قصيدة مقدمة لحميدة بنت مسلم عليهم السلام

بويه وينك… يالرحت ديرة بعيدة
بويه وينك… اشعر خلافك وحيدة
بويه وينك… انه الزغيرة حــميدة
::::::::::::::::::::::::::::::::::::::::::::
من روحي ابعثلك ورد بي ريحة الولهان
من اعيون انت الهه النظر وگليب الك عطشان
اعضاي بويه اتحن الك والعقل ظل حيران
اخبار منك مالفت يالغايب امن ازمان

بويه وينك… مرني ياجبر الخواطر
بويه وينك… بُعدك ال جرحي خناجر
بويه وينك… انت لگـــــليبي وريدة
::::::::::::::::::::::::::::::::::::::::::::
مشتهيه چفك والدي بي تنــــشف الدمعات
يمسحلي صدري امن اختنگ بي تسكن الآهات
كثرن يبويه بغيبتك هوايه اشعر الصفنات
مهمومه ذوبني الحزن راسي انترس شيبات

بويه وينك… غابت اويــــــاك الاماني
بويه وينك… بحظنك ارد اغفه ثواني
بويه وينك… صرت لاحزاني طريدة
::::::::::::::::::::::::::::::::::::::::::::
كل ماتمر نسمة فجر اتخـــــــيلك مريت
بصيحة هلا بريح الابو اترس ثنايا البيت
من الكوفه ردلي والدي سالم الي ناديت
تاليهه افز لنه حلم من سفرتك ماجيت

بويه وينك… ردلي يابـــــــويه سلامي
بويه وينك… ضامي گلبي والله ضامي
بويه وينك… غير وصلك مايفــــيدة
::::::::::::::::::::::::::::::::::::::::::::
راودني احساس اليتم ياوالدي بجفاك
وعبرات تلتم بالصدر وبغيبتك تـــنعاك
چذاب احساسي گلت وتــنطرت ملگاك
عيني على دربك تصد بلكن ترد اتـــناك

بويه وينك… صوتي للكوفه وصل
بويه وينك… باقي عندي چــم امل
بويه وينك… اعليك امشيه الصميدة
::::::::::::::::::::::::::::::::::::::::::::
ليلي اليمر اگضيه بچي متعوده بويه اعليك
اتغطيني لو مرني برد خيمه چنت ثاريك
دمعاتي تنزل عالوجن من اسمع بطاريك
واتنفس اثيابك هوا واشتم عطور البيك

بويه وينك… زارني طــــيفك زياره
بويه وينك… معتلي قصـــر الاماره
بويه وينك… فارس ايودع عضيدة
::::::::::::::::::::::::::::::::::::::::::::

شاعر اهل البيت سيد فليح الموسوي