ТEПАЛИКЛАР
Кўнглингга тош отиб такрор ва такрор,
Пасткаш нобакорлар солганда доғлар.
Сиқилсанг, чўққилар сари чопиб бор,
Руҳинг кўтаради пурвиқор тоғлар.
Довонлар ошганда хаёлчан ўзинг,
Ки улар ўргатар юксалиш сирин.
Табиат кўркига қувнагай кўзинг,
Тоғларнинг бор ҳусни қолмас яширин.
Баҳорнинг сеплари ёйилган онда,
Алвон гилам каби ёнади ерлар.
Ўзига чорлагай Ўзбекистонда
Лолаларга тўлган адирлар, қирлар.
Қоями, айсбергми - нимадир улар,
Худонинг «Бўл» деган буйруғида жам.
Мана, саҳроларда кеккайиб турар
Шамол бунёд қилган қум барҳани ҳам...
Ердан кўтарилган тепаликлар кўп,
Биридан бирининг бўйи юқори.
Лекин барчасидан буюкроқдир ҳўп,
Отамнинг дўппайиб турган мозори!
Ўткирбек Мадумаров
@Ubaydulloh_qori