Rivoyatlar

Тонг ва кечқурунда

Абу Ҳурайра розияллоҳу анҳудан ривоят қилинади:
Расулуллоҳ соллаллоҳу алайҳи васаллам: «Ким эрталаб ёки кечқурун:

سُبْحَانَ اللهِ وَبِحَمْدِهِ

«Субҳаналлоҳи ва биҳамдиҳи», (Аллоҳга ҳамд айтиш билан Уни айбу нуқсонлардан поклаб ёд этаман), деб юз марта айтса, қиёмат куни бирор киши ундан афзал бўлмайди. Фақат ана шу киши айтганидек ёки ундан ошириб айтсагина, бўлиши мумкин», дедилар.

Имом Муслим ривоятлари.

Абу Довуднинг ривоятларида:

سُبْحَانَ اللهِ العَظِيمِ وَبِحَمْدِهِ

«Субҳаналлоҳил ъазийм ва биҳамдиҳи», деб келган.

Расулуллоҳ соллаллоҳу алайҳи васаллам қизларининг биридан ривоят қилинади. У зот қизларига тонг отганида:

سُبْحَانَ اللهِ وَبِحَمْدِهِ لاَ قُوَّةَ إِلاَّ بِاللهِ مَا شَاءَ اللهُ كَانَ وَمَا لَمْ يَشَأْ لَمْ يَكُنْ، أَعْلَمُ أَنَّ اللهَ عَلَى كُلِّ شَيْءٍ قَدِيرٌ، وَأَنَّ اللهَ أَحَاطَ بِكُلِّ شَيْءٍ عِلْمًا

«Субҳаналлоҳи ва биҳамдиҳи, ла қуввата илла биллаҳи машааллоҳу кана ва ма лам йаша лам йакун. Аъламу анналлоҳа ъала кулли шайин қодийр. Ва анналлоҳа қод аҳато бикулли шайин ъилма», деб айтишни ўргатар эдилар. Чунки бу калималарни тонг отганида айтган киши кеч киргунича муҳофаза қилинади. Кеч кирганида айтса, тонг отгунича муҳофаза этилади.
(Маъноси: Аллоҳга ҳамд айтиш билан Уни поклаб ёд этаман. Аллоҳдан бошқада қувват йўқ. Аллоҳ хоҳлаган нарса бўлади. Хоҳламаган нарса бўлмайди. Биламанки, Аллоҳ ҳар бир нарсага қодирдир. Ва, албатта, Аллоҳ ҳар бир нарсани илми билан иҳота қилгандир.)

Абу Довуд ривоятлари.


Дўстларингизга ҳам улашинг👇
══════ ❁✿❁ ═════
☪ @Rivoyatlar ☪
➖➖➖➖➖➖➖➖➖

Етти Ер (ёки етти қават Ер) ҳақидаги ҳадислар ва Аллоҳ таолонинг «Аллоҳ етти осмонни ва Ердан ҳам ўшанча миқдорни (етти қаватни) яратган зотдир. (Аллоҳнинг) амри (фармони) уларнинг (осмон ва Ер) ўртасида нозил бўлиб турар. Токи сизлар Аллоҳнинг барча нарсага қодир эканини ва Аллоҳ барча нарсани (Ўз) билими билан иҳота қилиб олганини билишларингиз учун (У шундай қилди)» деган қавли ҳақида («Ат-Талоқ» сураси, 12 оят)
(Етти Ер - ҳар қайсиси алоҳида бир курра ёки шу биз турган Ернинг ўзи етти қават, яна Аллоҳ таолонинг ўзи яхшироқ билади).

Муҳаммад ибн Иброҳим ривоят қиладилар: «Абу Салама ибн Абдурраҳмон ер ҳақида одамлар билан хусуматлашиб қолиб, Оиша онамизнинг ҳузурларига кирдида, шу ҳақда у муҳтарамага айтди. Оиша онамиз: «Эй Абу Салама, ер ҳақида эҳтиёт бўлгин, чунки Жаноб Расулуллоҳ саллаллоҳу алайҳи ва саллам: «Бир қарич келадиган ерни (бўлса ҳам) зулм билан ўзлаштириб олган кимса бўйнига етти қават Ердан иборат тавқи (лаънат) илинади!» - деб айтганлар», - дедилар».

Солим оталаридан бундай деб эшитган эканлар: «Расулуллоҳ саллаллоҳу алайҳи ва саллам: «Кимки ўзининг ҳақи бўлмаган ердан (бир қаричини тортиб) олса (ҳам), Қиёмат куни ўша ер билан етти (қават) Ер тубига тушиб кетади», - дедилар».

Абу Бакра разияллоҳу анҳу ривоят қиладилар: «Расулуллоҳ саллаллоҳу алайҳи ва саллам бундай деб айтдилар: «Замон Аллоҳ таоло осмонлару Ерни яратган кундаги ҳайъатидек (бир бор) айланиб бўлди. Йил ўн икки ойдан иборатдир. Улардан тўрттаси муқаддас бўлиб, ана шу тўрттадан учтаси - зулқаъда, зулҳижжа ва муҳаррам ойлари кетма-кет келади, тўртинчиси - ражаб (музар) ойи эса жумодассоний билан шаъбон ойлари оралиғидадир».

Ҳишом ривоят қиладилар: «Арва деган бир аёл Саъид ибн Зайд ибн Амр ибн Нуфайл билан ер ҳақида хусуматлашиб қолиб, унинг устидан Марвонга шикоят қилди. Шунда Саъид: «Худо ҳақи, мен Расулуллоҳ саллаллоҳу алайҳи ва салламнинг «Бир қарич келадиган ерни (бўлса ҳам) зулм билан ўзлаштириб олган кимса бўйнига етти (қават) Ердан иборат тавқи (лаънат) илинади!» деб айтганларини эшитганман, шуни била туриб наҳотки унинг ҳақига кўз олайтирсам!» - деди».

Ҳишом: «Саъид менга: «Мен Расулуллоҳ саллаллоҳу алайҳи ва салламнинг ҳузурларига кирдим» - деб айтди», - дейдилар.



Дўстларингизга ҳам улашинг👇
══════ ❁✿❁ ═════
☪ @Rivoyatlar ☪
➖➖➖➖➖➖➖➖➖