يا منكر اصبر خل يجي ليه الاحبه
آنه ادري بي ما يعتذر كلما اندبه
بس ما اصيحن يا علي بكل الشدد يحضر الي
كل ما اندبه

###########

يا منكر اريدن لحضه تسمعني
بعدها شما ردت يا منكر اسألني
مو وحدي اكف بالشده امهلني
محامي هناي عندي وهوه يكفلني

خليني اصيحن يا علي وبعينك تشوف
يحضرني بالشده الولي ويمدلي الاجفوف
همي تشوفه ينجلي بكل الشدد يحضر الي
كل ما اندبه

#############

بساعات الولاده الوالده تكلمه
ذبت بحبه بس ما رددت اسمه
وناغاني ابويه من صرت يمه
وبسماعي طبعها والدي الكلمه

علمني من ذاك المهد اندب يكرار
فهمني ما ابقه ابد بالشده محتار
لو همي شفته يعتلي بكل الشدد يحضر الي
كل ما اندبه

############

كل عمري اذكره واسمه بلساني
وحآشآه الاحبه بساعه ينساني
اصل ديني محبته وهوه ايماني
عدم آني وحيدر حبه أحيآني

لمن ازوره بالنجف افهم وجودي
لو دمعي يم كبره انذرف اضمن خلودي
واضح الي يصبح جلي بكل الشدد يحضر الي
كل ما اندبه

#############

وملك الموت يمي من حضر شفته
بذيج الساعه احضر يا علي اندبته
وابلمح البصر جاني الوصي اعرفته
ابشر يالمحب كال وأنه اسمعته

وما لمني كل ذاك الفضه من شفته موجود
ودومك صحت يالمرتضه افضالك اتزود
يا اغله من ناسي وهلي بكل الشدد يحضر الي
كل ما اندبه

##############

عالكوثر يمنكر بيده يزكيني
مهو الساقي وعذب مآيه يرويني
حآشآ بالحشر حاير يخليني
ومن هول القيامه حبه ينجيني

من يسمع بيوم الحشر يا حيدر انخيه
صك الشفاعه إيطلعه وابيده يمضيه
ويفهم مقامه عاذلي بكل الشدد يحضر الي
كل ما اندبه

#############

وعله ذاك الصراط ابيده ياخذني
مثل لمح البصر لمن يعبرني
ومن يوصل يمنكر قدري خبرني
وللجنه قسيم الجنه يدخلني

والهادي كله يا علي وبالندبه مذكور
جيراني انته وشيعتك منبركم النور
بالجنه وابقرب الولي بكل الشدد يحضر الي
كل ما اندبه




ابو سجاد التميمي