Bugun ustozning tugʻilgan kuni!
SHUNDA
Shunda
yonoqlaring lovulladilar,
Shudring jarangladi gulbargga tomib,
Sochlaring yelkangda shovulladilar,
Koʻzlaringni yumib... koʻzlaringni yumib...
Shunda
men oʻzimni koyidim yomon:
Nega seni yomon koʻribman, dunyo?
Shunda
qudratingga keltirdim iymon,
Oʻzingga sanolar aytdim, rabbano!
Shunda
asal isin tuydi dumogʻim,
Koʻrdim – yellar yelar kapalak quvib.
Titradi taraddud bilan dudogʻing,
Koʻzlaringni yumib... koʻzlaringni yumib...
Shunda
bor umrimga afsuslar chektim,
Quzgʻun qanotidan yomgʻir kutibman.
Chorak asr yashab, yuz marta sevdim.
Oh, kimni sevishni bilmay oʻtibman!
Shunda
koʻzlarimni ochdi muhabbat,
Toshqinlar oʻtdilar qalbimni yuvib.
Sevgilim, sen endi ketmagin faqat
Koʻzlaringni yumib... koʻzlaringni yumib...
Iqbol MIRZO
@Fikrimcha_shu