AQSh-Eron ziddiyati qay bosqichda?AQSh Prezidenti Donald Tramp Eronning Iroqdagi AQSh bazalariga qilgan hujumi bo'yicha hozirgina bayonot berdi.
Asosiy mazmuni shu: AQSh ayni paytda Eronga qarshi yangi javob zarbalarini bermaydi (Chunki hujumda hech kim o'lmagan). Lekin Tehronga qarshi iqtisodiy jazo choralari qo'llanadi.
Tramp nutqining oxirrog'ida IShIDga qarshi kurashda va boshqa o'zaro manfaatli masalalarda Eron bilan hamkorlik qilishga tayyor ekanini ham izhor qildi. Bu yaxshi signal.
Eronning Iroqdagi ikki harbiy bazaga qilgan hujumi ham jiddiy qasos olishdan ko'ra, ramziy bir ma'noda amalga oshirilganga o'xshaydi. Chunki 20 dan ortiq raketa otilishiga qaramay, hech kim o'lmagan. Manbalarning xabar berishicha, hujum boshlanishidan avval Tehron Iroq rasmiylarini ogohlantirib qo'ygan. Demak, ko'p ehtimol bilan, hujum yuz bergan payt bazada ehtiyot choralari ko'rilgan, ya'ni AQShning ham xabari bo'lgan.
Xullas, hozircha vaziyat biroz yumshagan. Agar Eron to'g'ridan to'g'ri yangi hujumlarni amalga oshirmasa yoki boshqa guruhlar orqali tashkillashtiradigan xurujlarida amerikaliklar o'lim topmasa, AQShdan ayni paytda yangi harbiy choralar kutilmayapti.
@navbahor_imamova