الشاعر محمد هادي العقابي

صعب هذا الامر.....اشوفك منطبر
وعلى الشيبه الدمه
...............

بويه اشوفن هذا جرحك ماله طيبه
وحكه يابويه الكلب زايد نحيبه 
شلون يهده وطبرتك طبره عجيبه
اليوم زينب عدهه هاي اعظم مصيبه

تصد لبنيتك...تحرك شفتك
دموعي مولمه
...................

بويه التفارك ابوهه شلون تهده
وانته كتلي اني بحياتك اغله وحده
جرحك اتمنه يبويه بأيدي اضمده
بلكي تهده لو شفت زينب تشده

واشوفك مبتسم....صبح هذا حلم
ليالي مضلمه
.................

اليفكد الغالي يحن صبح ومسيه
راح افكدك بويه كلي شلون بيه
 اني بيك افتخر من تكبل عليه
منهو عدهه مثلي حماي الحميه

اضل بحيرتي....شينشف دمعتي
عليك معلمه
................

يعني عيني ماتشوفك بعد مره
اكطع الضنه وتضل بصدري عبره
بويه حاجيني واريدن ولو نضره
خاطري يابويه فدوه لاتكسره

اذا ناوي السفر....وراك اعمي النظر 
ير يحت فاطمه
..................

بويه وجهك كمت اشوفه كبالي يصفر
منين اجيبن امي هسه ويمي تحضر
احس كلبي ويه راسك بويه منطر
زينب بلايه الزجيه وطاح حيدر

يذوب بحركته...الكلب وي مهجته
من اصد حامي الحمه
................

كلي يابويه الوداع شلون وياك
ونته شمعت دارنا وياذينه فركاك
الدار ماتحله بعد بويه بالياك
راح اضل اشتاك كل لحضه اعله ملكاك

عباده شوفتك...يبويه وطيبتك
ملت ارض وسمه

محمد هادي العقابي

بالمحراب دمعات   لملاك السماوات
نزلت تنعه وتنوح   معروفه العلامات
اه يحيدر       اه يحيدر
...................

حزنك ايضل تارس الدنيه وهلهه
الما حزنلك ياعلي روحه شيكلهه
اعليك حته العرش دمعاته يهلهه
والاملاك اليوم ربك سامحلهه

تحضر هذا المصاب   دمك ياعلي خضاب
ياوسفه انته مطروح   الحيلك شاهد الباب
اه يحيدر        اه يحيدر
..................

يلي من خشية الباري تصب دموعك
وماتمرك سالفه اتغير خشوعك
تفكر باخرتك وساعة رجوعك
وتكرم السائل علي حته بركوعك

خاتم  للعبادات      بيمينك ولا بات
انطيته وفرّحت روح   اذتهه المعانات
اه يحيدر      اه يحيدر
..................

شكد تحب الناس ويقهرك بجيهه
وكلمت الحق على السانك تحجي بيهه
الوادم بخيرك تضل  متروسه اديهه
وبالشدد تندب علي وتفرج عليهه

يلي تجلي الهموم     بسمك نكعد انكوم
ذكرك يبقه مملوح     عايش بينه ويدوم
اه يحيدر         اه يحيدر
....................

نحچي عن ذاك الزمان البي محنتك
وياك راحت ياعلي وداعت غربتك
بي محنه وطيبه يابو الحسن وكتك
والله خسران الي مايحظه بعشرتك

ليت بعالمك ذاك      مخلوقين وياك
نتبعك وين متروح   مانتحمل اجفاك
اه يحيدر         اه يحيدر
................... 
 
ياعلي وياك عالفطره ابتدينه  
هل عشك من الله بالدم يسري بينه
احنه ماشفناك ونحبك ولينه
انته هم تحبنه حيدر رد علينه

احنه انحبك اهواي    ندريك انته وفاي
اتداوي الكلبه مجروح    بجروحك يمولاي
اه يحيدر          اه يحيدر
...................

يالچبير هواي خدمتنه قليله
واحنه من اذنوبنه الچفه ثجيله
نحلفك احنه بركضة اجدام  العقيله
بالحشر ردناك ياحيدر وسيله

الصعبه بجفك تهون   يالخلصت ذنون
والصك بيدك ايلوح      انته تگر العيون
اه يحيدر         اه يحيدر



محمد هادي العقابي

نادت بصوت اليتامه
ياعلينه بالسلامه

جامع شملنه    ياعلي
..................

انته جامع لشمل..واليتم ماينحمل
راح وياك العدل .. ماله جيه
شخصك فراكه صعب..كسر خاطر جم كلب..
يتاني كاعد بالدرب .. هل مسيه

صارت الدنيه مكّدره
واليتيم ايحير بأمره

شايل حملنه     ياعلي
........................

يالمفرح الما فرح..بعدك ايموت الفرح..
كل فرد بينه انجرح  .. ماله طيبه
خذت كلشي بروحتك..بينه ظلت طيبتك..
الگلب رايد شوفتك .. ياحبيبه 

تبقه نبظات بكلبنه
ياعلي بس انته حبنه

بحظنك تلمنه     ياعلي
.......................

مانلومه الي حزن..وخله دمعاته جرن
ماكو من عندك احن .. عاليتامه  
بليل شخصك ماكعد..خاف اكو جايع بعد
تشبعه وتنومه رغد .. ياامامه  

لايطر الفجر خوفك
ماتريد احد يشوفك

بس انته النه     ياعلي
.......................

المايشوفك ماكدر..على فراكك يانهر
تترس ابطون ونضر .. بالعطيه  
واليتامه تنتظر..هسه حيدرنه يمر
حضرلنه من العصر .. وياهديه  

حيدره وهذا طريقه
للكرم هوه الحقيقه 

شوفتك جنه     ياعلي
.........................

ابابنه محد يدك..ودكته دكت صدك
ناس ماعدهه خلك .. تسأل علينه  
معشر ايتامك هتف..ياعلي راسك نزف
ياهضيمه وللاسف .. رحت من ادينه 

منهو غيرك يبو الحمله
اعلينه يفتر ليل كله
 
تهود المنه     ياعلي



 محمد هادي العقابي

لسان حال اليتامه



وصيتمن ياحيدره بينه
بلايه وصيه ماتخلينه
توزع علينه الابتسامه
شكد ياعلي تحب اليتامه
.................

داريتنه بجف العطف غذتنه حنيتك
لديارنه اطب مبتشر جن داخل البيتك
صرت النه ياحيدر ابو ذوله احنه تربيتك
ماننجمع وكت الاكل اله اعله صينيتك

وي روحك مقصر تأذيهه
دكلهه اليتامه العندي شنطيهه
الليل اليمرك ماتنامه
شكد ياعلي تحب اليتامه
................

يالعلمتنه لشوفتك ماننسه اوصافك
دنيانه صارت مضلمه ياحيدره خلافك
واحدنه غارك بالحزن يتمنه لوشافك 
نذكر نكالك عالظهر ومهدله جتافك

مايوم مرت جسمك الراحه
بجالك الناس تنام مرتاحه
صارت على جتافك علامه
شكد ياعلي تحب اليتامه
  ...............

ياحيدره خلافك بعد منهو الي يفكدنه
يالي خذت دور الابو صرت انته والدنه
متحيرين وهل دمع بعدك ترس   خدنه
يتمنه  يلفيه  الاجل  وياك  واحدنه

مثل الهوه صرت انته بانفاسه
بعدك منو يمسح على راسه
ندعيلك دكوم بسلامه
شكد ياعلي تحب اليتامه
................

للبشر هذا انته صرت ياحيدره رمزه
بس انته تحترم الذي ماعنده وتعزه
وحجايت الفقره يحيدر كلبك تهزه
تجمعنه وبأيدك الطيبه تكسم الخبزه

بهل دنيه محد سوه معروفك
واعلينه طيب تنكط جفوفك
صرت انته عنوان الشهامه
شكد ياعلي تحب اليتامه
...............

ياحيدره بالطبره انته من صحت فايز
كل فرد من عدنه يحس بعده الك عايز
مانعترض عن هل امر كلشي الك جايز
بين اليتامه والفقر عمرك كضه تحايز

كلت الفقر لو زلمه اكتلنه...
حته الفقير بعيشه يتهنه
كدامك مخلي القيامه
شكد ياعلي تحب اليتامه



محمد هادي العقابي

يبو حسين   روح لله بالسلامه
يبو حسين   اني اسهر عاليتامه
ياشريچ  اسنيني 
ولدك بنص عيني
..................

ادري اليتم ماينحمل بس انته تعرف وضعه
ولجل اليتامه ياعلي عينك تصب الدمعه
انته صرت الهم ابو بكل بيت عندك شمعه
ماحسستهم باليتم هوه اليتم شيجرعه

يعيشون   من يشوفونك تجيهم
يعيشون   ضحك يتحول بجيهم
الليله من تجفيني
ولدك بنص عيني
....................

ام البنين آنه وإلي دور اليتامه اتحول
وبخدمتك يابه الحسن للموت ما اتململ
انته اليتامه ال عالارض  بيهم جنت تتكفل
ولولادك انه ياعلي خليني خدامه اقبل

يضلون   ساكنين بكلبي كلهم
يضلون   ياعلي ولدك شملهم
روح لتوصيني
ولدك بنص عيني
.....................

هنيالي وكضي هالعمر وياهم ويوميه
اكعد بنصهم ياعلي وتعلم الحنيه
من الدنيه كلشي ماردت بس ننجمع ليليه
من حسين كلمه والحسن وبنيتك المرضيه
 
بالانفاس   عندي صاير بس هواهم
بالانفاس   الهوه ماريده بلاهم
وبالوفه تدريني 
ولدك بنص عيني
.....................

مودع بالله ياعلي واطمئن من ناحيتي
خليني اخبرك فد امر ولدك تره عافيتي
وبالماي لو رشهم بشر رشيته انه بذريتي
من هسه وصيت الولد ونته تعرّف تربيتي

يكرار   الدنيه لو جارت عليهم
يكرار   ابو فاضل فدوه ليهم
وبني مايعصيني
ولدك بنص عيني
.....................

ماوالده منهم احد بس سكنو بدلالي
يابا الحسن صرت انه ام والحسن ابني الغالي
وحسين بيه اتعَلقّت روحي وجميع امالي
 وزينب الكسرت خاطرك والله تضل ابالي

عهد هاك   اخذه مني وللمنيه
عهد هاك   وشيمتي شيمه اعربيه
ما أعوفن ديني
ولدك بنص عيني
....................

ادري بوداعك موسهل يكسرهم ويكسرني
ولفراكك ادموعي تصب هليله من تهجرني
يابو المحنه بغيبتك بس الله اليصبرني
الجرحك لون روحي دوه انطيهه بس خبرني

تره العين   بعد مايكطع دمعهه
تره العين   طفو الليله شمعهه
تروح وتخليني
ولدك بنص عيني




محمد هادي العقابي

ليش الدمع عالوجنات
يادنيه ليليه ايبات
فكد الابو ماينحمل
وكسر الخواطر موسهل
ليش  ليش   هايدنيه
......................

بالغدر ماكو مثيلج    ماتعرفين الحنان
شلون يخلص تالي عمري  وانتي مابيج الامان
هواي راح اعيوني تسهر   بيج ويطول الزمان
شضامتلي يا  مصيبه  وياخرابه ويامكان

لاجمني كلبي ومالوم
منج شفت بس هموم
وهمومج التكتل كتل
وكسر الخواطر مو سهل
ليش  ليش  هايدنيه
.....................

عالمحنه شبيج انتي   تعتنين وبالحزن
ناسيه لوبيهه اذكرج    خذتي مني اطيب حضن
الزهره من راحت لهسه   اسهر الليل واون
خذتي شمعت عيني امي   والكلب ذاك اليحن

امي تضل وسط البال
وسهمج الليله الجتال
اكبار المصايب من تحل
وكسر الخواطر مو سهل
ليش   ليش  هايدنيه
....................

الحطني بعيونه ويكلي   انتي نبضات الكلب
وانتضر بابي يدكه        وعيني تربي اعله الدرب
هذا ابوي وكل حياتي   افراكه يهضمني وصعب
ادري مايسلم الطيب    بيج لازم ينضرب

هزيتي دين الاسلام
صوّبتي حيدر بالهام
دمعي على مصابه يهل
وكسر الخواطر مو سهل
ليش  ليش  هايدنيه
.........................

خذتي ابوي وكلشي بيّه   تهدم الهاذه الامر
بعد مايهنالي اعيشن    بيج يلطبعج جمر
عمري بوجوده شحلاته  وراح وياه العمر
شلون اكضيهه حياتي   و والدي بحضن الكبر

منج بنص  كلبي صواب
من الباب والهل محراب
وي والدي راح العدل
وكسر الخواطر مو سهل
ليش  ليش   هايدنيه
..........................

ميته بعيوني يدنيه     انتي من كد الضلم
انه زينب شنهي ذنبي   ومنج اشبع بس هظم
بيج ابوي انصاب راسه  وجازيه الطبره العضم
اليله ياعظم المصيبه     من ابوي انه  انحرم
 
يادنيه مومال افراك
كلساع احنن وشتاك
من وجهه والله ما امل
كسر الخواطر مو سهل
ليش  ليش  هايدنيه


محمد هادي العقابي

يابويه تدري معلمه       انضر إلك  وشوفك
هليله يانبض الگلب      مقسوم الي اعوفك
................

من كبل ماشفتك انه..يتجولك بمشيتك
ولاشفتك بهاذا الوضع..والدم ترس لحيتك
لاتخمش كليبي بخبر..وتكلي اجت منيتك
ومعافه اريدنك ترد..سالم تضوي بيتك

شلون اصبر ودمعي يصب    واني الهج ابحروفك
هليله يانبض الگلب    مقسوم الي اعوفك
..................

بيك الزمن لامارحم..ياحاميّ الحميه
ونته علي وشفت العجب..وتحملت اذيه
ومن بعدك ايجور الزمن..ياوالدي عليه
بدنية عذاب اكضي العمر..واتكبع ابرزيه

عنك الوادم تختلف   من الله انته خوفك
هليله يانبض الگلب   مقسوم الي اعوفك
..................

الكاع الوسيعه بهل مسه..بعيني زغر كُبرهه
يابو الدلال بطيحتك..زينب هجم دهرهه
ويه الحزن مترافكه..وروحي انتهه امرهه
بهل دنيه مكتوب القدر.. زينب حنّت ظهرهه

فكد الزجيه وغيبتك   وانحرم من جفوفك
هليله يانبض الگلب     مقسوم الي اعوفك
.................

التفكد ابوهه بلاوطن..تكضي العمر هضيمه
من زغري مفجوعت كلب..من راحت الرحيمه
ابلا ام صفيت ولا ابو..والدنيه صارت هيمه
يابو اليتامه زينبك..صارت صدك يتيمه

اتمنه يغمضلي جفن  مشتاكه انه الطيوفك
هليله يانبض الگلب   مقسوم الي اعوفك
...............

هم  وحزن  ون وبجي.. وحيل انتعب كياني
وذكرك وحكك ياعلي..طابع على لساني
مايبقه غالي امن الاهل..هذا وعد زماني
وسهامه سددهه علّي..وبكلبي صوباني

ششكف شصداً ياسهم   وانته انتهت ضروفك
هليله يانبض الگلب       مقسوم الي اعوفك
..................

هليوم اعوفك والدي...وصط الكبر يغالي
ياريت وياك اندفن...ولاشوف انه الجرالي
يلتسهر الليل بدمع..انه اسهر الليالي
وابجي وانوح الفركتك..دمع الفكد حلالي

بعيوني ريتك تندفن   وكل ما رّمشت اطوفك
هليله يانبض الگلب     مقسوم الي اعوفك



محمد هادي العقابي

هوسه للإمام الحسن ع

عن حاتم الناس تسولف بصيته
زلمه والفرس هيه المعليته
تضيع اكبال زاد الحسن صينيته
أهو الوحي الله عاش سنين نص بيته
وين ايصير حاتم لون خليته
 حاتم عالسفره يلم بيهه


 محمد هادي العقابي

ولاده كريم اهل البيت  الإمام الحسن المجتبى



يحظر اليوم الموالي....والهتاف بصوت عالي
احله فرحه بهل زمن....مولد ايمامي الحسن

....................

نزلت الاملاك كلهه تهني طه بهل ولاده
والحضر هليله ربنه اله يحسبهه عباده
والف هنياله التعنه وشارك بفرحة اسياده
والموالي العنده حاجه خل يجي وياخذ مراده

يرجع ومسرور لهلا....الحاجه عند الحسن سهله
ماكو من عنده احن....مولد ايمامي الحسن
..................

صوت عالي من الموالي يهتف وفرحان كلبه
يهني حيدر والزجيه وعالوجه مرسوم حبه
الف مبروك الولاده كلمه خلص بيهه دربه
خالصه نيت حضوره قربتاً بيكم الربه

زرع بين ظلوعه حبكم....وكلبه نبضاته بأسمكم
حاضر وكلبه انفتن....مولد ايمامي الحسن
...................

يشعل اشموع وفرحته بجيتك صارت جبيره
يالحسن ونته إمامه وشاف بين ايدك مصيره
الدنيه لومابيهه انته واهلك تصبح عسيره
يبن حامي الجار حيدر جفه عالفقره يديره

ونته ابو جفوف الكريمه...فوك راس الشيعي خيمه
والكرم عندك سِكن...مولد ايمامي الحسن
.................

الكون هاي اليله كله بيك هايم وبتشر لك
ساعه جدك ساعه امك ساعه حيدرنه يحملك
والحضور بصوت واحد ياهلا بجيتك يكلك
مولدك خير وسعاده تعنو احبابك الاجلك

تارس الدنيه ضيائك...الشيعه محتاجه دعائك
بيك تنزاح المحن...مولد ايمامي الحسن



محمد هادي العقابي

مبارك عليكم حلول شهر الرحمة والمغفرة شهر ضيافة الله تعالى الله يتقبل الاعمال
#اسالكم_الدعاء