شفت الموت كل مسيه
عامذبوح والسبيه
بكل رواياتي الرويها عالضامي
انظر العاشر وضيمه گدامي
الصادق اني

_ ١ _
بــالسلام اعله النحر يبتدي موضوعي
كل روايه لكربله تنكتب بدموعي
اذكر ضلوع السبط والطم اعله ضلوعي
اسوه بليالي السبي انطفت نار شموعي

والضوه بي عاطفه
من سمع حزنك طفه
مصرعك شيوصفه

دم عليك كل نحيبي
وبطاريك يا حبيبي
لمن ابچيلك بلوعة آلامي
انظر العاشر وضيمه گدامي
الصادق اني

_ ٢ _
خلصت ليلي سهر نوم مامر عيني
انه الـ سابيلي حرم وذابحين حسيني
اذكر أيتام السبي لو نظرت ابنيني
واذكر جفوف الگمر من انظر لچفيني

اشرب الماي العذب
وابد مايروي الكلب
جدي ضامي اعله الترب

ذكرك بيه من اجاني
هذا الماي ما رواني
باقي باليقضه وبساعة أحلامي
انظر العاشر وضيمه گدامي
الصادق اني

٣ _
بيه ما يبقه نفس واحتظر كل ليله
لون بيدي لكربله كل خميس امشيله
واوگف اباب الصحن بسكته ما احچيله
الدمع ما يكفي تره كون دم ابچيله

وتعرض اكبالي الصور
ضلوع مطحونه ونحر
وجسد متگطع وذر

بجدي حسين كلشي صاير
صدره انداس بالحوافر
كون مو صدره تتهشم عضامي
انظر العاشر وضيمه گدامي
الصادق اني

_ ٤ _
بسطح داري بكل مسه الزياره اقراله
أقره عاشوراء إله ودمعتي هماله
السلام اعله الذي مگطعين اوصاله
السلام اعله الذي مسلبين أطفاله

عن بعد من سلمت
منه رد انه سمعت
ضامي ياجدي متت

جنه يگول يالتجوني
بشرب الماي اذكروني
بكل لياليّ اذكرنه وأيامي
انظر العاشر وضيمه گدامي
الصادق اني

_ ٥ _
حرگو الباب وصحت بابي هينه أحزانه
حسين حرگو خيمته وروعوا نسوانه
نار بيتي تنطفي وما طفت نيرانه
بيها زينبنا بقت تنظر وحيرانه

نار داري وحالتي
تهون هاي امصيبتي
يم مصايب عمتي

علويات بيه لاذن
مسبيات هنه راحن
من شفت بيتي ذكرني بخيامي
انظر العاشر وضيمه گدامي
الصادق اني

_ ٦ _
سمي ما همني أبد وما تهمني جروحي
بيه من يگضي العمر يعني يخلص نوحي
هنه جم لحظه بقن والتقي بمذبوحي
بجدي ما دام التقي خلي تطلع روحي

حنضل اجرعت الصبر
بعد مابيه انتظر
لشوفته فدوه العمر

جدي حسين راح اجيله
ليه مشتاگ كـ العليله
بذكر أبو اليمه گاضيهن اعوامي
انظر العاشر وضيمه گدامي
الصادق اني

#مصطفى #الشافعي