولا تكذبوهم"
لكن يجوز إننا نقول الأخبار والروايات دي من باب الوعظ والنصح ومعرفة أحداث التاريخ عشان نفهم الصورة كاملة،
ومن غييييير ما نُجزم إنها صحيحة أو باطلة مادام مفيش دليل على كده👌
لقوله ﷺ : "حدثوا عن بني إسرائيل ولا حرج"

¤الإسرائيليات بقى بتنقسم لثلاثة أقسام:
◇الأول: إنها نفس إللي في القرآن والسنة وده نصدقه ونقوله عادي.
◇الثاني: ما يكذبه القرآن أو السنة وده يجب علينا إننا نُكذبه👌
◇الثالث بقى ده إللي احنا بنتكلم فيه دلوقتي،
وهي أخبار وأحداث وروايات...القرآن لم يُصدقها ولم يكذبها فدي عادي نقولها من باب الإستئناس وإننا نعرف معلومة لكن من غير ما نصدقها ولا نكذبها 👌

¤طيب ياحجة انتِ بتقوليلنا الكلام ده ليه يعني🤨
◇أولا :
عشان يكون عندكم علم بمعناها؛
لأن في كثير من الناس ميعرفوش يعني إيه إسرائيليات وأول ما يسمعوا الكلمة يتخضوا يفكروها حاجة وحشة وكذب في الدين وكده يعني😅
فدي معلومة هتفيدكم إن شاء الله إنكم تغربلوا الإسرائيليات على ال ٣ أقسام زي ما شرحنا.

◇ثانيا:
كثير جدا من المفسرين زي ابن كثير والطبري وغيرهم حتى من الصحابة زي عبد الله بن عباس رضي الله عنه بيستعينوا بالإسرائيليات إللي هي القسم الثالث دي 👆في تفسير بعض آيات القرآن زي ما حكينا قصة إدريس عليه السلام وشرح آية

ما معنى حسن الخلق ؟

هو أن يكون الرجل كثير الحياء ، قليل الأذى ، كثير الصلاح ، صدوق اللسان ، قليل الكلام ، كثير العمل ، قليل الزلل ، قليل الفضول ، برا وصولا ، وقورا صبورا ، رضيا حليما ، رفيقا عفيفا شفيقا ، لا لعانا ولا سبابا ، ولا نماما ولا مغتابا ، ولا عجولا ولا حقودا ، ولا بخيلا ولا حسودا ، بشاشا هشاشا ، يحب في الله ، ويبغض في الله ، ويرضى في الله ، ويغضب في الله ، فهذا هو حسن الخلق.

₪ قليلا ما تشكرون ₪

الحمد لله على عين تبصر و أذن تسمع و جسد معافى و قلب ينبض 🕊📿

متبعدش عن ربنا بعد ما قربت لمجرد إن الشئ اللي دعيت بيه ونفسك فيه اتأخر عليك ،
متبقاش زي اللي بيعبد الله علي حرف فإنه اصابه خير أطمئن به وإن اصابه ضر انقلب على وجهه ،
ربنا هيختبر صبرك ، وهيختبر قربك منه هل هو فعلا صادق ولا لأ والاختبار ده ممكن يكون بمحنه أو بتأخير دعوه فلازم تثبت

و الأهم إنك كمان تتأكد إنه سمعك ومفيش دعوه إلا واتكتبت في لوح الإجابه ❤️

يارب.. أما آن لهذا القلب أن يطمئن، ولا يرتجف خشية الغد؟.. أسألك "الأمان"، و"القوة".

كله بيتمنى يتغير ويقرب من ربنا، بس مش كله بيسعى ويجاهد علشان يوصل لكده..

كفاكم أَماني، وتسويف، وسارعوا فالعمر يمضى ولا يبقى للأبد..
🍂

س/ يا شيخ حدثني عن معنىٰ السكن ؟

ج/ ظهرك مسنود .. وهناك من يراقب النافذة متىٰ تعود ، عينك فرحانة وروحك ملآنة ، قلبك مستغني بعهد صادق ، أنت مني وأنا منك . ❤️

لا اله الا انت سبحانك اني كنت من الظالمين

ربي اني لما انزلت الي من خير فقير

اللهم آتنا في الدنيا حسنة وفي الآخرة حسنة وقنا عذاب النار

اللهم انك عفو كريم تحب العفو فاعف عنا

اللهم ارزقنا الهدي والتقى والعفاف والغني

❤❤❤❤

هيغفر
بس انت ارجع بجد ♥️

#رسالة فجريه 💙

الرسول ﷺ هيعرفكم لما تصلوا عليه.

فأكثروا من الصلاة على الحبيب المصطفى ﷺ.

قال رسول ﷺ : "إن أفضلِ أيامِكم يومُ الجمُعةِ ، فيه خُلِقَ آدمُ وفيه قُبضَ وفيه النَّفخةُ وفيه الصَّعقةُ فأكثِروا عليَّ من الصلاةِ فيه فإنَّ صلاتَكم معروضةٌ عليَّ ، قالوا : يا رسولَ اللهِ وكيف تُعرضُ عليك صلاتُنا وقد أَرَمْتَ ؟ يعني وقد بَلِيتَ قال : إنَ اللهَ حرَّمَ على الأرضِ أن تأكلَ أجسادَ الأنبياءِ". حديث صحيح.