【李傲然立法會棄戰九西 未決定會否排名單第二位出選】
立法會換屆選舉今年9月舉行,民主派力爭議會過半,但被中聯辦視為奪權,近期仲以「政治攬炒」追擊,仲來勢洶洶似乎準備大規模DQ,面對逆境,民主派唔理得咁多,勇往直前,但同樣面對艱難局面,有人選擇為大局退出,講緊嘅係一度諗過選九龍西嘅油尖旺區議員李傲然,為免建制派有機可乘,所以佢決定今屆唔參選。
雖知道港大法律系副教授戴耀廷牽頭協調民主派初選,想喺平衡各方利益之下集中票源,但全港5區都有多路人馬有意出戰,其中民主派評估最多只可取4席嘅九龍西,早前有多達15隊出席協調會議,其中1名有意去馬嘅油尖旺區議員、理大校董會學生代表李傲然今日喺FB宣佈,要退出成全大局。
李傲然話,過去兩次九西協調會議中,大致原則已經有共識,大家都認同全力抵制不義政權方向下進行,佢本身主張議會過半背後有共同綱領,所以對呢個成果樂見其成,但喺有成15隊名單有意出戰下,為免被保皇黨得利,佢現階段決定退出,唔會以名單第一位參與九西選舉,但佢就同八方講,暫時未決定要支持咩人,或者會唔會排名單第二名。
至於會唔會希望其他同路人都為大局諗清楚出唔出選?佢就話相信負責任政治人物會作負責任決定,自己不便評論。
建制派預料至少出3隊人馬戰九西,民主派要取4席絕不容易,而家除咗競逐連任嘅民主黨黃碧雲或袁海文、毛孟靜,仲有工黨代表、公民黨余德寶、民協何啟明、九龍城區議員曾健超、九龍城大小事主席馮達浚、大專學界國際事務代表團前發言人張崑陽、「暴動大狀」深水埗區議員劉偉聰等等有意參選。
https://hk.appledaily.com/local/20200503/R4VY3O743MXDZ7S5Y6G4OLYTSE/#九西 #李傲然