#من_ديوان_الدموع_الزينبيه_الجزء_٣٦_


لطميه للوالده

ليش بتراب المكابر غافيه
صبحت دارج خليه وطافيه
🏴🏴🏴💔🏴🏴🏴
صبحت دارج حزينه مكدره
اسم الله يمه عليج من المكبره
شفت حادي الضعن بضعونج سره
كمت مرعوبه وراج وحافيه
🏴🏴🏴💔🏴🏴🏴
من شفت حادي الضعن عني خذاج
فدوه تانيني صحت واركض وراج
يمه هاي اوسادتج هذا دواج
انتي طيبه وبس محنتج كافيه
🏴🏴🏴💔🏴🏴🏴
ليش جافيتي ويهد حيلي الجفه
امي يا ام المحنه والوفه
ردي يالطبعج حنان وعاطفه
شدي راسي يم ادين الشافيه
🏴🏴🏴💔🏴🏴🏴
راسي يوجعني واريدن شدتج
مالي روح شلون اطب لحجرتج
والله تعميني من اشوف عصابتج
خير ملكاج ويجيب العافيه
🏴🏴🏴💔🏴🏴🏴
ياهلا بملكاج لو كلتي هله
امي ياخيمه وتلم العايله
للمكابر ليش عني شايله
رمل وتراب وذواري سافيه
🏴🏴🏴💔🏴🏴🏴
تراب يتسافه ورمل يمه الكبور
منهن تخربين يالوجهج ينور
راح وياج الفرح راح السرور
صارت كلوب الاهل مو صافيه
🏴🏴🏴💔🏴🏴🏴
كبل يمه انتي التصافين الكلوب
هسه وين الكاج وبعيده الدروب
انشد امصلاج لو صار الغروب
هموم بالدلال عكبج خافيه
🏴🏴🏴💔🏴🏴🏴
هموم بالدلال يايمه خفيت
المن اشكي خلاف عينج ماشكيت
شفت دار الوجه خال ابني من اجيت
كال مليناج والمن لافيه
🏴🏴🏴💔🏴🏴🏴


*تـــمت والـــــفضـــ🤲ـــل لله تعالى*
*بقلم✍الشاعره أم ريام دخيل الركابي قضاء الرفاعي*
*صاحبه ديوان📚الدموع الزينبيه*
*❌لايجوز شرعاً وغير مبرء الذمه كل من يحذف أسم الشاعره وينسب القصيده اله علماً أن القصيده قد سجلت بدفتر الزهراء عليها السلام❌*

https://telegram.me/haneen_Ali_Faris