حرمة وامشي ويه الضعن خلوني
بعد عينك بس شمر بعيوني
~~~~~~~~
بعد عينك خوية ما صحلي نظر
مره اموت عليك مره من القهر
شلون اشوفك وانته مرمي عله النهر
وسهم جودك بي يخي اذوني
~~~~~~~~~
سهم جودك خويه بي شفت الالم
وشفت هم جفينك وطايح علم
خويه وعيونك نبت بيها السهم
ريت ياخويه السهم بعيوني
~~~~~~~~~~
كون بعيوني السهام ولا اشوف
هالعيال من الرعب مليانه خوف
كوم يا عباس دارت ها لألوف
عالخيام وشوف طك امتوني
~~~~~~~~~~
شرد اسولف والدمع اكبر جواب
والله شيب كلبي من هذا المصاب
خويه سحكو صدر اخوك اعله التراب
وبحوافر خيلهم سحكوني
~~~~~~~
فوك كل هذا الجره ودمعي اليصب
جتفونه خويه و بعيد الدرب
وهذا يشتم ذاك كاضيها ضرب
ريت حاضر خويه من ضربوني
~~~~~~~
شرد اسولف والدمع اكبر دليل
اطفال وخيام وحرم نار وعويل
كلها صاحت عمه جا وين الكفيل
وعكبك باسمي العده صاحوني
~~~~~~~~
اه صاحوني العده بأسمي وطحت
ويم ابو السجاد بدموعي رحـت
ريت موتي ولا اشوف اللي شفت
وحدي مابين الزلم خلوني

#سيد_محسن_الجابري