​​Bagʻishlov

Nedir izlab kezasan dunyo,
Suvdek oqib boraverar bosh.
Bor oq, qora, malla odamlar,
Boshqa-boshqa olamdan goʻyo,
Lekin oy bir, bittadir quyosh.

Qayga borsang, Matmusalar bor,
Har qadamda bir Donishqishloq.
Kim oʻziga oʻrnatar haykal,
Bir notada tingʻillaydi tor,
Charxpalak ters, oymomo – pishloq.

Oʻrtamizda devor, hamsoya,
Tongda menga soya, kech senga.
Buzsa nafsi oʻpqon oʻgʻillar,
Qoʻl berib ket, aytmabsan boya,
Qayeridan boʻlishsin tengga?

Katta gapga oʻrgangan bazm,
Kichigiga boqmas qiyolab.
Hammasidan shartta yuz burib,
Olar hamon choynakdan taʻzim,
Insonlardan oʻpich piyola.

Malskiy chizib berdi globus,
Butun dunyo buning shohidi.
Ammo oʻsha globus aro
Chizib ketdi insonni nafis
Fargʻonaning Erkin Vohidi.

©Jaloliddin Umar