الشاعر حسين صادق العقابي

قصيدة لصاحب الزمان عج

امنيات. عله طول سنيني كاتبهه بدمع
امنيات. بكثر نبضات الكلب جوه الضلع
يامولاي.. يامولاي.. يامولاي
……..

ياجبير جروحي. الامل باقي بروحي. جمعه جمعه بانتظارك
امنياتي هوايه. يمته اشوف الرايه. بيها اسمك فوك دارك

انته ماي. وانه صحره وتدري حالي بيا وضع
امنيات. بكثر نبضات الكلب جوه الضلع
يامولاي.. يامولاي.. يامولاي
..........................

ارد اعرف شلونك.. وين اشوف عيونك.. بوجع روحي بس اتاني
عيوني الك مشتاكه.. اوياك وين اتلاكه.. يمته ياصاحب زماني

اشتياق.. ياغريب الجيتك افزع دمع
امنيات.. بكثر نبضات الگلب جوه الضلع
يامولاي.. يامولاي.. يامولاي
.......................

امنيات احساسي.. تمسح ايدك راسي ومن الاكيك بدمعتي

خوفي يخلص عمري.الفركه كسرت ظهري. بدونك اني ياغربتي

وين اروح.. وبيك يابو دموعي يايوم انجمع
امنيات.. بكثر نبضات الگلب جوه الضلع
يامولاي.. يامولاي.. يامولاي
....................

ردت اشوفك مره. صدك عينك حمره.
عله حسينك والسبايا
تشيل راية ثارك. واني من انصارك.
وانته تعلم بالنوايا

خاف اموت. ويظل بالحسرات كلبي المنشلع

امنيات.. بكثر نبضات الگلب جوه الضلع
يامولاي.. يامولاي.. يامولاي

…….

الله يعلم بيه.. ادعي الك يوميه
ونته تدري بنكساري
ياامامي الغايب.. گلبي بالهم ذايب
وليلي دمعه وي نهاري

بالدعاء.. ربي عجل في ضهور المنفجع
امنيات.. بكثر نبضات الگلب جوه الضلع
يامولاي.. يامولاي.. يامولاي
.......................

الغربه هدت حيلك .. وزينب تناديلك
مهدي عمه شهل مصيبه
لا اخو تعناني.. والدمع اذاني
اليمته روحي تضل غريبه

صعبه حيل .. ازيارة الخدام عني تنمنع
امنيات.. بكثر نبضات الگلب جوه الضلع
يامولاي.. يامولاي.. يامولاي
.......................

حسين صادق العقابي

الحمد لله. الشكر لله
خادم صرت لحسين. الشكر لله

……..

كالولي الاجر يحسين. اعله گد اليتعب بخدمه
وما رايد اجر وياك. احبك يا ابو اليمه


بهالدرب ماكو استراحه. والتعب بالخدمه راحه. يا ابا عبد الله
والسأل تحچيله عيني. فدوه راحتلك سنيني. يا ابا عبد الله

يا احله موضوع. ظل جوه الضلوع.
خادم صرت لحسين. الشكر لله

…………

شفت الوادم بدنياي. كلمن موقفه ودوره
وانه خادم صرت لحسين. ابوي واخذ بشوره

دخيله كلبك ماكو منه . ضامي ويوزع محنه. يا ابا عبد الله
بدونك انته عمري ضايع. چنه ديره بلايه جامع. يا ابا عبد الله.

ياربي ممنون . بكد شوف العيون
خادم صرت لحسين. الشكر لله

…….

يواهس عمري يامولاي. بدونك كلشي مايسوه
من اسولف ويه روحي الكاك. انته السالفه الحلوه

روحي صحره يا امامي .وانته كوثر واني ضامي . يا ابا عبد الله
لعالم جروحك اخذني. الزم ايدي ولاتهدني . يا ابا عبد الله

هنيالي بس بيك . تقبلني ادريك
خادم صرت لحسين. الشكر لله

……….

روحي تضيع واتعناك. والكه بحضرتك روحي
الحب الصدكي بالدمعات. ويحله بخدمتك نوحي

ظلمه من دونك سنيني. انته اقرب من وتيني. يا ابا عبد الله

تبدي عالفطره الحكايه. حبي باقي بلا نهايه. يا ابا عبد الله

عاشك واذا موت . ماعندي بس صوت
خادم صرت لحسين. الشكر لله

………….

بكل كعده السوالف بيك.يا تسبيحة لساني
وحلاة الليل يكضي وياك. واحد يسمع الثاني.

كلبي يبعثلك سلامي. وبس الك صار اهتمامي. يا ابا عبد الله
يا ساگي زهرة شبابي. يل طفك قصة عذابي. يا ابا عبد الله

شكراً يمولاي. شكراً يبو الراي
خادم صرت لحسين. الشكر لله

……..

الك يحسين برض الشام. غريبه ولا اهل يمهه
عليك بداعة العباس. لتعوفوهه وحدهه


زينب الله شمصيبه. عدله وميته ياغريبه
يا ابا عبد الله
تحضرو اهل الحميه. لليالي الزينبيه. يا ابا عبد الله

والغربه مرتين. متمرهه يحسين.
خادم صرت لحسين. الشكر لله

……..

نسألكم الدعاء
حسين صادق العقابي

قصيدة لاستشهاد الزهراء ع. شوط كربلائي


افضالج علينه هواي. ياخيمة مجالسنه
عهد يم الحسن للموت. مانترك شعائرنه

.....
مخلوقين الج خدام. من الذر يأم حسين
من الاصلاب صحنه وياج. احنه اعله العهد باقين
صغار كبار صوت نصيح. بخدمتچ والله وتأمرين

نرفع راية الخدمة
نردد احنه هالكلمه
مشكوره اعله هالنعمه

لو ما انتي وين نروح. لو ما انتي چا ضعنه

......

عشكنه الاه والحسرات. بعزاء حسين والخدمه
اباب حسين كل الخير. نعمه مچلبه بنعمه
كل خادم فلا ينهاب. بس خادم ابو اليمه

يازهراء حزمينه
بهاي الخدمه خلينه
بس لحسين ابو سكينه

نموت ومانعوف حسين. غير حسين ماعدنه

....

كلب بكلب مشدودين. خدامج بهالمجلس
من حيلج خذو هالحيل. كل الاجه ومتحمس
والماشدله رايه وياج. هذا الخاسر المفلس

لاينفع ولد لامال
موبس چلمه من تنكال
الويه الزهره بحسن حال

لحد كطع النفس والله. مانترك مآتمنه

......

الواعي اليفهم الله شراد. وجوب المأتم يحضره
تخلف عاللطم كالو. وجاهل راسه اليطبره
ثقافتهم بترك الدين. وثقافتنه انتي يالزهره

نفسنه لو خمد والصوت
وننشال بخشب تابوت
ولو الفين مره نموت

حتى بالكبر نهتف. يحسين بضمايرنه

.......

خدمتج والله رفعة راس. بعزائج نرفع الهامه
الف شكراً والف نعمه. الج من صرنه لطامه
الف هنياله يازهراء. الكضه وياكم ايامه

ياباب الكرم والجود
منج هالعزم والزود
عمرنه بشيلتچ معكود

يا أم الخدم ننخاج. تتقبلين خدمتنه

........

الدنيه كلهه عفناهه. ولاهمنه الحچه والگال
بحبلچ احنه متمسكين. شما تتقلب الاحوال
العمر لوما نخدمج بي. غم ذاك العمر لو طال

الچ يافاطمه الزهره
كل خادم نذر عمره
قسم وبزينب الكبرى

ايد بأيد حد الموت. خدام لابو سكينه



نسألكم الدعاء
حسين صادق العقابي

قصيدة للزهراء ع

يكلبي. الليله سافر
على جناح المنابر

لعالم الخدمه إتعنه واتوضه بدمع
واعلك العشره للزهره بالمجلس شمع
……

لا تتكاسل بس ياكلبي. انطيني چفوفك يله وكوم
ومن ليل اسود مابي كمره. كون تفصل منه هدوم
بشريانك ياكلبي اتحزم. مايتعوض هذا اليوم
عايش من خيرات ام زينب. بالك تتسجل محروم

الليالي الفاطميه
امانه من الزچيه

اجزع الليله للزهره مكسورة ضلع
واعلك العشره للزهره بالمجلس شمع

………

بالك ياكلبي من الدنيا. ميّز واعرف وافهم زين
لاتبرد خليك بنارك. خلصانه الدنيا وماشين
انبض للزهرا والخدمه. هاي الخدمه تگر العين
چف اليلطم باچر يفرح. والعين التبچي اعله حسين



غرورك مايفيدك
تفيدك. لطمة ايدك

باچر الحسره متفيدك وعضت الصبع
واعلك العشره للزهره بالمجلس شمع

……

عاشرنه هواي بهالدنيا. شفنه الناس اشكال اشكال
وعاشرنه الزهره وكل خادم. لا ماطحنه بأي اشكال
كالو طاحت امكم زحمه. ومن العصره المدمع سال
شلال وطايح جاوبنه. ويحله من يطيح الشلال

سلاماً. ام ابوهه
شمسنه وماطفوهه

وي خدمهه مثل نسمه وي ريه انجمِع
واعلك العشره للزهره بالمجلس شمع

………

ابنادم ينحب اعله الفطره. مو كوه يحبونه الناس
الموقف لو مابي روحيه. بلسانك لا ماينقاس
يالكلبك صخره من الدنيا. الزهره تعلمك عالاحساس
احنه نحب المجلس تدري. چي بي طعم من العباس

المجالس. علمتنه
على الله. وافتهمنه

لو عمر ثاني اخدم ابد ما اقتنع
واعلك العشره للزهره بالمجلس شمع

……

لتلوم الخادم يتجنن. من يخدم امه الزهراء
وداعة هالمنبر تعرفنه. واحد واحد بالاسماء
تعلمنه الحب والروحيه. كلما ندخل هالاجواء
هذا العام احنه تعاهدنه. نقيم لفاطم عاشوراء

الخدمهه. عن قناعه
اله صك الشفاعه

الخدمه ماي الله تجريله من اطهر نبع
واعلك العشره للزهره بالمجلس شمع

………

حسين صادق العقابي

قصيدة لشهادة الزهراء ع

من گلبي صحت.. يمج شيبت
اكتب عالگبر.. ماتت من وكت
……..

بخنكة الصوت.. صحت ياعافيتي بعدج هالعمر ضاع
بخنكة الصوت.. آه وايام الحبايب يكضن بساع

بيه حسره وسالفه ومابيه انعه
راح اسولفهن يروحي دمعه دمعه
ياخسارة كلبي ما ادري شكبرهه
كلشي يرجع بس اليموت شيرجعه

ريتي بلا هوه. وعيني بلا ضوه
تسولف دمعتي. ماتت من وكت
.....................

بيت مهيوب. يصير للفقره وطن لو دكو الباب
بيت مهيوب. ومن عتبته مراد اخذو كلهم تراب

دارت الدنيا علينه والله صعبه
ياهظيمه لبيتي طبت ناس غربه
18 نبضه انتي عمرج ليش اذوج
والقصد چان النبي يشلعون كلبه

مذبوح الامل. دك بابي الاجل
وناده ياعلي. ماتت من وكت
...................

اسمع الاه. من وره الباب وضلع للزهره مكسور
اسمع الاه. وانه اجرع بالصبر يالزهره مجبور

طايحه طيحت نده بحسره شكبرهه
ظلوعج مكسريهه واعله الباب اثرهه
الله يدري الحسره البكلبي بغيابج
كومي يابعد اليشوفن يانظرهه

يرويحة علي. ياناسي وهلي
ما اسمع ردت. ماتت من وكت
.....................

بيه تدرين.. الليل من ايمرني اخلصه بدمعة العين
بيه تدرين.. ضهري محني من فركتج يم الحسين

ذبل عودي والحزن خيم عليه
مامصدك دافنج اني باديه
للمكابر امشي الج محتار حيره
وعل كبر اغفه ودمعتي تضل جريه

اصحه امن الألم.. فراكج جن سهم
وكلشي ايصيح الي.. ماتت من وكت
........................

كلبي مشلوع. بلايه كواك الله لمن ادخل البيت
كلبي مشلوع . هواي وادم بس احس لوحدي ظليت

هواي كبرتيني من عفتيني وحدي
الليل يكضي بدمعتي وايدي اعله خدي
ردت كلمة ياعلي بلسانج انتي
اه ياكبرج اخذ كل فرحه عندي

اوصل بالدمع. بقرآن وشمع
ويرد الكبر. ماتت من وكت


حسين صادق العقابي

قصيدة لاستشهاد الزهراء ع


التاريخ شاهد قبل. وعدنه ادلة عقل
عن ما جره لفاطمه. نثبت ظلم لو عدل

……

ما نروي عن اهل البيت. ولا نستدل من عدهم
اربع مذاهب يروون .ناخذ الشاهد منهم

كتاب المصنف بي خبر. ابن أبي شيبه يكول. الثاني چان المسؤول. هدد الزهره

بانساب الاشراف انذكر. بالجزء الاول والصار. نفس الشخص جاب النار. هدد الزهره

من نستدل بالخصم. شاهدنه مابي ظلم
بس ردنه نوصل الى . نثبت ظلم لو عدل

………

بهاي الرواية التأكيد. من تروي عن الزهره
المحسن عله اعتاب الباب. من طاح من العصره

فاطمه يكلوله اجت. وكفت تره خلف الباب. كلهم وإن والاسباب. يرضي الخليفه

هواي المصادر والكتب . بس ردنه هالناس تشوف. كيدو چم مره چفوف. اهل السقيفه

واليروي هذا الحصل. كتاب الملل والنحل
للعنده شگ بالامر. نثبت ظلم لو عدل

…….

العقل مصدر تشريع. يهل العقول اسألكم
فاطمه بلا مرقد ليش. وضايع كبرهه انشدكم

الوارث الشرعي للنبي. اخذو فدك منهه شلون. العاقل عرف والمجنون. نحلة محمد

من كيدو چف الوصي. ظل صابر وچان الراي. يحفظ الاسلام بهاي. والدنيا تشهد

وصت علي وبحزن. بالليل كون اندفن
عالشيخ ما راضيه. نثبت ظلم لو عدل

………

والد محمد بالنار. عدكم خبر متواتر
وما كفرتكم تروون. مات ابو طالب كافر

ويوم الرزيه لو كلت. ظلمو الزهره الشيخين. كافر اصير وموزين. لا مو عداله

مو حادثة تاريخ ابد. فاطمه صارت ميزان.
للباطل وللايمان. ورب الجلاله

بين الوعي و الجهل. اختارينه خير العمل
لا مو تعصب ابد. نثبت ظلم لو عدل

……….

من عنده مثل الكرار . من عنده مثل الزهره
من عنده مثل العباس. من عنده مثل العتره

نحب الصحابي بس شرط. لازم يحب الكرار. مثل ابو ذر وعمار. ومالك الاشتر

يتساوه عدنه لا ابد. القاتل ويالمقتول. يحتاج هالامر عقول. يالسامع احذر

لماشاف حيدر شمس. كلبه يدك بالعكس
وبالحشر من نلتقي. نثبت ظلم لو عدل

………

نسألكم الدعاء
حسين صادق العقابي

كون يطلع كلبي كدامي واشوفه شلون فرحان بخبرهم ❤️

اما خيبرٌ سنعيدُ فيكم
واما كربلا ستعادُ فينا
ففي الامرينِ يُكْتَبُ انتصارٌ
وللامرينِ نحنُ العاشقينا

#لبنان_الصمود

( قصيدة 14 نور ) متباركين بولادة الاقمار المحمدية

صلو على محمد

يا طه يا بو الزهرة
يا اصل نور العترة
بيك الله تمم امرة
والكون بسمك ردد / صلو على محمد

حيدر يحماي الجار
العالم بوصفك محتار
كرار لا مو فرار
بموقفك خيبر تشهد/ صلو على محمد

فاطمة يا ام حسين
يا شافعة بيوم الدين
يالشيعتچ مفطومين
من النار امر مأكد. / صلو على محمد

الحسن ثالث رحمة
بالكرم واضح اسمة
مشكورة هاي النعمة
ما تنحصي ولا تنعد. / صلو على محمد

يحسين يابو الاكبر
للشمس انت المصدر
يا ماي نهر الكوثر
حبيتك ومدري شكد. / صلو على محمد

السجاد في كل سجدة
للشيعة تنحل عگدة
اليگصدلة لا ميردة
للباري بي نتودد. / صلو على محمد

هيكل قداسة الباقر
يجبر بذكرة الخاطر
بگلوبنه يضل حاضر
باقر العلم الاوحد. / صلو على محمد

يبقى الامام الصادق
قرآن بالحق ناطق
يا جبل عالي وشاهق
نور البقيع الغرقد. / صلو على محمد

يدور الفلك وابراجه
بكاظمنه باب الحاجه
واللي مشة بمنهاجه
ما يجري دمعة اعلة الخد/صلو على محمد

يا شمس مدفونه بطوس
يالتنحني گباله الرووس
لكل المعارف قاموس
مشهدك شرف مشهد. / صلو على محمد

تبقى الجواد انواره
شمعة بدرب احراره
ترست الدنيا انصاره
وشعت انوار المرقد. / صلو على محمد

يا علي الهادي محلفك
تلزم ادينه بچفك
بحبك درينه وعطفك
نار الله تطفة وتخمد. / صلو على محمد

يا جود ماي الجنة
يالعسكري انته المنه
اطاك الله ما تتمنة
المهدي اللي بي نتوعد. / صلو على محمد

اسال الرايح والرد
جزتهه هالدنيا الحد
لبسهه بيدك چرغد
يالمهدي يا. سر. احمد. / صلو على محمد

الشاعر حسين صادق العقابي

مولد النبي ص

ياروحي روحي لحضرته وشمي هوه الجنه نذر انتي اله
محبوبي عايش بالكلب وادري جمال الله بشر ما اجمله

صلو على محمد النبي. صلو.

……

لاجمل بشر. وجه الكمر. هاي الولاده بفرحه نحييهه
كلب المحب. بسمه يدك. هالدنيا وجه النبي محليهه

رباني . واضح جماله كل خصاله وبصفاته والله رباني
خلاني. الهج بأسمه كل نهاري ويه ليلي اني خلاني

يسري بشراييني. هوه النبض بيه
فدوه اله فدوه. عمري وطواريه
عالامل عيشني. باحلام ورديه

رب الذين امنو. عالمصطفى صله. عظيم المنزله

محبوبي عايش بالكلب وادري جمال الله بشر ما اجمله

صلو على محمد النبي. صلو.

……..

ما اجمله. ما اكمله. يارحمة الله الساكن بروحي
نسمة هوه. ذكره دوه. لو كلت بسمه تنشف جروحي

من عيونه. اشراقه ضوت. بالمحنه. چنهه جنه تضوي بعيونه

خيعونه. طير الحباري. چنه كلبي. للمدينه. يروح خيعونه

من ايتامه يحسبني. امنيتي وحساسي
وبچفوفه اتمنه. يمسح على راسي
وبعطفه يشملني. اغلى واعز ناسي

من عنده بالدنيا مثل والد ابو الزهره. بشر نتقبله

محبوبي عايش بالكلب وادري جمال الله بشر ما اجمله

صلو على محمد النبي. صلو.

…….

الكل تنتظر. يوم الحشر. وامة محمد بيك مرحومه
من نرتجي. شافع تجي. هذا الشفيع الاعظم ويومه

خدامك. احنه الكضينه كل عمرنه. وافتخرنه. نصير خدامك

خدامك. وحسين يدري. ويعرفنه. من عشكنه. احنه خدامك

ياسيدي ارزقنه. هالليله لو نظره
وكلوبنه ترفرف. طير وعلى الحضره
شكراً اذا تقبل. ياوالد العتره

شمس الله ضوت بالسمه. بميلادك وانته تقود القافله.

محبوبي عايش بالكلب وادري جمال الله بشر ما اجمله

صلو على محمد النبي. صلو.

……….

نسألكم الدعاء
حسين صادق العقابي

مولد النبي ص

……..

سلامي. حبيبي . يامحمد
هيامي. غرامي. يامحمد
صوت جبرائيل غرد هالمسيه
الليله ميلاد الرساله العالميه
يامحمد
……..

مولد الحنين. الصادق الامين.. ياضوه السنين. ياحبيب الله وبدر شع بجماله
ياهو الشمال. ياعذب زلال. مظهر الجمال.بيك دين الله تمامه واكتماله

حبك يسري ويكبر. بالشريان الابهر. ومضوي السمه
يامفتاح الرحمه. بيك اتمام النعمه. يابو فاطمه
شمس الله الماشافك. وتمعن بوصافك. بعيونه العمه

لاح. بدرك ويضوي بسمانه
لاح. تارس الدنيا بحنانه

دعائي. رجائي. يامحمد
شفيعي. ضماني. يامحمد

ياجمالك ياحبيب الله ونبيه
الليله ميلاد الرساله العالميه
يامحمد.

…….

الرحمه والسلام. منقذ الانام. مبدد الظلام. يا امان الكره الارضيه بحياتك
السيد الرؤوف. النبي العطوف. موحد الصفوف. من صفات الله طبع تاخذ صفاتك

چفك خبز الفقره. تسير يمهم كمره. يانسمة هوه
لوما وجهك ضيه. تضيع الانسانيه. وظلمه بلا ضوه
شكراً يابو الزهره. الحصل منك نظره. بالحب ارتوه

شوك. ابعث بليلي ونهاري
شوك. وي جنح طير الحباري

حياتي. هويتك. يامحمد
اماني. نجاتي. يامحمد

نور وجهك تارس عيون البريه
الليله ميلاد الرساله العالميه

يامحمد

………

للكلب وداد. نعمه للعباد. رحمه بالمعاد. الله صلى اعليك واملاكه وعباده

هادم الذنوب. مالك القلوب. بعشكك اليذوب. حبه عذري ويبقه كل يوم بزياده

جاء الحق بچفوفك. يتوسل بحروفك. ياخير العمل
الدنيا انته مضويهه. من اولهه لتاليهه.
بس انت الامل
شكراً جد الساده. بحسين واولاده.
دين الله اكتمل

صار. حبك يصحي الضماير
صار. احلى نغمه اعله المنابر

نبينه. ولينه. يامحمد
قبولك. علينه. يامحمد
انته فرحتنه الچبيره الدائميه
الليله ميلاد الرساله العالميه

يامحمد.

……..

حسين صادق العقابي

فرحة الزهراء

هوسات

…….

اليوم الزهره تلبس المهدي. إلتاج وفرحانه هوايه
يشبه عمه ونفس رسومه. العباس البيمينه الرايه
هوه ملوحة كل العشره. وننطيه احنه اليوم حچايه

للموت ويا كم وفايه

…….

يمنصب من الله القائد. ياهيبتنه ويا كشختنه
يكلولك ارجع من تظهر. لا ما تحتاجك دولتنه
واحنه نكلك يبن الزهره. تفضل واهلا كل صيحتنه

جنود الله احنه وانته الايه

…….

شامه بخدك وجهك كمره. وعيونك جنه بصف جنه
يابعد الما شافن طولك. يايوم نشوفك نتمنه
شاغل كل عقول العالم. وچم چف امن دموعه اتحنه

سوالف عندي وياك هوايه

…….

كل متغرب رد لأهله. وما نعرف احنه بأحوالك
بديوانك ياشيخ العالم. يايوم نعزب بدلالك
لاتنسانه بداعة زينب. دوم تخلينه احنه ابالك

منك منتظرين حچايه

……

هوسه الدنيا وبيدك انته . تحلهه وانته اللي تصفيهه
رجع الوادم لله التاهت . عن دربك ماندري شبيهه
بدونك صرنه شجره بصحره. والحيره شلون بتاليهه

بچفك يمته ادك الثايه

…….

نسألكم الدعاء
حسين صادق العقابي

قصيدة لاستشهاد الامام العسكري ع


بداية غيبتك بيهه ابتدت رحلة غيابي
بأمان الله رحت وانه اكتبت قصه عذابي

اعله دهري شكد اعاتب.
انه الفاكد كواكب

………

ماظال كلشي من الدمع. ياوالدي وروحيتي
بينك وبين الطف كضت. من ضيمي كل عافيتي
بسامره ذبحولي حلم. وبكربله امنيتي
اعله كبوركم صحت بهضم . يادنيتي شخليتي

طواريك تهد خيل واحس بيهه بضلوعي
وماي دموعي خلص وبدمه تنزل دموعي.

انه الشابع مصايب. انه الفاكد كواكب

……..

ياهو الغريب بدنيته. مثلي ومثل احزاني
لا والد ولاعندي اخو. هيج الوكت خلاني
البكّاء من كثر البچي. والدنيا دار احزاني
من مثلي عماته انسبن. ومتغيرات الواني

انه العرفو اسم عمته وحبل خلو بديهه
انه ابن العايله الحركو خيم عزهن عليهه

صرت من ضيمي شايب. انه الفاكد كواكب

……..

يابيت اهلنه بلا ابو. ولاصوت للحنيه
هالليله ميتلي وطن. ودعت الانسانيه
خليتني بعمر الورد. بس الله يدري شبيه
نعشك احس هودج سبي. وروحي المشت مسبيه

كضو اهل الله والباقي انه وغربة زماني
مناره بديره مهجوره ومنو اليسمع اذاني

اعيش بلا حبايب. انه الفاكد كواكب
………

فوك الجتاف جنازتك. وكل خطوه عثره بدربي
مااحس حفرولك كبر. يحفرون احس بكلبي
جوه الترب صار الضوه. والهوه الچان بگربي
صحت ان وعد الله حق. يادمعه بالخد كتبي

انه وعمري ووجع روحي وعشرتي وذكرياتي
الثامن من ربيع اول. حضر موت امنياتي

شفت بيه العجايب. انه الفاكد كواكب

……..

الدنيا شكبرهه والبشر. يابويه ادري هوايه
هل من مناصر لو صحت. ياهو اليشيل الرايه
محد يجاوب صرختي. بس اسمع اني حچايه
لبيك يامهدي اعتله. صوت الخدم وفايه

صبراً ياخدم راجع واعيد الغاضريه
وعله الرايه اخط بدمعي. ياثار الزچيه

مع الوقت المناسب. انه الفاكد كواكب

………

نسألكم الدعاء
حسين صادق العقابي

كدامك كل يوم. مفتوح الگلب
تفضل يامولاي بيتك من تطب

عاشرتك اني من سنين.
ولا صاحب مثلك يحسين. دلاني الدرب
.....................

بسمك ابديهه.. روحي اخليهه.. نذر يم بابك.. يالمنطيني هواي
يانبض گلبي.. وبس الك حبي.. عايش بخيرك.. منك اخذ راي

يابشر مثلك وحتى ترابه ينحب
الكره الارضيه مدينه وانت كوكب
ونحرك اليحچي الصدك والدهر چذّب

دنيا بلا طاريك.. ماتحله الي
حبك ويه الروح.. اي يابو علي

انته أقرب ليه امن العين..
ولا صاحب مثلك يحسين. دلاني الدرب

.....................

يوسف الزهره. ملوحة العشره.
يابعد حيلي. يحله العمر وياك
انته ابو اليمه. لو ابو الرحمه
لو ابو جروحي. محتار بمعناك

كل جمال الدنيا ما خلاني لاهي
حسين بس انته اللي تلفت انتباهي
بوصلة حبي عليك واتجاهي

قبلة كلبي الصار. ذايب بالعشك
عشرة جرف وماي. لا مانفترك

مثلك مولاي الكه منين..
ولا صاحب مثلك يحسين. دلاني الدرب

....................

ياكهف روحي. واهس جروحي
شكراً لكلبك. يمسويني انسان
فدوه لعيونك. اني ممنونك
لولا حنيتك. ابقه بلا عنوان

كلشي بالدنيا ملل الا الخدامه
بدون عاشورك اصير من اليتامه
منبرك يبقه صديقي وللقيامه

كلبي يصير تراب. لوما مأتمك
يمضويه الافلاك. شذرة خاتمك

معاشر عدلين وميتين..
ولا صاحب مثلك يحسين. دلاني الدرب

........................

مني اخذ كلمه. وداعة الخدمه
صدري دكيته. وياك لحد الموت
خادمك اني. قنبر الثاني
ابقه اصيح اسمك. لو جثه بتابوت

من كلب ولسان والعباس احبك
طلب عندي ورايده من عرش كلبك
كون اظل لآخر انفاسي اعله دربك

بظلمة روحي تصير. اشراقة شمس
من كلب امي هواي. حنيتك احس
هواي معاشر واعرف زين..
ولا صاحب مثلك يحسين. دلاني الدرب

........................

كاتب بعيني. قل هو حسيني
اليشرك بحبه. مايعرف معناه

كلبي من شافك. احتار بوصافك
بالعشك ناده. شكد سبحان الله

حسين ياهيهات وتهز المسامع
يا اذان بكل منارات الجوامع
اخذ بيدي لعالمك لا ابقه ضايع

ماتتعوض دوم. خدمه من العمر
وتجدد كل عام. رايات النصر

كلمه ولا متصير اثنين.
ولا صاحب مثلك يحسين. دلاني الدرب

………

نسألكم الدعاء
حسين صادق العقابي