مسلم من هجم عالكوم زلزل بيهم الكوفه
نسخه من علي الكرار عزمه وهيبت جفوفه
####################
دخل للكوفه متعني بعزم وبنخوه وبهمه
تحزم بالكمر عباس وماخذ غيره من عمه
تعنه وشايل بصدره رساله من ابو اليمه
مضمون الرساله يكول
تبين صحة المرسول
لحسين الغده مكتول
بغدرهم وألزمن شاهد وهاي افعال معروف
####################
تلكت طوعه مسلمه تكله والدمع همال
دكوم وراوي هالعسكر عليك بهل وكت ينهال
يمسلم خلي بالتاريخ صوره لهل اثر تنكال
صورة تضحيه وعبره
تخلد بيها هالثوره
وطريقك لابد اتنوره
ابيت الهادي والقران الخطت للهدى احروفه
####################
اشوفنك يبعد الروح جدمك ينگل ابحيره
ماتدري لوين تروح ووجهك المن أديره
تعال وادخل ابعيني وأصيرلك انه انصيره
تكله ماالك صحبان
وبعيده عنك الخوان
غدرو بيك هالعدوان
هذوله الغدرو بعمك نفسهم همه بالكوفه
#####################
توضه وصله فرض الموت وهده لحسين ركعاته
تحضر للقتال يريد يصول بذيج صولاته
والجيش برعب يحسب لحظه بلحظه ساعاته
ضَل يلمها ويطشر
ورأس برأس ضَل يشمر
اليقره بسيفك ويبحر
يشوف الموت بيد الموت يشك والدنيا متروفه
####################
من هد مسلم اعله الكوم صال وزمجر وكبر
خزرت عينه تجدح موت وسلة سيفه موت احمر
عليمن مرتفع هالصوت ولمن لمة العسكر
جن البرز حامي الجار
وصال ابصولة الأحرار
ودخل كل اميه إنذار
كلها تصيح جن حيدر مو مسلم تره نشوفه

##################
من طب مسلم الكوفه ضلت حايره هالناس
ضنت حيدر الجاهم وخافت ما تدير الراس
وناس اتكول مو مسلم هذا البرز جن عباس
ناس اتخيلت حيدر
وناس من الرعب تعثر
تعال وشاهد المنظر
تطاير غدة هالروس وجثث عالكاع مكشوفه

#####################
#سيد_محسن_الجابري