الشاعر نعيم ابوباقر الساعدي

يا مظلوم يا مظلوم خدامك التمينه
ـــــــــــــــــــــــــــــــ
ليلة وداع الليله متروسه احزان هالليلة اخر ليلة ويه الوليان
باچر نحور امذبحه اعلى التربان باچر بعد ماكو كفيل وخوان
بس هالليل بس هالليل وابن النبي مودعينه
ــــــــــــــــــــــــــــــــــــ
هالليلة زينب ودعتها اخوتها ضلت بعد ما تنمسح دمعتها
يا محنه گلي الشابهت محنتها بالنار باچر تستعر خيمتها
لا خوان لا خوان ياهو الذي يحامينه
ــــــــــــــــــــــــــــــــــ
ويلي اعلى الاكبر گامو يودعونه نور النبي البيه چانو يشوفونه
واحسين غرگت بالدموع اعيونه ساعه ويشوفه امطبر يجيبونه
گلب احسين گلب احسين بالاكبر مصوبينه
ـــــــــــــــــــــــــــــــــــ
حتى الاطفال امن العطش ذبلانه عبد الله يابس خشبه صار السانه
رايد له ماي لچبدته العطشانه ايذبحونه ما عدهم رحم عدوانه
وا ويلاه وا ويلاه عبد الله ما ساگينه
ـــــــــــــــــــــــــــــــــــــــــ








(عاشر محرم)
يا مظلوم يا مظلوم خدامك التمينه
ـــــــــــــــــــــــــــــــــــــــــ
يا لوعه العاشر مصابه اشكبره للموت ضلت ما طفت هالجمره
فوك التراب احسين ذبحو نحره والخيل تسحگ بالحوافر صدره
نحره ايفيض نحره يفيض فوگ الثره امخلينه
ـــــــــــــــــــــــــــــــــــــــــــ
معروفه كل ميت هله ايدفنونه شفنه بدفنته المسلم ايكرمونه
ما شفنه ميت وادم ايسحگونه باگو الخاتم خنصره ايگطعونه
يا مذبوح يا مذبوح بالمعركه امسلبينه
ــــــــــــــــــــــــــــــــــــــــــــــــ
هاليوم چبده فاطمه صابوها واخيام جدك بالحقد حرگوها
هاي القرابه امن النبي نكروها واطفال ترضع بالسحگ مردوها
مو اسلام مو اسلام ابن النبي امگطعينه
ــــــــــــــــــــــــــــــــــــــــــــ
صارت اخيامه ابكل حقد محروگه ونسوانه راحت للسبي مشبوگه
بعبرتها زينب من مشت مخنوگه للشام طبت يالرسول وسوگه
فوك ارماح فوك ارماح راس ابنك امخلينه

يا مظلوم يا مظلوم خدامك التمينه
ــــــــــــــــــــــــــــ
بخامس جرح مسلم نريد انذكره اول شراره انطلقت لها الثوره
لابن الرسول الهادي ضحه بنحره مسلم غيور لدينه ناذر عمره
مسلم صار مسلم صار من ثورته يغذينه
ــــــــــــــــــــــــــــــــ
وصلت كتب لحسين من الكوفه هاي الجيوش لجيتك مصفوفه
مسلم سفير وغايته معروفه يدري المهمه بكل خطر محفوفه
اصبح نور اصبح نور عالمكرمه يدلينه
ــــــــــــــــــــــــــــــــــ
مسلم فضحها الوادم الغداره مو زلمه كلمن يغدر بخطاره مات الجبان وما تنفعه اعذار الخان النبي يا دمعه تغسل عاره
هالافكار هالافكار لدرب الشرف تهدينه
ـــــــــــــــــــــــــــــــــــ
من ضل غريب ولا اهل يحمونه تيه طريقه ورفضوا يدلونه
بس طوعه وفت للنبي ممنونه تعادل شوارب مو طبعها تخونه
موقف هاذ موقف هاذ من طوعه عايش بينه

( سادس محرم)

يا مظلوم يا مظلوم خدامك التمينه
ـــــــــــــــــــــــــــــــــ
انصارك ابنفسه النبي اختاراهم انصار ابو الاكبر علي سماهم
رب العباد الكربله ضماهم قدوتنه صارو كل زمن تلگاهم
هالانصار هالانصار صوب الفخر تحدينه
ـــــــــــــــــــــــــــــــــــــــ
انصار ابو اليمه ونعم من عدهم طالع حبيب الها الشرف قائدهم
يركض على الموت بعشك واحدهم دم النحور ابكربله شاهدهم
للاحرار للاحرار صارو منار وزينه
ــــــــــــــــــــــــــــــــــــ
طلگ زهير الدنيا واختار الدين ترخص حياته الغالي من دون حسين
جون بخلوده اتخلد اويه الطيبين واشگد عوابس بالعشك مجنونين
اه يا حسين اه يا حسين جرحك يضل يچوينه
ـــــــــــــــــــــــــــــــــ
حيا الله لمتهم وفو هالانصار هالوگفه كل يوم الدهر بيها احتار
انصار ابو اليمه ومثلهم ما صار صارو مناره ابكل زمن للاحرار
صارو نور صارو نور صوب الفخر يهدينه







( سابع محرم)
يا مظلوم يا مظلوم خدامك التمينه
ـــــــــــــــــــــــــــــــــ
سابع جرح ضل يلهب وچوّانه للموت تبقى وما طفت نيرانه من ضل وحيد احسين ضد عدوانه مذبوحه ولده وصحبته وخوانه
يا عباس يا عباس للمشرعه اتصد عينه
ــــــــــــــــــــــــــــــــــــــ
عباس يسمع باذنه اطفال اهواي يا عمي متنه امن العطش وين الماي
ساقي العطاشه ودومه جودك رواي واسكينه صاحت هالعطش فت احشاي
يا بو الجود يا بو الجود من جربتك روينه
ــــــــــــــــــــــــــــــــــــ
يستاذن من حسين واحسين ايشوف درب الشريعه امعسكر اتحرسه اسيوف
ويعلم بابو فاضل شجاع ومعروف بس خوفه يم المشرعه اتطيح اچفوف
خاف احسين خاف احسين عالكافل وچفينه
ــــــــــــــــــــــــــــــــــــــــ
لمن سمع صوته يا خويه ادركني غدروني خويه اعلى الشريعه الحگني
خليني اودعك يالغريب اشبگني وصل سلامي لزينب وتعذرني
اعلى الاطفال اعلى الاطفال سلملي يابو سكينه

(ثامن محرم)

يا مظلوم يا مظلوم خدامك التمينه
ـــــــــــــــــــــــــــــــــــــ
زفة منايه بدمعه بوشناها وحنة شاب بحرگه سويناها
هاي الصواني بحسره زيناها وام جاسم اويانه تون شفانها
يا عريس يا عريس عرسك جرح ياذينه
ـــــــــــــــــــــــــــــــــــــــ
يتمنه كل شاب اخوته ايزفونه يشوف اصدقائه ابرفرحته يهنونه
بس جاسم بدم منحره يحنونه عريس ما شاف الفرح بعيونه
بالنبلات بالنبلات يا فاطمه مصوبينه
ـــــــــــــــــــــــــــــــــ
حلم الشباب بدنيته يتهنه ربعه وعمامه بزفته يتمنه
عاف العرس جاسم ودمه الحنه والزهره سوت زفته بالجنة
واهل البيت اهل البيت بالجنة متلگينه
ــــــــــــــــــــــــــــــ
لمن وصل له احسين شافه اشحاله بالطف تبدت هالشباب اماله
فوگ التراب اتعفر امن ارماله بذيچ السيوف اتولته الخياله
يبچي احسين يبچي احسين رد ودمعته بعينه

( تاسع محرم)

فتحة عزاء ايام محرم من اليوم الاول الى اليوم العاشر

( اول محرم)

يا مظلوم يا مظلوم خدامك التمينه
ـــــــــــــــــــــــــ
شهر المحرم من يهل اهلاله يا دمعة المهدي التضل هماله
يتذكر الصار وجره اعلى عياله مذبوح جده وفرهدوها ارحاله
يامعبود يا معبود عجل فرج مهدينه
ـــــــــــــــــــــــــــــــــــ
نرفع تعازينا بدمع هالليلة كل خادم اويه المهدي دمعه يسيله
نرفعها ادينا وبالفرج ندعيله جرح الطفوف بگلبه هادم حيله
لهذا الصار لهذا الصار المهدي الله يعينه
ــــــــــــــــــــــــــــــــــــــ
گلب الموالي بها المصايب غيم نلبس سواد بها المواكب نلتم
والماحضر هاي المجالس يندم كلمن يواسي ابآجره الله اليعلم
هالدمعات هالدمعات بالمحشر اتنجينه
ــــــــــــــــــــــــــــــــــــــــ
لحسين ضلت بالكلب هالجمره وهنياله كلمن يخدم ابن الزهره
والينقبل عند الله حضه شكبره لمن يموت احسين يحضر كبره
صحنه بصوت صحنه بصوت يا فاطمه سجلينه
ــــــــــــــــــــــــــــــــــــــــــــ

( ثاني محرم )

يا مظلوم يا مظلوم خدامك التمينه
ـــــــــــــــــــــــــــــــــــ
منّ المدينه احسين طالع ضعنه لارض العراق ابن الرسول اتعنه
ذيچ الرسايل ندري ما خدعنه بس عيشة بالذل چان ما يتمنه
للطف جاي للطف جاي طالع يضحيه لدينه
ـــــــــــــــــــــــــــــــــــ
ما جاي طالب دنيه لمن طالع راد الصلاح وبالحكم ما طامع
گال لزيد ابذله لا ما ابايع ابن النبي امن اصبع محمد راضع
هالافكار ها الافكار ابن النبي يراوينه
ـــــــــــــــــــــــــــــــ
من شاهد الحاكم فسد واتعده تنشر فساد الدوله بامه جده
ابن الرسول بنحره ضل يتحده معناها كل حاكم يجور انرده
راد حسين راد احسين من موقفه ايوعينه
ـــــــــــــــــــــــــــــــــــ
منهج فداء ابكل عقل ضل صرحه ما همه جسمه الينسحگ لا ذبحه
مهما يطول الليل يطلع صبحه وكل من يتاجر بالحسين انفضحه
عاهدناه عاهدناه واعلى العهد ضلينه
ــــــــــــــــــــــــــــــــــــــــــــــــــــــــــــ
( ثالث محرم )

يا مظلوم يا مظلوم خدامك التمينه
ـــــــــــــــــــــــــــــ
حمل اضعونه حسين للطف ايروح شاف العليلة تسيل دمعتها اجروح
يمسح دمعها اتشابگو روح وروح شبگة واداع وچنه باجر مذبوح
لا تبطون لا تبطون شافت دمعته بعينه
ـــــــــــــــــــــــــــــــــ
راح الضعن هاذا السفر ياذيها وگفت تودعه اتاشر بايديها
فوگ المرض هذا البعد يچويها بس الدموع ابفرگته اتسليها
الله وياك الله وياك رد النه يا والينه
ــــــــــــــــــــــــــــــــ
عايف عليلة وبالضعن طالع وين ماخذ گلبه الليلة صوبها البين
من ودعتهم تجوي دمعتها العين ضلت تعاين عالدرب بنت حسين
لبنت احسين لبنت حسين هالموقف ايبچينه
ـــــــــــــــــــــــــــــــــــ
ضلت تعاين ما خذوها وياهم ضلت وحيده وعاشت بذكراهم
كل ليلة ضلت فاطمه تنعاهم راحو اهلها ويا گلب ينساهم
واحنه وياچ احنه وياچ يا فاطمه ونّينه
ـــــــــــــــــــــــــــــــــــ


( رابع محرم)

يا مظلوم يا مظلوم خدامك التمينه
ــــــــــــــــــــــــــــــــــــــــــ
اويه ام البنين الدمعه خل نجريها بدمعتنه هاي ام الوفه نوافيها
الليلة بمصاب ابن النبي نواسيها باب الحوائج ربك امسويها
يا ام عباس يا ام عباس واليخدم اتعرفينه
ــــــــــــــــــــــــــــــــ
اربع ولد قدمتي وانتي الحره گلتي اربعتهم فدوه لابن الزهره
انه ادري تنطين الولد لو عشره وفيتي يا منبع وفه وما امقصره
لا جل احسين لاجل احسين كل غالي اتقدمينه
ـــــــــــــــــــــــــــــــــ
ودعتي روحچ ويه ضعنهم من راح اخذوني اخدم بالضعن گلبج صاح
واشگد وراهم من مشو دمعچ طاح والفارگ ابن الزهره بيمن يرتاح
ودعتيه ودعتيه وما يرجع اتعرفينه
ـــــــــــــــــــــــــــــــــــــ
وصيتي ولدچ لحظه ما يعوفونه بعيونهم شمعة علي ايخلونه
وبكربله ايموتون كلهم دونه والزهره تشكر موقفچ ممنونه
للعباس للعباس واتطالب بچفينه
ــــــــــــــــــــــــــــــــ
(خامس محرم)

👇👇👇👇فتحة عزاء عشر ليالي محرم👇👇👇👇

چنها صدك صارت دنيا وعلي دارت
غسلوني وجفنوني للغربه ودوني
**************
الدنيا واقع افتراضي وعالم البرزخ حقيقه
البشر مغرور بحياته اهناك يتحدد طريقه
غربه وابن ادم وحيد لا اخوه ولا صديقه
هناك الوضع ما ينوصف- بالموت كلشي يختلف- من الخوف كلبي يرتجف
وضع ما نكدر نطيقه
وحدي صرت حيران لا اهلي لا خوان
ضيعوني ما اجوني احبابي عافوني
غسلوني وجفنوني للغربه ودوني
**************
رؤية بس جانت حقيقه ومو خيال المر عليه
شفت روحي اشلون طلعت هاي ساعتها المنية
وبالمغيسل مددوني وكامو ايغسلون بيه
ولدي وبناتي اتيتمن – وياهن ادموعي جرن- وانوب لفوني بجفن
انختم عمري بها الرزيه
وانطوني جن مكتوب متروس كله اذنوب
جهزوني وحضروني عالقبله خلوني
غسلوني وجفنوني للغربه ودوني
**************
شالوا جنازتي وصاحو يابشر ابروه الذمه
فلان راح الرحمة الله بساع صار الله يرحمه
شاهدت دفان يحفر كبر صاير نكره ظلمه
نزلو جسمي بهالكبر- حسيت جسمي ينعصر- وانطبكت اعظام الصدر
وكبري بترابه يطمه
واثنين اجو يردون عن ديني ايسألون
كعدوني وخوفوني عن ديني سألوني
غسلوني وجفنوني للغربه ودوني
**************
كامو ايسألون بيه وعددو كل المظالم
خايف ما ادري شاحجي شفت نور لكبري قادم
صاح اتركوه هذا يمي بدنيته جان الي خادم
يا حسين من كلبي صحت- بذيالك انه جلبت- للدنيا رجعني ردت
احجي هالقصه للوادم
رد روحي يا مظلوم حتى اتعض كل يوم
رجعوني وفززوني من نومي صحوني
غسلوني وجفنوني للغربه ودوني
**************
سفرتي العالم البرزخ شاهدت بيها العجايب
ما يصورها الخيال ويعجز ايوصفها كاتب
غربه بالمعنى الحقيقي وشفت بيها اشكد مصايب
مخنوك ما اشتم نفس- والساني الباشط خرس- جن واحد بنكره انحبس
لا اخوتي ولا كرايب
ابن ادم يروح وياه كل معصيه بدنياه
حذروني ونبهوني بالخدمه وصوني
غسلوني وجفنوني للغربه ودوني
**************
نعيم أبو باقر الساعدي

مكشوفه اهداف الي عندك
ما رايد سلطان طالع تحييها امة جدك
واصلاح الانسان
ما متستر باسم الدين طالع لاحياء الميتين
واصلاح الانسان
ــــــــــــــــــــــــــــــــ
البشر مو ثوبة اليقيمة اتعرفه انسان بضميره
يصير أدنى امن البهايم كل بشر ما عنده غيره
اشكد يريد ايعيش واحد لجن تاليته بحفيره
واحسين رادوه اشكثر- يبايع يزيد ابن القذر-
والنزلت ابحقه الفجر
ايصير هالفاسق اميره
رادوه ايبايع دنياهم وايعوف القران
ما رادوه ايصير اوياهم رادو بس عنوان
وهوه ابن الساده الطيبين طالع لاحياء الميتين
واصلاح الانسان
ــــــــــــــــــــــــــــــــــــــ
حسين مدسة الاحرار ويرسب الما حفظ درسه
اليدعي الايمان كال حسين خل يبدأ بنفسه
هذا درب العزه موت ومولعب لو سفر ونسه
واحسين ضحاله الرگب- لا ظلم ناس ولا سلب- وابسجل تاريخه انكتب
ابكربله الها اليوم شمسه
واليوم انشوف اشجم واحد يحجي اعلى الايمان
بالظاهر قديس وزاهد والباطن شيطان
وجم واحد بيه مصدكين طالع لاحياء الميتين
واصلاح الانسان
ـــــــــــــــــــــــــــــــــــــــــــ
هذا درب احسين واضح بس صعب شفنه اتباعه
يرفض ايصير التطور بالعري وفن الخلاعه
ما يريد احزاب دين وكل حزب عنده جماعه
راد التطور بالقلم- مو تنكر الناس القيم – مفهوم والي ما فهم
طاح واتيقن ضياعه
يطور صاير واحدنه من اشوف البلدان
بس بالذل الهم قلدنه لا حق لا عمران
واحسين ينادي بكل حين طالع لاحياء الميتين
واصلاح الانسان
ـــــــــــــــــــــــــــــــــــــــ
بشر تعبد بشر كامت كل حزب معصوم عنده
كافر ومهدور دمه ابجلمه لو واحد تعده
صرنه احزاب وطرائق وللعدو ما بينه هده
كل قائمة وعدهم ولي - كلمن يكول الحق الي –
وكلهم يرجعون العلي
بله هاي اشلون شده
كل واحد جاي ايقشمرنه ونتبع ياهو الجان
سوونه احزاب اتطشرنه واصبحنه العدوان
للينطي افلوس امصفكين طالع لاحياء الميتين
واصلاح الانسان
ــــــــــــــــــــــــــــــــــ
من طلع بذرة محمد جانت اهدافه جليلة
ما طلع حتى احنه اوياه بس مدمع نسيله
وانه ادري ادموع عينك هاي بالمحشر ثكيله
راد ابكثر لطم الصدر- من ثورته ناخذ فكر – نتنور وناخذ اجر
وهاي ما اضنها قليلة
كون الحق عالباطل نفرز والدين الميزان
ولو نمشي بها المنهج نحرز نعبرها النيران
بحسين انضل متيقنين طالع لاحياء الميتين
واصلاح الانسان

(منبرية گعده)

(منبرية کعده لیله الهلال)

يا هلال من هليت هلت مدامعنه
والنايبة ابكل بيت تلچم مواجعنه
نرفع سواد اعلام وننتظرك ابكل عام
تلچم مواجعنه
ـــــــــــــــــــــــــ
ابكل سنة امن اتهل علينه اتسيل وياك المدامع
ما عتگ جرحك جديد وتنزف ابكل عام راجع
كل سنه امن ايهل محرم جايب اجروح ومواجع
لو هل هلالك ننجمع ننصب مجالس للدمع
بس بيه باچر نتفع
هالدمع بيه المنافع
بالكون من شفناك هاليلية تفجعنه
بالحسرة نتلكاك تلچم مواجعنه
ردت علينه ايام وننتظرك ابكل عام
تلچم مواجعنه
ـــــــــــــــــــــــــ
اه يا هلال الدموع وصارت اجروحك چثيره
بيك شفت انصار وفو وهاي وگفتهم چبيره
وانكسر ظهر الاحسين امن انذبح شيخ العشيره
طيحة حبيب الاذته دمعات يهمل خلته
هذا اليوافي بصحبته
وصار ابو السجاد اميره
اهل الوفه الخيرين بالحب مراجعنه
بس طيحة الطيبين تلچم مواجعنه
لابن الرسول اشضام وننتظرك ابكل عام
تلچم مواجعنه
ــــــــــــــــــــــــــ
يا نهر نبعك مصاب وراسية اجروح بضفافه
شفنه بيك اسيوف صلفه وتذبح انحور الترافه
للحرب عريس طالع عايف الدنيا وزفافه
مصيوب بالحومه وگع تعناه عمه من سمع
متطبر وبالدم نگع
ايساعده الله اشلون شافه
يا حسين نا ديناك هالصرخه تسمعنه
لمن وگفت اهناك تلچم مواجعنه
اه يا فرح ما دام وننتظرك ابكل عام
تلچم مواجعنه
ــــــــــــــــــــــــــــ
بعد يا اهلال المصيبه اشبيك من ضيم ومصايب
يا محرم سولف النه ابكربلا اشصارت عجايب
من طلع للموت الاكبر جبد ابوه حسين ذايب
شاب وابوه اتشابگو ابفيض المدامع غرگّو
بالموت وسفه اتفارگو
اخدودهم فوگ الترايب
من گام دمعه ايسيل صارت فواجعنه
يا جرح بينه اتعيل تلچم مواجعنه
للاكبر وجسام ننتظرك ابكل عام
تلچم مواجعنه
ـــــــــــــــــــــــــــ
ويا مصيبتنه الچبيره وهالجرح بيمن نضمده
طاح ابو فاضل خجول وهاي يعني احسين وحده
بيمن ايهد ابو الاكبر لا ولد لا اخو العنده
وايدير عينه اعلى النهر من طاح عباس الگمر
لوحيدته وظهره انكسر
امذبحين اگباله ولده
هاي المصيبه اهواي يا حسين توجعنه
يا طيحة الوفاي تلچم مواجعنه
يا شهر كله الام وننتظرك ابكل عام
تلچم مواجعنه

❤️❤️❤️❤️

يمه لاتوصيني ما اعوف احسيني
انه وصاني الحسن بالعرس البس جفن
ما اعوف احسيني
******************
انه من نوره الحسن غذاني عالكرامه امن الزغر رباني
اذكر وانه طفل وصاني وادري ابوي الكربله ضماني
بالطفوف احلامي كون اموتن ضامي
زفه واشموعي ضون بالعرس البس جفن
ما اعوف احسيني
******************
عمري دون احسين لا ما اريده هذا نور الله وثبت تأييده
المثلي انه بالمعارك عيده خل يزفني للمنايه بايده
هالوعد وفيته بدمي ما جازيته
وانه الامقصر اضن بالعرس البس جفن ما اعوف احسيني
**************************
اليوم ادفن بالطفوف امالي تروح فدوه الروح عمي الغالي
بالمعارك والذبح ما ابالي جيشهم ما يسوى تك انعالي
موت اضل اسكيهم حيدر امراويهم
اليوم ضد اهل الفتن بالعرس البس جفن ما اعوف احسيني
***************************
شفته وحده ابكربله بلا ناصر ضل وحيد وحاله يكسر خاطر
وحده بثلاثين الف متحاصر يا كلب يا يمه يبقه مصابر
شفته وحده ينادي سهم صاب افادي
لاجله صرخاتي علن بالعرس البس جفن ما اعوف احسيني
**********************
انه راضع بالحرب وافنونها والوصيه امن الحسن ما اخونها
شفت عمتي والدمع بعيونها خاف يمه امن انذبح يسبونها
يمه اوكفي دونها خايف ايطكونها
جروحي من دمي رون بالعرس البس جفن ما اعوف حسيني

ناس تردم ناس من طلع عباس
****************************
جاي يترس ماي لاهله وما مصمم للحرب ايصير بالطف حشر الاكبر ابو فاضل من يطب لو امقرر للقتال الدنيا يكلبها كلب بس اخذ جم روح بيده وهو ماشي بالدرب
ناس تسحك ناس من طلع عباس
****************************
شافوا لرايه ترفرف بيده والجيش انخلس والشمر رجليه بادن يرجف وحلكه يبس
هذا ابو فاضل يعرفه ابمدرسه حيدر درس والوصل يمه منيته ايشمره من فوك الفرس
قابض الانفاس من طلع عباس
**************************
ناس من الخوف ماتت ناس ماتت بالسحك كلمن ايخززه ابو فاضل هذا احسبه مختنك
قائد الجيش الجبير اتخربط وكلبه يدك صاح هذا الموت اجاكم والحرب صارت صدك
راس طك ابراس من طلع عباس
*************************
سيف ابو فاضل كلبها الميمنه اعلى الميسره قاده الجيش ابوضعها اهناك ضلت حايره
ناس بس الجثث ضلت ناس اجتها امطبره قسم عرائيل كالو قسم كالو حيدره
دوخ الارجاس من طلع عباس
***********************
منين ما شردو يجيهم جنه ملك الموت اضن من المخيم للشريعه اشكثر روس اتكطعن
والاعيون ابيوم شافن ابو فاضل دمعن صاح وين الزلمه بيكم ماكو اصوات اختفن
ضلو بوهواس من طلع عباس
***********************
طالع ايجيب الشريعه وللحرب ما معتني هذا راسه الدوم عالي وبالحرب ما ينحني صار ملك الموت سيفه امن الطبر ما ينثني صاح لاجل احسين والله اليوم افنيكم فني
والشرد ينداس من طلع عباس
********************
هذا عباس الغيور وبا الامنازل موسهل خله بالعداوان خوفه وسيفه ساحلهم سحل
ما يهمه اجيوش كثره مجهزه اسيوف ونبل مثل بيه الناس تضرب هذا ابو فاضل يضل
شايل الاحساس من طلع عباس

مسلم علي بيه يفتخر
شامخ بقه وين القصر
حي الله ابو طاهر حي الله ابو طاهر
**************************
اول شرارة وما طفت للمحشر وكلمن يخون الزهره لازم يخسر
مسلم فدائي و الحكم ما دور لابس كــــلب ضل للذبح يتحضر
كبال العدو ما منكسر
شامخ بقه وين القصر
حي الله ابو طاهر حي الله ابو طاهر
*****************
كـــلمن ركض عالدنيا لازم يفحط والخاين ابصف الزلم ما ينحط
الخان الرسول افتوكه ما تتخيط شيخلصه كلمن وي علي يتورط
ما ينثني لاهل الغدر شامخ بقه وين القصر
حي الله ابو طاهر حي الله ابو طاهر
***************************************
كلمن يخون ابصاحبه ما بيه حظ والصاحب بها الدنيا ما يتعوض
ومسلم غيور ابذله لا ما غمض وارث علي وجان بزلم يتمضمض
بعلو السمه من ينذكر
شامخ بقه وين القصر
حي الله ابو طاهر حي الله ابو طاهر
***************************************
موكل شي لونه اصفر ذهب من يلمع ولا كل اخو بيوم الشدايد يفزع
طبع النجم كـــــلما على يتشعشع هذا الدرس من مسلم وخل واسمع
هذا الدرس شوف النصر
شامخ بقه وين القصر
حي الله ابو طاهر حي الله ابو طاهر
***************************************
صح مسلم بذاك الوكت ما يندل بس يبقه طبعه الحيدري و ما ينذل
من حاصروه اتوقعو يتخردل ابغير النصر شبلك علي ما يقبل
ما جتفوه بس بالغدر
شامخ بقه وين القصر
حي الله ابو طاهر حي الله ابو طاهر
***************************************

يا مالك اكلوب بهواك اقبلني يا سيدي مو طبعك اتفشلني
يا بو رقيه ابدفترك سجلني يل خدمتك ضل جبريل بيها اشكثر يتباها
**************
كلمن تقبله اويه الخدم هنياله وانته الرسول بدمعته ينعاله
كلمن يخدمك تنقبل اعماله هاي الكرامات اهواي ربك الك خلاها
***************
مخصوصه من الله الفضل خلالك باجر تعرفه البا العزى يقرالك
يا حسين اجيت وجلبت بذيالك اعمالي باجر يا حسين انته الي تتولاها
******************
يا حسين تجويني بجمرها ايامك ما تطفه نار الي دوت بخيام
وامن السحك مرضوضه كلها عظامك راحن خواتك للشام يا هو الذي يرعاها
******************
من زغري عيني اعلى الدمع مفطومه دمعاتي لاجل امصيبتك مضمومه واجروحي بمصابك تضل ملجومه كل ما يهل شهر النوح جرحك جمر جواها
*******************
الطم اضل لمصيبتك يا الضامي تجويني جمره النحرك الضل دامي واتمنى انه الكسروها اعضامي يا سيدي السووه بيك محد كبل سواها

هالايام تجري بيها دمعتج والاعلام تنرفع لمصيبتج
معزين صاحو احنه بخدمتج يا فاطمه
************************
من يهل اهلال حزنج ها لدمع يتلاله دمعه لاجل احسين ضلت للحشر هماله
نحره مذبوح وغريب وسلبوها عياله والشمر بحبال كام ايشد ادين اطفاله
والادموع اليوم فاضت عالجفن والاضلوع خلها تلطم بالحزن
والاعيون كون تعمه المحنتج يا فاطمه
*************************
من يهل شهر المحرم تجري دمعة عيني وين ما عد الله مجلس فاطمه تلكيني
بدفتر الخدام رايد فاطمه اتسجليني بالكبر يوم المنيه رايد اتحضريني
تعنيت يجري دمع اعيوني تمنيت بموتتي اتحضروني
بالاحساب لايذ انه ابخيمتج يا فاطمه
*********************
انه من يكرب محرم صار دمعي يلالي للمصيبه اهدوم سوده لبستها اعيالي علكت بيرغ مناحه والله يدري بحالي رحمة الله بها المجالس بيها اربي اطفالي
والاعيال للمصيبه تنهظم والاطفال علمتها اعلى اللطم
والاصدور تنلطم وي لطمتج يا فاطمه
**********************
كالو المجلس تجينه ودمعتج بعيونج رايده بهاي المصيبه فاطمه يواسونج
وانتي تتشكرين منهم رادو يعزونج بدفترالخدام سجلي كل الايخدمونج
بالاعمال هاي اعظم مكرمه يا هنيال من تسجل فاطمه
كرامات هواي شفنه بوكفتج يا فاطمه
**************************
لابنج العقدو مجالس فاطمة اتعرفينهم شاعر وشيخ وخطيب اعتقد ما تنسينهم حتى الايوزعون ماي ابمجلسه تسجلينهم باجر بيوم القيامه الواسو اتوفينهم
والاكبور ظلمه ما بيها شمع يضل نور يالموالي هالدمع
والافضال هاي كلها بنظرتج يا فاطمه
****************************
نعيم ابو باقر الساعدي

👇👇فزاعيات👇👇

يم بابج ايجدي الوفه خجلان اديه امجتفه
يا ام البنين يا ام البنين
ـــــــــــــــــــــــ
وي الله نيتج صافيه وهل شرفج اتخدمين بيت ال الرسول ايكلفج
واختارج الكرار اصيله ويعرفج
محد كدر بالطف يقلد موقفج
حتى الكرم نوره انطفه خجلان اديه امجتفه
يا ام البنين يا ام البنين
ـــــــــــــــــــــــ
عشت بحياتج وي علي ومتيقنه جنتي بقضاء الله بيقينج مؤمنه
اصل الوفه ابابج سجد لج وانحنه
من شافج الوجه الله قدمتي الضنه
هذا الكرم ما شايفه خجلان اديه امجتفه
يا ام البنين يا ام البنين
ـــــــــــــــــــــــ
عد الله هالموقف جبير ومو سهل ماكو مره اتضحي بولد لابن الرجل
والزهره توكف باجر اترد بالمثل واتجيب اديك امكطعه يابو الفضل
تشعر وفائك ما كفه
خجلان اديه امجتفه
يا ام البنين يا ام البنين
ـــــــــــــــــــــــ
قربانج الله امن السماء متقلبه وبالدنية خلالج كرامه ومنزله
والطايح ابشده ويصير بمشكله بالفاتحه ام البنين اتحلها اله
والشاف فضلج يعرفه
خجلان اديه امجتفه
يا ام البنين يا ام البنين
ـــــــــــــــــــــــ
من طب ابن حذلم نعى وجاب الخبر لمن سمعتي بصيحته جدمج عثر
ما همج العباس طايح عالنهر صابج الكال احسين محزوز النحر
والناعي حاير موقفه خجلان اديه امجتفه
يا ام البنين يا ام البنين
ـــــــ نعيم ابو باقر الساعدي ــــــــــ

مسلم قائد مو مثل القادات
واكبر شاهد ضل خالد ما مات
قاد الثوره ويشهد كبره
ضل خالد ما مات
ـــــــــــــــــــــــــــــــــــــ
من انورق صفحات الطف نتعلم من عدها ادروس قران اتخلد بالمنحر اسرار وجوهر متروس
بيه تلكه الوفو للزهره وصارو للافلاك شموس واتشاهد بيه ناس انخدعت غروها بمنصب وفلوس
من اتطالع ركز بالطف زين
شوف الطامع وينه اوين احسين
لمن تقره ويشهد كبره
ضل خالد ما مات
ـــــــــــــــــــــــــــــــــــــــ
وحي المنحر لمن ينزل يتخلد بيه القران
ما يقراه العاش بذله ويفهم اياته الانسان بقران الطف خالد مسلم سوره ويقراها الوجدان
ما غره الشيطان بدنيا لا باع احسين ولا خان
يسطع نوره ما طفاه الموت
من اتزوره تسمع هذا الصوت
اخذ العبره ويشهد كبره
ضل خالد ما مات
ـــــــــــــــــــــــــــــــــــــ
من تقره الطف بيه اتمعن ركز زين بها المفهوم مسلم كبره ايكل للوادم يا ناس المنصب ما يدوم
ابن ازياد ابلعنه انذكرة كل ساعه النكعد ونكوم
وشوف الكوفه اشلون ازدهرت من ضمت كبر المظلوم
اليكصد كبره ينطيه اشما راد
وشوف النكره يمكن لابن ازياد
خصمه بنكره ويشهد كبره
ضل خالد ما مات
ـــــــــــــــــــــــــــــــــــــ
هالموقف نتعلم منه انه اوياك ودقق زين
مسلم عرضوله اشجم منصب رادو بس يبيع حسين
بس شوف العشكوها الدنيا صارو وين ومسلم وين
مسلم كبته اتدلي التايه وضلو خصمه الملعونين
ما يتنازل لا فرط بالدين
لا ما جامل ويه المغرورين
ضحه ابنحره ويشهد كبره
ضل خالد ما مات
ـــــــــــــــــــــــــــــــــــــ
اول جمره اشتعلت مسلم نستنتج منها المضمون
ما معروف ابن ادم يمكن كدام اللذات ايخون
والرايد من عندي المصدر واتكلم للي ايفهمون والطلعو ضد ابن الزهره مو بيهم ناس يصلون
بيهم عابد وايصوم برمضان
واشجم واحد حافظ للقران
وتالي ايغدره ويشهد كبره
ضل خالد ما مات
ـــــ نعيم ابو باقر الساعدي ــــــــــ

مديت اديه اباب محبوبي
بلكت دمعتي تمسح اذنوبي
حبيبي يا حسين
طبيبي يا حسين
ـــــــــــــــــــــــــــــ
انه اعترف بافضالك امغركني
باب الحوائج بالكرم سابكني
ندمان اجيت وذنبي اليشبكني
خايف جهنم لو متت تحركني
يا حسين اريدك تستر اعيوبي
بلكت دمعتي تمسح اذنوبي
حبيبي يا حسين
طبيبي يا حسين
ــــــــــــــــــــــــــــــ
اماره نفسي واعترف كدامك
وانفتح باب التوبه الي بايامك
اقسم عليك ابذاك دمع ايتامك
تقبلني اريدك خادم الخدامك
ثوب المعاصي ما يضل ثوبي
بلكت دمعتي تمسح اذنوبي
حبيبي يا حسين
طبيبي يا حسين
ـــــــــــــــــــــــــــ
يا نفسي باجر من تغمض اعيوني
وي المعاصي الحفرتي ايودوني
بس وصله بيضا البيها اليلفوني
تحت التراب ابمكبره ايدفوني
يا نفسي كافي امن الذنب توبي
بلكت دمعتي تمسح اذنوبي
حبيبي يا حسين
طبيبي يا حسين
ــــــــــــــــــــــــــ
كلبك حنين وترحم بعدوانك
تذكر مواقف بالكرم جيرانك
واكف اجدي وطامع باحسانك
مطلوب اجيت ولايذ بديوانك
شيخ العشيرة اليكضي مطلوبي
بلكت دمعتي تمسح اذنوبي
حبيبي يا حسين
طبيبي يا حسين
ــــــــــــــــــــــــ
يا حسين اعاهد لك عهد يالغالي
للاحسن امن اليوم اغير احوالي
ما تدني نفسي اعلى الذنب للتالي
وجمرة مصابك كل وكت تبرالي
وي البشر يتغير اسلوبي
بلكت دمعتي تمسح اذنوبي
حبيبي يا حسين
طبيبي يا حسين
ـــــــــــــــــــــــــــــ
نعيم ابو باقر الساعدي

جمر العطش يجويك محد يفزع يحميك
يا غربتك يا حسين يا غربتك يا حسين
ــــــــــــــــــــــــــــــ
شيسوي جدك سيدي لو شافك
طايح غريب امفطرات اشفافك
متغيره من كثر النزيف اوصافك
واثار طعنات الرمح بجتافك
يا سهم الامذيك محد يفزع يحميك
يا غربتك يا حسين يا غربتك يا حسين
ــــــــــــــــــــــــــــــ
عطشان وامبين العطش بعيونك
يكدرون وانته مصوب يذبحونك
يردون اولاد الزنى ايعذبونك
تسمعهم امن ابعيد وايشتمونك
بحجار متوليك محد يفزع يحميك
يا غربتك يا حسين يا غربتك يا حسين
ــــــــــــــــــــــــــــــ
يا بس السانك على الماي اكبالهم
محد سكاك اميه ذول اشمالهم
ابليس بلسان الشمر يقرالهم
ذبح الرسول وعترته يحلالهم
محد يقبل يسكيك محد يفزع يحميك
يا غربتك يا حسين يا غربتك يا حسين
ــــــــــــــــــــــــــــــ
لمن ولوك وما حضر عباسك
فاطمه يمك من خفت انفاسك واتعاين اعلى الشمر من حز راسك
من منحرك شافت محمد باسك
جدك اجه ايشم بيك محد يفزع يحميك
يا غربتك يا حسين يا غربتك يا حسين
ــــــــــــــــــــــــــــــ
نايم على التربان مو من شانك
وتلوج من كثر العطش بلسانك
ذبحوك محد فزع من خوانك
ومحد يطفي النار من صيوانك
طايح تون اشبيك محد يفزع يحميك
يا غربتك يا حسين يا غربتك يا حسين
ــــــــــــــــــــــــــــــ
فرهود صاحو فرهدوها اخيامك
مرعوبه شردت بالصحاري ايتامك
مذبوح ما شفت الوضع كدامك
اومكسره امن الدوس كلها اعظامك
بالخيل سحكو بيك محد يفزع يحميك
يا غربتك يا حسين يا غربتك يا حسين
ــــــــــــــــــــــــــــــ
اتمنى كلشي البيك صاير بيه
وانه الجبهتي امن الحجر مدمية
يا ريت جثتي البشمس مرمية
واتمنى اختي بكربلا المسبية
وابروحي كون افديك محد يفزع يحميك
يا غربتك يا حسين يا غربتك يا حسين
ـــــــ نعيم ابو باقر الساعدي ــــــــــ

يا سيدي العطشان صلى الله عليك
يا مذبوحا عريان صلى الله عليك
ياذا الخد التريب ياذا الشيب الخضيب
صلى الله عليك صلى الله عليك ــــــــــــــــــــــــــــــــــــ
صلن ادموعي اعلى خدي وسجدن اباب المصاب اصرخ اكبالك واناشغ والكه بس دمعي الجواب
اغفه واتفززني لوعه وينفتح لجروحي باب اشلون انام اعلى المخده وانته نايم عالتراب
يا سيدَ الجروح صلى الله عليكَ
يا من بكاه نوح صلى الله عليكَ
ذاك الجسمِ السليب يا ذا الشيبِ الخضيب
صلى الله عليكَ صلى الله عليكَ ـــــــــــــــــــــــــــــــــ
اذكر امصابك واسولف واندهش ما عندي راي من طحت يابس لسانك ما سكوك اشويه ماي بالصيام اذكر مصابك من اعيش الحالة هاي ما توفي لك دمعتي ولا اجازيك بضماي
يا صَرخةَ السماء صلى الله عليكَ
في ارضِ كربلاء صلى الله عليكَ
انتَ السرُ العجيب يا ذا الشيبِ الخضيب
صلى الله عليكَ صلى الله عليكَ ـــــــــــــــــــــــــــــــــــ
اشلون اجازيك بدمعتي وانته ناعيك الرسول عالتراب اتنام وانه اعلى الكطن نايم خجول كون بيه الصار بيك وانه سحكتني الخيول كونها الخيل اعلى صدري مو على صدرك تجول
يا جمرة الطفوف صلى الله عليكَ
يا قبلة السيوف صلى الله عليكَ
يا ذا النورِ المَهيب يا ذا الشيبِ الخضيب
صلى الله عليكَ صلى الله عليكَ ــــــــــــــــــــــــــــــــــ
انته سلبوهن خواتك بالحبال امجتفات
وانه لو طلعن خواتي بالحجاب امخدرات
محد امسلب بناتي اكبال عيني مدللات
انه مو مثلك حبيبي ابحضنه شاف وليده مات
يا مُبكيَ العُيون صلى الله عليكَ
اهواكَ كَالجنون صلى الله عليكَ
يا مكثوراً غريب يا ذا الشيبِ الخضيب
صلى الله عليكَ صلى الله عليكَ ـــــــــــــــــــــــــــــــــ
والله لو ابجي لمصابك عمري كله الطم واصيح تبقى تجوي النار بيه وما انم ومستريح
ما افي الطبرة وحده الطاح عطشان وذبيح انه صح مجروح كلبي وانته كل جسمك جريح
يا سيد الحياة صلى الله عليكَ
يا مركب النجاة صلى الله عليكَ
يامن انت الحبيب يا ذا الشيبِ الخضيب
صلى الله عليكَ صلى الله عليكَ
ـــــــ نعيم ابو باقر الساعدي ــــــــــ