#Etiroz Yo mensishmaydi, yo rostdan ham ahamiyatsizmiz!
Balki e’tibor bergandirsiz, balki e’tiborga arzimas ham. Ammo yaqinda bir ma’lumot qidirish uchun yurtimizda mehmon bo‘lgan xorijiy kinoijodkorlarning instagram’dagi sahifasini “varaqladim”.
Achinarlisi shundaki, yurtimizga kelgan chet ellik hamkasblarimiz o‘zining instagram’dagi sahifalarida yurtimiz, yurtimizdagi kinoga munosabat, ularni kutib olganimiz, dabdaba bilan kuzatib qo‘yganimiz umuman hamkorligimiz haqida biror so‘z yozishmagan.
Misol uchun, Hindlar bilan hamkorlikda suratga olingan “Shod-u xurramlikda” deb nomlangan filmning bosh qahramonlari yoki film uchun maxsus ochilgan rasmiy sahifada ham O‘zbekiston yoki Samarqand, Buxoro haqida ham so‘z yo‘q. Lekin biz ular bilan hamkormiz, og‘zimizni to‘ldirib hamkorlikda film suratga oldik, deya eng ommabop saytlarimizda ham yozdik, instagram’larda o‘zlarini ham yoritdik. Afsuski ular…
Innankeyin, katta shov-shuv bilan yurtimizga shaxsiy tayyorasida kelgan “Ertug‘rul” seriali rejissori Mehmed Bozdag‘ ham o‘zining instagram’idagi rasmiy sahifasida biz bilan hamkorlik haqida lom-lim demagan. Bizchi, bizning telekanallarimiz, rasmiy saytlarimiz uning suratlari bilan to‘lib-toshdi. Madaniyat vazirining birinchi o‘rinbosari Ozodbek Nazarbekov bir necha marotaba o‘zining rasmiy sahifalarida u bilan tushgan suratini joyladi, hamkorlik boshlanayotgani haqida yozdi. Ammo Mehmedjon indamadilar, afsus…eng achinarlisi rahbarlarimiz unga MLN-MLN dollarlik loyiha bermoqchi. Ozod aka quvonib ketib uning kelgani bilan bog‘liq video ham joylabdilar.
Yana bir qiziq holat. Scorpion filmi suratga olindi, xabaringiz bor. Filmda “Osiyo” seriali orqali yurtdoshlarimizga tanilgan Murad Yildirim ham rol ijro etgan. Qiziq jihati Muradjon ham yurtimizga kelib, chiroyli, tantanali kutib olinishlar vaqtida instagram’dagi rasmiy sahifasiga film suratga olish jarayonlaridan fotolar muhrlagan edi. Yaxshi, chiroyli fotolar edi. Yaqinda qarasam o‘sha suratlar sahifasidan o‘chirib tashlangan. Faqatgina Scorpionning premyerasidan aks etgan video lavhani 2018-yil dekabr oyida joylagan xolos…(uni ham tez orada o‘chirib tashlamasa bo‘lgani, ishqilib…)
Ey, Feruz, o‘zing ham toza maydalashding, demang. Nega bizga bunaqa munosabat qilishadi, nega bizni mensishmaydi, nega biz ularga falon dollarlarni beramiz-u, ammo ular o‘zlarining rasmiy sahifasiga avval surat joylab, keyin o‘chirib tashlashadi. Axir bu o‘zbek kinosining xalqaro miqyosdagi imiji, axir bu bizning kinochilarga, kino mutaxasisslarga bo‘lgan e’tibor, axir bu ular tufayli ikki davlatning yana boshqa ijodkorlar bilan bo‘ladigan hamkorlik…
Bizga bizni mensimay qilingan hamkorlik kerakmi. Axir biz ularni yalinib chaqirmayapmiz, chaqirgan bo‘lsak jaraq-jaraq pulini to‘layapmiz, karnay-surnay bilan kutib olib, Mersning dodaxo‘jasida olib yurib, tayyoraning “iti”da yurtiga jo‘natmoqdamiz. Ularchi, bizning munosabatimizga rahmatlari shumi…
Jaloliddin Manguberdi haqida tarixiy serialni turk rejissori olarmish, yanvar oyida shu masala bo‘yicha mas’ul rahbarlar Turkiyaga borar emish… Bizni mensimagan, hatto yurtimizga kelib biz haqimizda ikki enlik yozmagan rejissor, o‘zbek haqida serial suratga oladimi? Bilmadim…Ertug‘rulini ham ko‘rdim (XULOSAM SHUKI, MENIMCHA PULIMIZ HAVOGA UCHADI)
O‘z qadrimizni o‘zimiz bilmaymiz.
Ishoning, bizga bunday hamkorlik kerak emas.
#FeruzMuhammad