ШУМ БОЛАДАН ДАРС
Украина урушида мазлум украин халқи томонида бўлсам-да, бир мулоҳазамни ёзмоқчиман. Украин ва умуман ғарб медиаси бу урушни ёритишда жуда катта муваффақиятга эришяпти.
Ҳатто улар миллиардлар сарфланган рус пропагандасидан ҳам устун кўриняпти. Ва бу ҳолат афкори оммани украин халқига ҳамдард бўлишини, кейин жанг майдонида ҳам руҳий кўтаринкилигини таъминлаяпти.
Шу маънода нега ғарбнинг Ироқ, Сурия ё Афғонистонда қилган қаттолликларини қораламайсиз, дейдиган кишиларнинг хатолари кўзга ташланади.
1. Улар тўғрисида ҳам вақтида бонг урганмиз.
2. У уруш ва зўравонликлар мусулмонларнинг ахборий ва медиа майдонида йўқликлари сабабли фожиа ўлароқ ўзининг бўй-басти билан кўринмаган.
Телефон ё ҳаваскор камераларда олинган тасвирлар медиаусталар томонидан фейк ёки эски видеолар дея инкор қилинган.
Ҳеч ким уларнинг бу даъволари пуч эканини исботлаб беролмаган. Аксинча, украин-рус урушида фактчекинг ишлари жуда яхши йўлга қўйилмоқди ва рақиб томон кураги ахборий майдонда ерга осон текизилмоқда.
Шу каби мулоҳазалар кўнгилдан ўтаётганда "Шум бола" фильмидаги бир эпизод кўз ўнгимга келади: Ўчоқ бошида ўйнашларни тутиб олган шум бола улардан ҳақ талаб қилади.
Рад жавобини олган бола қаттиқ бақираман, дея, мақсадига эришади ва қўшимча нарсалар ундиради. Бу қилиқ ахлоқий томондан маъқулланмаса-да, бир ҳақиқатни юзага чиқаради: ахборот майдонида қўли баланд келган доим ютади. Зеро Алишер Навоий:
"Агар огоҳсен, шоҳсен" деб бежиз айтмаганлар.
Ахборий майдон соҳасида умуман мусулмонларга, хусусан ўзбекларга омад тилайман. Бу майдонни ташлаб қўйган эса аниқ мағлуб бўлишидан огоҳлантираман
.📚 •┈┈•┈┈•⊰✿🍃🌺🍃✿⊱•┈┈•┈┈•
➡️ Каналга уланиш🔗Прокомментировать
