حميده بت مسلم ع تخاطب عمها الحسين ع

ياعمي مشتاكه .. چايمته نتلاكه
وليمته اتاني .. بـس لا نساني
________________________
عمي جاوبني ولتخفي عني لتضم الخبر
امبينه نضرة عيونك بيها حسرات وقـهر
سـافر ومارد ابويه كـلي شو طال السـفر
كلبي ياذيني من اذكره والدي چنه ابخطر

جاوبني دلالي .. عن غربة الغالي
مـسلم يعاني .. بس لا نساني
_________________________
كلبي مفجوع بغيابه وحيلي مايحمل محن
ترخص اسنيني لغربته وعيني ياريت انعمن
امنور ايامي بوجوده چان بس هسه انطفن
الفاكد الخيمه الجبيره يگضي عمره بلا وطن

تتسلب الغيمه .. وتاليها بالهيمه
اتعيش الاماني .. بـس لا نساني
_________________________
الطفله لبعمري يعمي تصير كون مدلله
تضحك الدنيا بوجها وتفرح ابكلمة هله
ضني المسافر يجيب البنته لعبه معدله
طَـوْل وصارت لعبتي ارمـاد نار وسنسله

بلخيمه لعبونه .. وكاموا يضربونه
بالسوط اجانـي .. بـس لا نساني
__________________________

ستغربت ياعمي لمن شفتك اكبالي صرت
ومن شفت مخطوف لونك والله بيك تحيرت
تمسح براسي وسألتك وانته ابـد ما جاوبت
كلبي جاوبني بمكانك كلـي يـعني تـيتمت

تتيتم احلامي .. بجروحي والامي
فكده السباني .. بس لا نساني

__________________________
كلبي مايحمل سوالف غربه وايتام ونعش
وهالخبر ياعمي والله حته نساني العطش
ليلي يخنكني بحسرته وجرحه ويايه غبش
الچنت افرش ضحكته ويلي عالكاع انفرش

وصلتلي حسراته .. والهسه چلماته
تـون بـأذانـي .. بـس لا نـسانـي
__________________________
دمعه واهات ابسنيني والجرح خضر جرح
بعد ابوي الغالي يعني بعد ما يطلع صبح
اخر الكلمات احجي واختصر بـيها الشرح
صدك ياعمي ابويه مرمي من فوك السطح

جاوبها بالنظره .. وافتهمت الفكره
بهـاي الثـواني .. بـس لا نساني

#سيد_محسن_الجابري