طفله بديار الغرب مهظومه
بعد ابوهه باليسر مظلومه
؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛
بعد ابوهه بالحزن ضلت تون
خوله بنت حسين لفراگه تحن
مشت مسبيه وتهل دمع الجفن
اراس ابوهه تصدله بلوعة وحزن
،،وي طول الرمح تجري ادمومه،،1
؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛
هاي خوله مچتفه بحبل اليسر
حافيه وفوگ الهزل تنوح اشكثر
بعد ابوهه اتعذبت ابهم الهجر
شافت اهموم وقهر من الزغر
،،ابلايه والي من الاابو محرومه،،2
؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛
بكربله شافت الصار وي الحرم
وشافت النيران شبت بالخيم
بعد عباس الگمر راعي العلم
طاح يم المشرعه بعينه سهم
،،وبعد عمها ابلا ولي مالومه،،3
؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛
ماتت بلوعه وحزن برض الغرب
اتنوح علمظلوم والمدمع يصب
ماتت وبحزان مجروح الگلب
فراگ ابوهه اعليها بالغربه صعب
،،والجروح الفرگته ملچومه،،4
؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛
يبقى اسمها بكل وكت نور وفخر
نور ويضوي يظل طول الدهر
غصن من شجرة علي نور ازدهر
وباب للمحتاج. بت سيد البشر
،،تجلي كلمن گصد الها اهمومه،،5
؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛
الشاعر قصي القاسمي