#DHALATAA_BAADIYYAA
***********
Ilma oromtichaa
An sanyii kuushiitii
Intalo wal barraa
Na hubadhu usiitii

Dhalataa baadiyyaa
Qe'ee xaafiif bunaa
Anumaam intalo
Sanyiin tufaa munaa

Asheeta boqqolloo
Kan Garbuuf qamadii
Oobdii sabboontichaa
Abuurii gammadii

Ancooteefi qochoo
Muuziidhaafi Qaaccoo
Takkooyyeenis jira
Feetus wal dhokachoo

Jabbileefaa tiksaa
Sagaleen weeddistaa
Simbira furrisaan
Garbuurraa deebistaa

Eenyuun akkan tahe
Sitti himeen fixaaree?
Ta'us eenyummaakoon
Nuffiidhaan dhiisaaree?

Dachee eebbifamte
Keessaa ergan dhaladhee
Badhaasa uumaakoo
Hin haalu dagadhee

Kan foolii moggootiif
Addooyyee urgeessuu
Kan aadaa oromoo
Hojiidhaan dhugeessuu

Kan daboo wal waamee
Oomisha calleessuu
Hammaaree dhiyeessee
Kan gabaa wayyeessuu

Qe'ee roobaan margee
Magariisni haguuguu
Keessa Taa'aniitu Seeqaa buna dhuguu

Kan namatti tolu
Sagalee bareedaa
Waca simbirrootaatu
Gurra namaa arreedaa

Maal jedheetan ibsa
Miirakoo mo'ateem
Gammachuudhaan marsee
Na jalaa dhokateem

Miira keessaa baheen
Booda itti sii fufaa
Na eegikaa intalo
Bay'aannadheen dhufaa...

Waan dubbistaniif Galatoomaa!

WAADAAN TORBAN TOKKOTTI QABAME GUYYAA TOKKOTTI ISINIIF RAAWWATAME!
Kunimmoo SOBAA Nan godhu Dafee kan waadaa guutu Na godha malee

Liinkii kana Tuquun 👉@Abdiifan , Seentanii Join gootanii Chaaneelii Keenya Galaana Walaloo Jedhu Hordofuun irraa Barachuuf itti Bohaaruu Dandeessu! Yaada Qabdaniif Barreessaan👉@UmerAbdela