الشاعر مصطفى صادق اللامي

#نزال_للخدمه

سجني الدنيا مولاي..افراج لمجلسك جاي
_______________________________
ضگت طعم الفرگه من عفته حزنكم
شصار بالطفله العليلة الفارگتكم
انه جم يوم ورجعت بنص حضنكم
وهيه ماتت بس بعدهه امتانيتكم

گلبي ناصب مأتمه..وديني مجلس فاطمه..وسفه ويلوحك ضمه..وكوثر امك
اسمك تارس الماي..افراج لمجلسك جاي
_________________________________
بمنبرك شدني بحبل رتبني بأيدك
الدنيا سودة وبيهه الابيض بس عبيدك
خذّني لو سرِج اعلخيلك بلكي افيدك
وما اريده ياحُسين الما يريدك

كون اضل مثل العلگ..شما يشدوو واختنگ..بحضرتك اكثر شبگ..وما يعوفك
بين الراي والراي..افراج لمجلسك جاي
_____________________________________
ابلا حزنكم كلشي فاهي ابلا موده
والي ما عنده حسين شباقي عنده
اخلاف مجلسكم ولا تحلالي كعده
اتحزم و الطم حزنكم مثل هده

خدمتك حرب الزلم..واسم خادم احله اسم..شامة الليل النجم..ودمعي شامه
ودليل اسوالفي هاي..افراج لمجلسك جاي
____________________________________
ادموعي كبرن سيدي وبهاي ابشرك
ايطلعن ابحدهن اشما گمت اذكرك
ما اندل أبيتي بس اندله گبرك
اكسرلي گلبي يالبگه مكسور ضهرك

لصدرك الخلص سحگ..حزم جروحي بحرگ..شب علي نار العشگ..يا حبيبي

يا رازونة فياي..افراج لمجلسك جاي
___________________________________
من خدمتك صيتي كله وكل نعمتي
يعني ميضلي وجه لو ما خدمتي
خير ما بيه ولا خير بكبرتي
لو اعوفن عاشرك وانسه دمعتي

واحسب ابقه لعاشرك..حته انضف جادرك..امنيتي اصبح قمبرك ..ياحبيب
غربل شدتك هاي..افراج لمجلسك جاي

مصطفى صادق اللامي

#ميمر
(الى الانسان العباس ع)

سيف وقلم....كتاب وسهم..شايل عِلم وي العَلم
اكتبهن بورقة وشوف
يطلعلك اسم العباس
.............................................
شمخلي ربك سيدي بتكوينك
يمكن بديها الزهره سوت طينك
بگلب اختك انته يمكن امخلينك
وياك الدرب
بصلح وحرب
والمي حرم ما ينشرب
اله الگه فوگاه مكتوب
هذا سبيلك يا ياس
..................................................
روج النهر ليهسه يرجف خايف
منك يبوفاضل خطيه اشايف
ذب لونه طعمه وكلشي يمك عايف
من الركض
خلص لأرض
لو بيدة عگبك ينقرض
ما يدري يشرد ليوين
ضل لابد بريج الناس
.................................................
يخنگ خواصرها ويغير اعليهم
ما يخطي تفرق هوه يستخطيهم
يصد لنسلهم بلكي خير بيهم
يلفهم مثل
لفت حجل
ايخليهم بأيد الطفل
ويسوي سبحه امن الروس
حته بذبحهم حسّاس
........................................
شما تكبر الدنيا اصغر امن عيونك
اعله اخلاقك شكد جانو يحسدونك
العبد المطيع الصالح يسمونك
مثل الشمس
شما تنحبس
تضوي وترد احلة امن امس
ضيك يشع من كل صوب
بصفك يضيع الالماس
.........................................
ما ضل نهر ما طافك وزاهدهن
چي مي جربتك اقدس امن العدهن
وبگصّتك عندك نهر سابگهن
اطول نهر
بگصتك الگمر
من هامته لحد النظر
بمي غيره نشرگ مرات
ويروينه مي العباس
..............................................
خرسة المنارة الما تكّبر طوله
وادمنه ما شايفته ويحنوله
منكع وفه اليم العرش يدعولة
شما نختنگ
نشربك شهگ
ما لايگ الغيرك عشگ
صاحب فضل بس نكرو
من الشجر عصة الفاس

مصطفى صادق اللامي

#ثگيل
(حياة خادم)
هيه مختصر لحياة الخادم


الطفل اول ما يجي يبچونه
امن ادموع عينه خادم يعرفونه
وأمه بوجعها تشكر شكد الله
هذا الاجاني خادم لعبد الله
___________________________
بين صوت الله أكبر والبچي والياهله
گال ابو بس الله يفرج اخذ ابني لكربله

وگبل متشربه امه ويضوگ اللبن
شرب حبك من حچتله اعللصحن
ومن كثر ما حبك اعيونه بچن

ويا زنده شدو بي علگ من عدك
ولابس حرز والحرز صورة ولدك
وبدموعه جده كض ترتبته وصله
هذا الاجاني خادم لعبد الله
______________________________
ومر عليه اول محرم وعمره چان اچم شهر
لبسو دشداشه سوده و طلع احله امن الگمر

وجده شاله وبالمواكب ضل يفر
و لو يجي يم التشابيه و يمر
على الفطره ايدير وجهه امن الشمر

هيچ الطفل بحضانكم ضل يربه
ايسكتونه من يبچي ابصور للگبه
والدخل گلبك يا بشر يوصله
هذا الاجاني خادم لعبد لله
__________________________________
بصف الاول توه يدرس وانسئل عن الوطن
الوطن گلهم يعني مجلس نبچي بي وي ام حسن

وحته حيطان المدارس صفگت
و العصافير التزقزق غورگت
والمعلم عينه ما صبرت بچت

الدار يعني الصحن جان يگلهم
والدور من يبدي عزه موكبهم
وبالمجلس يضل يكنس بكل عطّله
هذا الاجاني خادم لعبد الله
_____________________________________
كبر طولة وشاربه انخط وشاب صار ابخدمتك
وگل لأبو حزمني فدوة وضهري شده بغترتك

وجان هذا اكبر ورث من ضهر ابو
بنفس غترت و الده من حزمو
حته نفس اللطمه لمن باوعوا

وهم وارث احزانه على المسبيه
و وراث مكانه الي بالحسينية
والشرب حزنك ما تجيسه الغفّله
_______________________________________
شيب الخادم وحدب و ولده لمو كبّرته
وضل على اولاده ايتعكز وما لزم عكازّته

وللمجالس بي يگودون الولد
شايب ووكت العزه ينزل يشد
قصه الخدام احله امن الورد

يحسين حزنك بينه كلش غزر
انموت ويعيشنه طاري المنبر
عيشنه طعم اللچمه يا وجه الله
هذا الاجاني خادم لعبد الله


مصطفى صادق اللامي

مولاتي العليلة


ليلة ليلة احسب وتاني
ها اجاني ما اجاني.؟؟؟
_____________________________
(١)
گطعت ارگاب السنابل..فرگتك گطعتلي گلبي
بديرتي الغربه عشتها..اخلافكم تيهت دربي

خشن..حچي الوادم من رحت كلش خشن
وگطن..گلب بتك ابيض بلون الگطن

اصفن واذكر ضحكتك..كسرت اگليبي فرگتك
دوهن احسابي زماني ..ليلة ليلة احسب وتاني
_______________________________
(٢)
وفقاً لقانون هاشم ...الابو ميفارگ بناته
نفرض وهانت فرگتك...جيب اليهون الشماته

اجن..وحدي كالت عندي اخيتي اتاني جيتي
اذكرت..شكد لعبت بحوش داري انه ورقيتي

كلمن يودي بناته..وجيب اليهون الشماته
ودمعتي اتبلل ارداني..ليلة ليلة احسب وتاني
________________________________
(٣)
لو تصير المغربيه...كل طفل وي اهله راجع
وانه وحدي اباب داري..اكسر الخاطر وباوع

اجو..يمي متعمدين باسو خد طفلهم
وردت..تجي يمي وبويه تحضني مثلهم

اذكر ايامك وادنگ...جنت اشبگك هسه ششبگ؟؟
ليش ضعنك ما خذاني..ليلة ليلة احسب وتاني
______________________________
(٤)
وتالي ارد لبيتي وحدي..ماكو ام وتلولي فوگي
وتعرض بعيني صوركم..وجيب اليبردلي شوگي

انام..بويه واتغطه برسايلكم واناشغ
أون..من اشوف امجانك بنص بيتي فارغ

طفله والتمن عليهه...وماكو ام وداري بيهه
ولا حضن لملم حناني..ليلة ليلة احسب وتاني
__________________________________
(٥)
وجانت دموعي رساله...وكاتبه بدمعي قصايد
بعد حضنك يالجلاله..كلشي مر بضلوعي بارد

حزن..دگت البيبان جانت كل فشلتي
اركضت..وما لگيتك وارجعت تالي بدمعتي

غيبتك يابوية تكبر..ولمرض لبروحي يكثر
حچه گلبي بگد لسّاني..ها اجاني ما اجاني

مصطفى صادق اللامي

#الليلة_الثالثه
#ثكيل_للعليلة_والمهدي

امنل غريب العايش الوحده بغربته
يسئل بمكتوبه عن احوال عمته
هم امتعبچ ليل الغربه..؟؟؟
و الفاگد شيّصبّر گلبه
__________________________
يا عمه تالي الليل من تنامين
هم مثلي بس بضعونهم تتحلمين..؟
گليلي شتسوين من تفزين !!!
اتحضنين بهدوم الاهل لو تبچين

ضايگ الغربة وشلة الحال
ابگلبچ شصار بيوم ما شال

يا غربتچ فاطمه تشبه غربتي
ووراث امن دموعج احزاني ودمعتي
الفارگ اهله يغمض صعبه
والفاگد شيصبر گلبه
_____________________________________
عمه انتي وودعيتهم وبستيهم
الا انه واگف بس اباوع ليهم
عطشوا وما اكدر اروح اسگيهم
شبت النار و محد يطفيهم

رّسم الله ضل عالكاع مطروح
وجه وگفه يا عمتي مذبوح

جان يلمع من وكع مثل المراية
وروس اهلچ للقصر راحن هدَاية
والكلشي اندل تيه دربه
والفاگد شيصبر گلبه
_________________________________
بدموعي افرش واكعد ابيباني
اااخ الدهر وي اهلي ما لماني
الوحداني يعرف غربة الوحداني
واثنينة خلص عمرنه انتاني

وبيا وكت وي أهلي التم
يا عمه حگي يحن تره الدم

ماكو اي مكتوب بي كلمة شلونك
وماكو مشتاگين يا مهدي لعيونك
والوحداني الليل يشربه
والفاگد شيصبر گلبه
_________________________________
لو شايفه ذيج الحبال شسون
اللاعبه وياهن شكد انجرن...!
ابنيات بيت بسوگ ما يندلن
أوادعهن يا عمه والغربه اهون

واهل الكهف سدو اذنهم
من صاحو بوجه النحبهم

صاحوا ابوجه الاطفال اصياح كافر
اصياح منه كزبرت حته الحوافر
والكون انلم لمت تربة
والفاگد شيصبر گلبه
_________________________________
شسويتي من رد الضعن يا عمتي
شحضرتي لملاگاه شما حضرتي
تركضين لوتمشين الهم رحتي
گالولي جربت ماي بيدچ شلتي

وگالولي عن الجربه طاحت
واللمه ذيج التسوه راحت

الخيل داست بالمكان الشمه (طه) طاهه
هاي موته الما تصح موته وراهه
راح الچان امعيشچ حُبه
الفاكد ناسه يغمض صعبه
____________________________________
#توفيقهم_ونعمتهم
مصطفى صادق اللامي ١٤٤٢

#ثگيل
#عشگ_حسيني

كل ليلة التمر كون انا يمكم
تسوه الدنيا يا كعدة صحنكم
شما ابعد اجيكم
انا اربات اديكم
تسوة الدنيا يا كعدة بصحنكم
@@@@@@@@@@@@@@@
مثل خيط تجره الابره //حسين يمك گوة جرني
شدت اعلوگ اعلحظره //هيچ اريدنك تشدني
انه جنت ال(هذا ياهو؟؟) //بخدمتك صرت شكبرني
لمن بشباچك اشبگ//بجفك اشعر چن شبگني

ليلة جمعه كون بصحن الحسين
ازور و بالبواچي تشبع العين
ومن ارفع اديه
احس ترد عليه
@@@@@@@@@@@@@@@@@
كون اردن طين يمك//وسوي روحي بمشتهاتك
من حلاتك يابو الاكبر//الرمح غص بلهاتك
السهام اعليك تركض//وأنته ما عايف صلاتك
تحن حته اعلل يذبحك//اصبع انطيته وعباتك

كون بصحنك احجيلك هذني
لو ما انته جا محد عرفني
واقرالك قصيده
بنص صحنك جديده
@@@@@@@@@@@@@@@@
ارد اجيلك ورقة بيضه//ابراحتك فوگاهه اكتب
حسين سهرني لحزنكم//الما سهر ما يعرف يحب
كون اجي وحبلي بدية//شما اوعدك ارجع اذنب
الناس تطمع كلت گلبك//لان گلبك حييل طيب

شما اذنب تگلي طايحه ابني
اتفضل يله بيتك هذا صحني
ايا روحي توبي
وابچي من ذنوبي
@@@@@@@@@@@@@@@@@@
انا اجيتك سبحه بيدك//لا اضيعن حيل كضني
مثل متلملم عباتك//هيچ اريدنك تلمني
گلبي اسود لابسلكم//چني هيل بگلبي حزني
اكبر و زنجيلي يكبر//عشره صاير ويه متني

كون اگبالك احچي ويه گبتك
صار براسي حض لمن عرفتك
من يوم العرفتك
صاحب صدگ شفتك
@@@@@@@@@@@@@@@@@
عالزياره امراكض اركض//بيه يعگوب و يحبكم
الزلمه ميحسبونه زلمه//اله من يمشي ابدربكم
شلون ينطيهن گلبهن//الاسهام اطب گلبكم
على جتاف حسين كاعد//و الله گمت احسد درعكم

هنيال السيوف ابين اديكم
انا اول عدل ميت عليكم
اموت امن اجفي عنكم
واعيشن يم گببكم
@@@@@@@@@@@@@@@@@
ياهو جاي امن الزياره//ابچي واشتم بثيابه
لا اخت عندي سبوهه//ولا طفل نام بخرابه
ولا غريب و اوحدي باقي//اولا بقيت ابلا گرابه
كون اموت انا وعمامي//من رقيه تگول بابه

سالم طولي بس طولك توذر
اعيشن ليش ويموت ابو الاكبر
كون الموته بيه
وروحي تضل سبيه

مصطفى صادق اللامي

#ثگيل
#عشگ_حسيني

عيشني حبك سيدي() خليني خادم من صدگ
بچيني تعبني بعد () دمع اليحب لذت العشگ
............................................................
حسين مسوي واهس لليخدمون
گلب الما يحبك ينبض شلون
الشوگ الما يذكرك شوگ جذاب
انته اول دموع اتونس العيون

خدمتك حچيي ابوي اگضيها بس صار
صغار و چنه نعشگ دور الانصار

خلي الگلب وي الخيم()اوياهن وقف خل يحترگ
بچيني تعبتي بعد () دمع اليحب لذة العشگ
.......................................................
شمحلاهه اناشغ و انا اصيحه
باطل كل غرام ابلا ضريحه
بكل كعداتي وادمنه تغثني
بس ابمجلسه الكعده مريحه

جان اسمي قبل هذا المنو؟؟ امنين؟؟
هسه شكبره اسمي خادم حسين

وانا وخدمتك سيدي()وكت الچفن بس نفترگ
بچيني تعبتي بعد () دمع اليحب لذة العشگ
......................................................
اول شمس ملمومه بحصيره
اگبال عيونك الدنيا زغيره
بسلفنه الما يحبك موش منه
نكسر عصته وتذبه العشيره

عدنه بهالسلف مولاي قانون
عشيرتنه تضل بس لليخدمون

عاشرنه غيرك سيدي()مولاي ما بيهم صدگ
بچيني تعبني بعد () دمع اليحب لذة العشگ
..............................................................
يكبر بيه حبك دمعه دمعه
بيك مسافر وما ريد رجعه
نبجي بالدعاء احنه ونذكرك
اذا جف يندعي ومبتور اصبعه

و تخنگنه الاطفال البزياره
من تضيع ابوها تضل حياره

نذكر رقيه امحيرة ()و من الله رأساً نختنگ
بچيني تعبتي بعد () دمع اليحب لذة العشگ
..............................................................
شما تكبر العين الفضل كحلة
وانا بثوبي الاسود صيتي كله
گلبي الما يحنلك كون اذبه
غمه الما يحن و يريد اهله

فاهي اليوم اذا ما بي مجالس
دور رسنه اضنن بي لعابس

ندور على المجلس مثل()طير ويدور عالعثگ
بچيني تعبتي بعد () دمع اليحب لذة العشگ

#مصطفى_صادق_اللامي

#للحسين
#فتحة_عزاء_او_شور

يا مولاي يا مولاي..يا مولاي يا مولاي
_________________________________
امن شوكت مجلسكم يأذي اليجيه
انته هم سامع بعش أذه الطيور

وادري (كل مجلس تحت گبة الحسين)
يعني هم الطم عليك وهم ازور

فاتحين اگلوبكم گبل الاذراع
انتو ما بيكم قصور احنه القصور

وشنهي نفعي ابلا سواد ولا عزاء
شنهي نفع الشجره اذا بين الگبور
____________________________
شما شفت دشداشتي السوده اختنگ
وبيش اقنع گلبي اذا اسكت البچن

اعيوني من اخر عزاا لليوم هاذ
هواي صبن جنهن ادلال الحسن

نفس وحشة عاشرك بعد الذبح
هيچ ضل وحشه ويبچينه الصحن

وياهو يسئل عني اگله انه (غريب)
لان جان المجلس لگلبي وطن
__________________________________
لان فارگنه عزائك متنه شوگ
جا شلون الفارگنك وانسبن

هواي يتلفت المضيع عزيز
شكثر گلي اتلفتن لمن مشن

استحي امن امي اذا ماكو عزاء
لان تبقة اتعاتب عيوني الغفن

فشلة الشيخ التخردل بالمضيف
هيچ فشلانين يا راعي الضعن
________________________________
انه خايف على المهدي لو يعود
مثل ضلت خنصرك يبقه وحيد

ومن بعيد نسالمه ونسئل عليه
نگله هذا اسلوب عيشتنه الجديد

وخايف يعاتبنه ويگلنه ليش
امن شوكت تغدر بالاسياد العبيد

هاي شدة وغربل وجيس الصواب
وخل يطيح الرمل ويضل الحديد
__________________________________
گالوا (أن شئت النجاة زر حسين)
واحنه وسط الشده عفنه ازيارتك

وسفه اهل (ياليتنا كنا معك)
البعض منهم ما اجوك بغربتك

أووصفه عدك (طب عشگ) لا ماتخيب
أنطين (اوجيهاتنه من تربتك)

وسيدي يحچون ليزورك يموت
گلت تسوه الموته اذا يم گبتك

مصطفى صادق اللامي