Uyda ayol shoh boʻlsa

Sherdek yasha umringni,
Yoningda bir moh boʻlsa.
Quritadi shoʻringni,
Uyda ayol shoh boʻlsa.

Boʻlsa hamki davlati,
Maysadan past hurmati,
Esiz, erning savlati,
Uyda ayol shoh boʻlsa.

Erkakning oʻlgani - shu,
Sargʻayib soʻlgani - shu,
Qaro yer boʻlgani - shu,
Uyda ayol shoh boʻlsa.

Na jigar yoʻqlab kelar,
Goʻdaklar doʻqlab kelar,
Qizlari ermak qilar,
Uyda ayol shoh boʻlsa.

Bu dunyoda eng katta
Qilmish-u gunoh boʻlsa,
U ham aniq, albatta,
Uyda ayol shoh boʻlsa.

Ayolmas - uy erkagi,
Guruchlarning kurmagi,
Erkaklarning ermagi,
Uyda ayol shoh boʻlsa.

Farishtalar qon yigʻlar,
Gado-yu sulton yigʻlar,
Qoʻshilib osmon yigʻlar,
Uyda ayol shoh boʻlsa.

Ayolning oʻrni, axir,
Bosh emas, issiq bagʻir,
Allohdan shudir qahr,
Uyda ayol shoh boʻlsa.

Vafo Moʻmin, soʻzlaring,
Qaniydi, bir kor qilsa.
Oqib tushsin koʻzlaring,
Uyda ayol shoh boʻlsa.

©️ Vafo Moʻmin