الأفلام و المسلسلات عباره عن قصص مستوحى من الخيال نشوفها عشان نمتع بصرنا و ممكن بعد نستفيد و نتطور ذاتيا لكن الزياده منه بشكل مفرط ممكن مع الايام بدون ما نحس ايجنا كسل او شعور الخماله لان يوم نتابع شي حركي و خيالي ؟ فـ الموضوع يباله جلسه و تركيز لكن فالـ جانب الثاني و الي يجهله الكثير عندنا " الروايات " الي ينكتب فيها اعمق الكلمات و اعظم المشاعر و ممكن قبل القراءة نكون شي و بعدها نصير شي ثاني لان يوم نقرأ من خاطرنا صفحه ورا صفحه بـ تركيز و استمتاع هالشي يأثر فينا بشكل ايجابي و ذاتي -- لو مثلا حد قرر انه يقرأ روايه فـ بيبدأ بـ اول الصفحات عقبها " يمل " او ما تجيه رغبه في انه يكمل لانه شايف انه الصفحات طويله و مشوار و متى بخلص ها اشوف فلم ولا مسلسل ابرك لي لكن هالشي غلط تراها روايات يعني شي طويل يكتب فيه الكاتب وصف عميق و يكون من الروايه عنده عده رسائل يبا يوصلها للـ قارئ فـ انت بين فصل و فصل حاول تستنتج الرسائل الي طلعت معاك و فكر هل هي بتفيدك شخصيا ؟ اذا هيه فـ طبقها و التزم فيها كذا انت بتكون شخصيه مرتبه اكثر لكن و ترا قراءة الروايات يباله جو و هالـ جو انت تصنعه يعني مثلا تقرأ في مكان هادئ و جميل ، و انت تشرب قهوتك الجميله ، تشغل موسيقى هادئه عقب تفرح تقرأ و الخ . . . كلحد و جوه الواحد يشوف الي يناسبه و يسويه -- اذا انت جديد على الروايات و ما تدري من اي روايه تبدا فـ الاحسن انك تاخذ شيئين يا عنوان شدك للـ روايه لان العنوان لاعب دور كبير لان بكون له شرح عميق فالروايه انت بتكتشفه بذات نفسك و الشي الثاني انك تختار شي تحسه ينفع لـ ذوقك كذا احسن عقب صدق تكون خذيت شي على جوك -- انا ادري انه يوم في ناس تفضل الافلام و المسلسلات لكن على الاقل جرب ولو لـ مره وحده انك تقرا روايه يمكن تحب لا تحكم على شي اذا انت ما جربته انت جرب و يمكن تحب و يوم تجي تاخذ روايه " خذ شي على جوك " + الروايه تساعد على خفيف رؤيتك للاشعه الي 24 ساعه مقابله عيونك حلقه ورا حلقه لين ما تخلص و تقوم تدور شي ثاني ها كلهه يسبب لـ عيونك اضرار انت مب مدركها شي طبيعي انك ما تحس فيها الحين لكن يمكن يوم تكبر ؟ بس يعني صدق فوق ما انه الروايات تمتعك الا انها هي تفيدك صحيا ، ذاتيا و تخلي طريقه تفكيرك تتغير بشكل ايجابي جدا في حياتك -- لها انواع عديده و مختلفه ، تغير عقليتك 180 درجه بشكل حلو ، تخليك تكتشف اشياء انت ما كنت تعرفها عن نفسك ، تخليك بعيد عن الشاشات و بديت تعيش فالـ حياه الواقعيه ، تخليك انسان عفوي و بسيط و طبعا هاي كلها ايجابيات للروايات بتفيدك يوم تبدأ تقرأ إن شاء الله لا تقول من اول صفحه ما حسيت بـ شي و مادري شو الموضوع يباله تعويد ها شي جديد انت تتعود عليه فـ طبيعي انك ما تتأقلم من اول مره لكن يمكن بعد فتره فـ استمر فيه و بإذن الله بتبدع // ربي يحفظكم و يطول بـ اعماركم و يهديكم و يسعدكم و يجبر بخاطركم و يستجيب ادعيتكم
