SO‘NGGI QO‘NGʻIROQ🔕
(Bu yilgi bitiruvchilar uchun)
Bir biridan farq qilar yillar,
Yig‘layapman ko‘zlarimda yosh,
Sog‘inchlarga to‘ladi dillar,
Omonmisiz aziz sinfdosh.
Vujudimni nimtalar bir oh,
Chalinmaydi so‘ngi qo‘ng‘iroq.
Ufqlarga termulib,unsiz,
Har dam sizni yodga olaman,
Yuragimda mudom ismingiz,
Nomingizni kuyga solaman,
Umidlarim sarobdir biroq,
Chalinmaydi so‘ngi qo‘ng‘iroq.
Yo‘limizga intozor maktab,
Diydorimiz kutar mung‘ayib,
Hijronlardan yaralangan qalb,
Nahot shunday ketsak ayrilib.
Ey aziz do‘st,ey aziz o‘rtoq,
Chalinmaydi so‘ngi qo‘ng‘iroq.
Nohaq dunyo,bag‘ritosh dunyo,
Tatirmidi diydorsiz yozlar,
Qadringizni bilmadik goho,
Rozi bo‘ling bizdan ustozlar,
Har so‘zingiz bizlarga saboq,
Chalinmaydi so‘ngi qo‘ng‘iroq.
Yangi orzu,yangi umidlar,
Chorlamoqda bugun bizlarni,
Qayda bo‘lmay,ko‘zda yosh bilan,
Sog‘inaman har dam sizlarni,
Qayda bo‘lsang omon bo‘l har choq,
Chalinmaydi so‘ngi qo‘ng‘iroq.
©Xurshid Karim
@kitobxon_kanali