♔صرخة"العقيله لكافة"الالحان المنبريه ترحب بخدام الحسين

مسابقة اجمل صوره دينيه
كل ماعليكم دزون الاسم والصوره للبوت اعلاه في الاعلان👆

#الغايه من هذه المسابقة رفع البلاء ولقضاء جميع حوائجكم

هذا البوت دزو بيه صورة المشاركة والاسم مالتكم
@S313Abot

تعلن قناة 🌸 صرخة "العقيله لكافة"الالحان المنبريه ترحب بخدام الحسين 🌸 عن مسابقة لطيفة كلطف أرواحكم الجميلة 😍💚

عن أجمل صورة دينية 💖🌝

حيث تعتمد على أكبر نسبة تصويت 🤍🖇

و سيكون لدينا فائزين ٣ وجوائزه 🎁 :

🌝 الفائز الاول:-
✨جزء من القرآن الكريم
✨سورة يس
✨سورة الواقعة
✨زيارة عاشوراء
✨زيارة الامام الحسين واخيه ابا الفضل العباس ع

🌝الفائز الثاني:-
✨سورة يس
✨سورة الفجر
✨زيارة ال يس
✨زيارة الامام الحسين واخيه ابا الفضل العباس ع

🌝الفائز الثالث:-
✨سورة يس
✨سورة الواقعة
✨زيارة الامام الحسين واخيه ابا الفضل العباس ع

⭐️وكل من يشارك له دعاء تحت قبة الامام الحسين ع 😍واخيه ابا الفضل العباس ع 😍 ⭐️

وللمشاركة ارسل الصورة مع اسم عبر البوت
@S313Abot

والمشاركات سوف ترسل هنا
@Alaqilajjmm

تبدأ المسابقة بتاريخ 2020/8/9
وتنتهي بتاريخ 2020/8/14
تعلن النتائج ليلا ساعة التاسعة مساءً

وبالتوفيق للجميع 😊🍀💚

السلام عليكم ورحمة الله وبركاته
كل عام وانتم بالف خير .. نرفع ازكى وانمى وابهى آيات التهاني والتبريكات الى مقام الرسول الاعظم محمدصلوات الله عليه وعلى اهل بيته .. والى صاحب الولاية العظمى امير المؤمنين عليه السلام .. والى مقام الإمام مهدي الأمم وجامع الكلم عجل الله تعالى فرجه الشريف .. والى مراجعنا العظام وإليكم اخوتي واخواتي الكرام .. بمناسبةعيد الله الأعظم عيد الغدير الأغر .. نسأل الله تباركه وتعالى أن يعيده علينا وعليكم بالخير والبركة والثبات وقبول الاعمال ..

اسعد الله ايامكم احبتي
متباركين💙 بعيد الغدير الاغر تنصيب الولاية لـ امير المؤمنين. ع. ان شاءالله من الثابتين والموالين لـ علي ابن ابي طالب عليه افضل الصلاة والسلام
انسأل الله عزه وجل ببركة علي امير المؤمنين ع ان يشفع لنا ويدفع عنا هذا الوباء

الانصار ع

بشهر المحرم أدت اصحاب الحميه
فرض الشهاده قربة لبن الزجيه
اذن حبيب المقتله.. حي على طف كربله
لبن الزجيه
_
١
على خيامه تصيح بصوت سبعينه
انته التموتنه وانته تحيينه
هانئ يقاتل . بالحرب قائل . احنه اصحاب ال . يمين
بأنصارك اعله التضحية صاير تنافس
لكربله صحنه . فدوه لو طحنه . بخدمتك احنه. حسين
ومن العشك حالف يشك لك ثوبه عابس

للتضحية ياغالي منتظره الغياره
عابس جهز والحرُّ تكفيهِ الاشاره
صوت الجهاد بداخله...حي على طف كربله
لبن الزجيه
____
٢
اليموت اعله الحسين ويشتم اترابه
شلون الكربله ما يحسب احسابه
امن الزغر همه . يم ابو اليمه . وصار اله عمه . حبيب
يم الخيم كبل الحرب اده الشعائر
نادته الحره. وانشده فكره . ناده بالعبره . عجيب
زينب تصحيك ياحبيب ابن مظاهر

تسعين عام وشد على الحاحب عصابه
لجلك حبيب ابن مظاهر رد شبابه
واعله العده صوته اعتله.. حي على طف كربله
لبن الزجيه
__
٣
تراويهم جنان وحور والكوثر
وهمه انشغلوا بوجهك يبو الاكبر
ينصرك قادم . الجنه ما لازم. عالحرب عازم . برير
ومسلم تمنه لنصرتك لوعنده روحين
بطّل يتاجر . صار الك ناصر . بالعشك تاجر . زهير
وبالحومه نافع غير اسمه لعبد الحسين

وبجانبه ينادي وهب شيعي انه ديني
انه اسمي مو نصراني انه اسمي الحسيني
وجه ابو فاضل رتله..حي على طف كربله
لبن الزجيه
__
٤
انس يهتف انه من وكت هاديها
رحت للغاضريه وخيمت بيها
من روه اليجري . دمعي ضل يجري . حزمت ظهري . ومشيت
الكربله والوحّدي تانيت الضعون
لجيتك اتحضر . جم سنه اتنطر . يابوالاكبر . واجيت
الحمد الله الكتبني اويه الينصرون

من الصغر ناذر الك دمعي ودمائي
ولخاطرك عمري كظيته كربلائي
اخره هذا واوله.. حي على طف كربله
لبن الزجيه
_
٥
جون ينادي وبصوته البخت والحظ
بمسك عطري اقاتل وبوجه ابيض
غيرتي تلهب . موتي يتوجب . افتدي زينب . دماي
لحد الخيم من يقترب وبسيفي ثائر
حسيني يا ذخري . طيبت عطري . يابعد عمري . وهواي
نلت الثنين بصحبتك خادم وناصر

ما اعوفك لكطع النحر اخر كلامي
انت حبيبي وسيدي وذخري وامامي
واياتي ياخير المله.. حي على طف كربله
لبن الزجيه
_
٦
واحدهم على الطف ما اخذ خيره
وما شالته المهره شالته الغيره
اتعنه للنصره . الخاطر الزهره . تجري من نحره . الدماء
الكل ضحه لهل البيت فوك الاستطاعه
بكربله انجمعوا . خطوة ما رجعوا . للخيم وكعوا . فداء
واعله الشهاده بكربله صلوا جماعه

سجل اساميهم حبيب ونحره دامي
وانطه الكتاب لفاطمة تشوف الاسامي
فوك الاسامي البسمله.. حي على طف كربله
لبن الزجيه

#ميثاق_الحمداني

شفت بحلم كله بچي وحرگة وفجيعه
حامي الشَريعه و التقه بحامي الشِريعه
اتلاگة الگمر والقائم
وصار العزاء الدائم
حامي الشَريعه و التقة بحامي الشِريعه
=========
حلم راودني وتبعثر لون كل شي
عصفت وحرّك العاصف شعر رمشي
المهدي وي عمه التقوا ونثار دهشي
امشي ليهم وابتعد ما چني امشي

امن العاشر الهسه الشمس ما كسرت الفي
إلقائم الحي انجمع بالميت الحي
ملگة بدلالة آية
ووگفت محنة الراية
وكلشي ثگل بس الدمع رجله سريعه
================
عله اركبي اتبده طولي وحالي يفجِع
لِمحة اعيوني وشفت موقف يروّع
بچه المهدي وجدمة يمشي وبي يرجِّع
ودنّك لچفة ويبوّس اصبع اصبع

استوقفني هذا الموقف بأثناء شوفة
خامس امام المهدي اظن باسه بچفوفة
وگام الامام الحجة
ليوم الفرج يترجة
بس جدمة من كثر التعب كوة يطيعة
============
اختاض عباس واحس ثگلت انفاسة
ونحرة حومر وانتهض دم الفراسة
المهدي من يمه انذكر فرفح احساسة
لأن ماهية چفوفة وما هو راسة

رايد يطيح وسنّدة و ذكرّة بچفة
بالتچوة لازم تنرفع ايدة اعله چتفة
ألهظمة ثالث حاله
بلطم العزة شيجراله
واتمنه ابو فاضل ترد ايدة الگطيعه
=============
عالشِريعه الملتقى وصار اعله غفلة
اتحاوروا حول الشَريعه وكلشي صلة
امن النحر گلّه الگمر تضحيتي لله
الهسه دم اچفوفي يطفح عله النخلة

من گعدوا بفي النخل شفت الگمر گام
اتذكر لمَن چفة انگطع من اجل الاسلام
وهنانه گله المهدي
يا بعد زندك زندي
واهتزت الهم مستحه اجبال الطبيعه
===============
صاحب العصرِ العصر نوّخ رحيلة
وقطعة سودة للعزه جاب بسبيلة
و اظن كاتب مستهل هذهِ اللِيلة
(احنه غير حسين ما عدنه وسيلة)

اعظم عزا واكبر بچي من اعظم اثنين
إلساعة بالطف وكسر وقت المعزين
ختمة عزاء الرهبة
چانت دعاء الندبة
والوسعه صارت بالحزن كلش رفيعه
=============
بآخر احداث اللقاء وكلشي مُتعب
حنّوا لريحة خدر بس مو مسلب
اشوية والصفنة ابرزت بگلوب تلهب
من ثنيات المحنة إجت زينب

لن فزت اعيوني الصبح تارسني همي
يوم اللقاء العالمي لقبته حلمي
اتلاگوا اعز اثلاثة
بآخر دموع احداثة
جانت نهاية هالحلم جيةْ الوديعه
=========≠===
علي هادي الخزعلي

عشره الخيل يسحكن كامن بصدره
وعاشر يوم بمحرم ينكطع نحره
الاصابع ليش بدين حسين مو عشره
***********
يحسين الك كلما احن تاخذني ليك الفطره
اتخيلك فوك الرمل وخيول فوكك عشره
وسمعت كل كسرت ضلع وصدرك شفت بي حفره
ونحرك يبو اليمه الشمر اثنعش طبره ايطبره

عله التربان تون من الالم شفتك
ومن الماي شجاها الناس حارمتك
وبعدهي حسين اجروحك تنزف وخضره
***********
يا ابو علي وحدك شفت والتمت الكوم عليك
هذا بسهم ذاك برمح وهذا بحجر ظل يرميك
وهذا يسلب اعمامتك ويرفس هذاك برجليك
وذاك اليسب ابفاطمه وهذا اليگلب بيديك

محبس شاف من ايدك حاول اينزعه
خنجر جاب واصبعك قرر ايكطعه
خذاه رواح واصبعك ياهو اليدوره
**************
الف وتسعمية جرح الطعنه فوك الطعنه
وما ادري منهن ياجرح الياذيك وتون منه
جرح الرمح جرح السهم لو للضلع هالونه
لو جرح زينب بالخيم من صاحت خويه الحگنه

ردت اتكوم لجن اجروحك اهوايه
وصحت يحسين زينب بت علي هايه
بخيمها ليش اشوف النار مستعره
**********
اشلون كلي اتحملت سهم الذي طر جبدك
كالو طلع من الظهر وكل حيل ما ظل عندك
عن الخيم ليش الشمر يحسين راد ايبعدك
وظل الرمل يا ابو علي كل ساعه يجوي بخدك

ارسومك ذيج حيل اتغيرت يحسين
ويبو الاكبر السمار البيك هذا منين
بالحر ذاك نمت يحسين جم مره
*******
كلي شحمل ليك العطش بذيج الشمس والحر ذاك
مرمي عله وجهك عالترب وضاع الهوه عليك اهناك
خلوك عطشان وتون ومحد اجه اميه انطاك
ومحد اجه وعن الشمس جاباله وصله وغطاك
العطش يحسين كالو فطر اشفافك
تون اهواي والحر غير اوصافك
الجروح البيك بجن زينب الحره
******
اشلونك لمن شفت الشمر ثاني ركبته بصدرك
وبيده لزمها لحيتك وبتده ايحز ابنحرك
بمنحرك حيرني الشمر يحسين ليش ايطبرك
كلي شحمل ليك الالم وساعتها الله يصبرك

حز الراس يحسين وكطع نفسك
الشمر من كام ليش بصدرك ايرفسك
برمح خلاه واختك زينب اتنظره
********
تمت
ميثم العمري

نعي بحق ابناء مسلم بن عقيل //ع//



يوم الهجمت العسكر
ودخان الخيم مضلم
تهدم الحيل حالتهـم
وحتارو ولد مسلــم

فرو من صهيل الخيل
وين الوجه مـا يدرون
واحد چلّــــب بــــواحد
وبين الخيم يفتـــــرون

بعد مــا أيســو كلش
بدمعهم نحـرو البيده
الچبير يجر بالزغيّـر
واخوه مچلب ابئيده

خمدت لوعة العسكـــر
ولهبت لوعة الغربــــه
صعب تتوصف الحاله
اليتيم وينجرح گلبـــه

عليهم چلت الحسرات
من خيم ضلام الليـــل
اشلون تغمض عيونـه
اليذّكر هجوم الخيـــل

بدموع الحزن ضلـــــو
ولا واحد اليرعــــــاهم
بعد كل الهضم والضيم
قصة الحارث ويــــاهم

كسرو خاطر السجان
لمـن سمــــع قصتهم
لچن شلفايده الاقـــدار
بيد الحــــارث انطتهم

گلوله النبي المختـار
مبعوث البشر جدنـه
ارحمنه لصغر سنّـه
واطلق قيدنه وهدنه

عليهم ما عطف گلبه
ومثل البشر ماچنـــه
كلهم انتم اختــــــــــارو
الاول ياهو اذبحنــــه

الچبير ايكله يـــا ظالم
بالاول اني اذبحنــــــي
ما اگدر تصد عينــــي
اخوي بذبحه تجرحني

صاح الاصغر بلوعـــه
ومدامع بالوجن حــــدر
تخسر أخره ودنيــــــه
وخصمك فاطمة وحيدر

مصيبتهم تشيب الراس
الغيور اتجرح عيونـــه
اليتيم الوادم اتكرمـــــه
وحرمت يتمه مصيونـه

بيهم ما جرت عــاده
يويلي وحالة مختلفـه
جرحهم للمات ايعيش
بينه وما ابد يشفـــــه
.............


ابوذيات

گالوله يحارث عــــوف.. يدنه
يتامه والنبي المختــــار .. يدنه
شهر سيفه و عليهم گام.. يدنه

و بيهم عاد يوم الغاضرية

÷÷÷÷÷÷÷÷÷

الحارث رد جرح مسلم.. وعاده
ودليلي غيب افراحــــه.. وعاده
يوادم ما جرت سنـــــه.. وعاده

ذبحهم و الجثث ضلت رميه

÷÷÷÷÷÷÷÷÷÷÷÷

روحي الحزن عاشرهه.. وجاهه
وفگدهم نــــار البگلبــي.. وجاهه
الباري بحكمتـه انطاهم.. وجاهه

و عليهم هلت ادموع البريه

÷÷÷÷÷÷÷÷÷

✍ بقلم خادم الحسين ع
الشاعر رعد الچريخي

ابوذيه لسان حال السيده زينب// ع//

نـهـيـت الـگـلـب بـس مـيـفـيـد.. منهاي
وعـذرتـه بيوم صـوب الجـسـد.. منهاي
أنــه يــاهــي وتـصـيـح الـنـاس.. منهاي

ولا چــنــي الـعـقــيــلــه الـهـاشــمــيـــه

*-----------------*------------------*

✍بقلم خادم الحسين ع
الشاعر رعد الجريخي

يازينب


أخوتي مــا دروا بيه.. ويو يــاي
عگبهم كــــل المخيم.. ويو وياي
تمنيت الكفل خـدري.. ويو وياي

يطفي بــجــوده نــيــران العليــه

*---------------*---------------*
✍ بقلم خادم الحسين ع
الشاعر رعد الچريخي

المعاني
1* يأتون لمكاني
2* اشتعل المخيم بالنار
3* أتى معي

مو مثل البنات..وية اجروحي ابات
يكتلني الصبح..والليل ابجرح..من الذكريات
#################################
اهنا حجينة..اهنا كعدنة..هذا حالي اعليكم ابيتي مندور
ثوب الزمة..ثوب اشمة..ياعطركم عايش ابريتي بخور
الدار ضلمة.حجرة حجرة.. الجانت من وجهكم مليانة نور
من اوجهوكم ماراح بالي
حطيتكم صورة ابخيالي
كل ساعة اسولفلي اويغالي
ويمر بية صوت ..منة اشهك واموت
ياراحة التصح..والليل بجرح ..من الذكريات
#################################
اكبال بابي..كاعدة انطر..بلكي يندك والهلة محضرتهة روح
بلكي واحد ..حن عليه..وكال خل ناخذهة ماتحمل جروح
افرشلكم ..اسرجلكم..كلش اسوي اهناك بس خلوني اروح
صريتهن بامالي هدمي
وماكال واحد ركبي يمي
ولامدلي جف وكال سمي
وياكم مامشيت..ويجروحي بقيت
شنهو الينصلح..والليل ابجرح ..من الذكريات
#################################
اجروحي احطهن..ابمهد اخوية..وابقة الولي ولاجرح منهن يهيد
اتهيم روحي..تريد ملكة..اتريدكم ويمر عليهة الماتريد
الفركة خشنة..وروحي ترفة..الموت اجاني وبعدة ملكاكم بعيد
لشتاكلة اكعدلة بحجرتة
ويكتلني من اذكر عشرتة
ماشفتة بس الموت شفتة
لاشوفت حبيب ..لاجرح اليطيب
كل ساعة انذبح..والليل ابجرح..من الذكريات
#################################
ادموعي كتبن ..جم رسالة..ومايبّرد كلبي طارش باليجون
وية روحي..كمت اسولف..اتهون اكلهة اترد علي لا ماتهون
ساعة راحو..ساعة ماتو..وانة كل ساعة انخطف من وجهي لون
ثوب الحزن ماهو اعلة كدي
منة التوة عضمي اعلة جلدي
وبدموعي كمت اغرف وابدي
شينشف العيون..وانتم ماتجون
دمعي شينمسح ..والليل ابجرح..من الذكريات
#################################
اغفة كوة..وبيكم احلم..واكعد من احلامكم مليانة خوف
جاي اشاهد..بس مناحر..وراس سالم عالجسم ماجاي اشوف
وارجع اغمض..عيني بلكي..هم اشوف احلامكم وجروح اروف
احلامي بيكم كلهة بس دم
لو نار تاكل بالمخيم
وريحة حرك من زيبنب اشتم
وشلون استراح..من هاي الجراح
يبرالي الرمح..والليل بجرح..من الذكريات
#################################
#ذوالفقار الزيدي

بالسلامه.. ياهلي رايح ضعنكم.. بالسلامه
بالسلامه.. الليل وحشه وذكرتكم .. بالسلامه

والضعن من يمي شايل
وعيني صدت للمحامل
بسلامه

****
تصد عيني بضعنكم راح .. وكولن بي نقص ناكه
شبدر مني وجفاني حسين .. كلبي يوجعه فراكه

اصعب لحضه اموادع.. خواتي من اودعهن
مامتعوده ع الفركه.. تريض خل اشوفنهن
انا ادري ومايصح ملكه.. عالصدري وخل اضمنهن


وي خواتي.. شيصير لو عالناكه اروحن. وي خواتي
وي خواتي.. وبالدرب لحسين اصدن.. وي خواتي

نعمه من ضلالي فاضل
عيني صدت للمحامل

بسلامه

*
جفيتوني ونحيل الحال.. وصفيت بروحي بس انعه
مفضوح الجفه يحسين .. اذا ابنادم لزم ضلعه

اكضي لليل اجر ونه.. ونه تخلف الحسره
اكولن مارفع جفه.. يجوز بهاي اله عبره
اثاري باجر منيروح.. تضل بس تسعه موعشره


تصب عيوني .. انا وليل وحسرتي .. تصب عيوني
تصب عيوني.. والهجر طفه شمعتي.. تصب عيوني

والدمع من عندي نازل
عيني صدت للمحامل

بسلامه
*
ادزلكم رسايل شوك .. وارد مناطره ابابي
ويجرحني الهوه ليفوت.. شايل ريحة احبابي

يبويه الفركه مو هينه.. حرمه بلا ولي صعبه
انا ادري ماترد وتعود.. حياتي صارت بغربه
ادور ذكره لك بالبيت.. عالراسي وهلت التربه


من جفاكم .. عاشرت روحي مصابي .. من جفاكم
من جفاكم .. ابد مافاركته بابي .. من جفاكم

حرمه وبلايه كافل
عيني صدت للمحامل


تعبت من الهجر يحسين .. اتاني وماخبر جاني
عاشرت الحزن والضيم .. الجرح يسكت يفز ثاني

هلي و عفتوني بالغربه .. يماتدروني وزغيره
يصح مثلك حظن دافي.. وانا ادردي ماالي غيره
بعيني والضعن كوطر .. يبويه بهتت الديره


ليه عودو.. الناس ماترحمني بويه ليه عودو
ليه عودو.. عالهجر ماني قويه.. ليه عودو

بويه محد عني سائل
عيني صدت للمحامل

بسلامه

*

علي غسان المياحي

وين ماتاخذني دنياي
بيك احس يحسين وياي
تارس ايدي شماردت خير
شكراً اعلة الخدمة مولاي
ــــــــــــــــــــــــــــــــــــــ
يانعمة الله اعلة الارض وعفو الله يوم الاخرة
المن شافني امتيه الدرب عدل طريقي بخنصرة
يالعاكد السان الكرم من لية عزب منحرة
وخليت على الدنية فضل لمن طحت فوك الثرة

حتى اعيش بعمري مرتاح
صار جسمك موطن اجراح
وحتى ماعيش الضمة ابيوم
فطّر اشفافك ضمة الماي
ــــــــــــــــــــــــــــــــــــــ
من اقرة ليك الناعية مو عن عبث لاعن عشك
خالقني ربي الخدمتك تفصال لجروح الطبك
لو خلصت كل عمري اون مااوفي دوسة من السحك
وابجفي ادك اعلة الضلع بلكت مثل ضلعك يطك

بالمجالس اخلع الثوب
عالترب جيف انتة مسلوب
وانة من اتهدل اعليك
حتى باجر تصبح افياي
ــــــــــــــــــــــــــــــــــــــ
محروك ما ادور اجر مادور ابجرحك ثمن
اقسملك ابحق فاطمة ابجيلك ابحركة ضعن
الذيج النساء البارزة البعد الدلال اتيسرن
الرسمتهن الدنية ابجرح وخلتهن ابحلك الزمن

من اون يحسين محروك
الزينب وصعدتهة عالنوك
والمحامل صارن ارماد
وخشنة ضهر الهزل اهواي
ــــــــــــــــــــــــــــــــــــــ
مستنبط احكام الهدم من الضلام البهدعش
وضل السواد اعلي رسم من جسمك ابغبرة انفرش
يحسين يا اكبر جرح وجه السمة اعليك انخمش
لوماي ما اشرب دهر وياك ما حس ابعطش

اشلون احس يحسين عطشان
وانه خادم اترف انسان
لون عمري ايخلص بكيض
ارتوي بذكرك على اشفاي
ــــــــــــــــــــــــــــــــــــــ
طوّلي عمري ارد اخدمك يحسين ماشابع لطم
عاشورك ايروح ويجي وانة الحسير المنهضم
اشتاك واحضر مجلسك شوك السجين المنحرم
والطملك ابكد حركتك واللطمة توصل للعضم

وين ماصح لية رادود
اكبالة اصير اعليك شادود
واجري دمعات المواسات
وعيني هاي اتسابك ابهاي

ذوالفقار الزيدي

لاتتوقع ايعدي... عاشورك دمع عندي
اله انصب عزائك. والدمائك
ابجي لو وحدي
........... ١..........
بدت قصت الجرح. وصبح فوك الرمح
حزنك روج بوسطه انه كطره
بأخ اجروحك تلكاني حسره
ذبيح اتصورك. واطيح بمنحرك
ماي اتبده انه علشفتك
شيسوه عمري بلا خدمتك
مااحسبهن ايامي. لوماهجن الامي
لومادكه صدري. شنهَو عمري
بلاجرح يدي
................ ٢.............
عزائك ينصب.. شرط وسط الكلب
ماي عيوني موزعه بسبيلك
وايبسلك من اذكر دليلك
علشفتك جم فطر . بوسط شمس الظهر
ذبلن يبسن من كد عطشهن
نحرك ثغرك صاير نعشهن
ليش الف وتسع ميه.. وانه ولاجرح بيه
بطفك راسي شايب . والمصايب
كلفه موكدي
............. ٣............
بسواد محرمك. اوشح مئاتمك
ونت ابالي الذبلانه شفته
شكثره الماي وشح ماشربته
بعدني بفطرتي. كلامي بدمعتي
وانت التقره ادموع اليخدمك
كلهه اتكلك شنهَو اليألمك
كل الي يخدمونك.. تمنو بس يشربونك
من دمع النواظر. والمشاعر
ماي الك نحدي
................. ٤............
بضواك اتمسكت. انه بخيرك عشت
ثوبك رفعه بكل المواكب
يسوه التاج الفوك المناصب
الجرحك ينحني. فقط هوه الغني
ياهو المثله الراضي بخدمته
الجاي بنيته بجفك رفعته
الماباجي على خيماتك. لامتشمله نظراتك
هنياله اليخدمك. باقي بسمك
ينصر المهدي
............ ٥..............
ربيت علئ اللجم.. اموت بلا لطم
رابي بحزنك وابقى اطيعك
وغيمه اتبده انه الرضيعك
لسبل دمعتي. واشكن هامتي
وخمش خدي الزينب بديه
واصرخ وسفه راحت سبيه
ولازم روحي اسبيهه. لرقيه وبواجيهه
حزنك بيه جمره. وناعي يقره
ودمعتي بخدي
.....................
بشار السامي