يبن جعفـــــر برجاك   بدموع الهم ننخاك

دعـــينه انظل بحماك

يالولي   يالولي

*

يهل دمـــع المآتم       على امصابك يكاظم

سجين وبالحبس تكضي العمر بين الهواشم

ارتفع صوت المواكب    قره الهاي المصايب

غريب ولا اهل يمــــــك يولي ولا كرايب

عمامك والله ابعاد       غريب انته ابغداد

وسف يبن الاجواد

يالولي   يالولي

* 


ارتفع حجي الظماير     صدح صوت الحناجر

تفجر مدمع الاهـــــب يفور امن المحاجر

تذكرنه مصـــــــــابك     سجين ابنص عذابك

يطول جم سنه وشجم حبس وسفه غيابك

الخبر من عندك ضاع       الحبس كالو بالكاع

ضكت مر الاوضاع

يالولي  يالولي

*

يمن جبدك تسمم           جمر ضاك وتثلم

حضرنه بمأتمك يابو الرضا والنيه تعلم

يباب امن العطايه           سند عدنه وروايه

يراهب منزلة حبك قرب رب البرايه

صرت باب الحاجات      ابد متــــــــرد طلبات

النخاك بكل شــدات

يالولي   يالولي

*

كلبنه بجمره لاهج        شكثر عدنه حوائج

ابد متخيب الكاصد الك ندري النتايج

وحك هاي القصائد      انحنى ظهر الشدايد

تعبنه يالولي مانحتمل تدري انته شاهد

الأمل والمــــنقذ غاب      الكَلب ممرود وشاب

هلك صـــبر الاحباب

يالولي  يالولي

*

اشكثر ناس الدعونه      بحوائجهم رجونه

نسألك بالدعا خــــــــدام الك من كلفونه

المرض والحاجه عنده        الشفه مـــنك  يوده

البلاء وكل المرض عن هالبلد ندعي تبعده

يمن عمك عباس     ابد متخيب الناس

سخي وجاسب نوماس

يالولي  يالولي

*


أبو علي الركابي