АСРАЙЛИК

Дунёда борлиги энг катта давлат,
Уйингда ўтирса тўкишиб савлат.
Ишингизга кўкдан ёғилар раҳмат,
Борида асрайлик ота онани.

Шулар бор йўқламас сизни бирор ғам,
Билинмай кетади унча-мунча кам.
Кўнглингиз топади ҳузур, хотиржам,
Борида асрайлик ота онани.

Билсак, асл омад, бахтимиз-улар,
Дуода асровчи нақдимиз- улар.
Пойлари жаннат-у, тахтимиз улар,
Борида асрайлик ота онани.

Ҳар битта сўзида ҳикмат мужассам,
Энг доно подшо-ю, энг одил ҳакам.
Биз сабаб бўлмасин кўзлари ҳеч нам,
Борида асрайлик ота онани.

Кексайиб нозик қалб бўлишлиги бор,
Оғринмайлик бирор ишидан зинҳор.
Умрининг ҳар кунин этайлик баҳор,
Борида асрайлик ота онани.

Меҳримизга асло бўлмасин маҳтал,
Ширин сўзимиздан яйрасин ҳар гал.
Мангуга йўқотиб қўймасдан аввал,
Борида асрайлик ота онани.

Муаллифига рахмат