"So'nggi Samuray""Liverpul" sport direktori Maykl Edvardga havas qilaman. U matbuot yoki mashhurlikni yoqtirmaydi, jimgina o'z ishini ajoyib tarzda uddalaydi. Uning ijtimoiy tarmoqlarda birorta sahifasi yo'q, u ham mayli birorta fotosi ham yo'q. Faqat sport direktori sifatida tanishtirilgan kuni tushgan rasmi, va o'yin kunlari stadionda tushgan fotolari mavjud xolos. Edvards haqida keyinroq batafsil yozarman. Gap bugun boshqa narsa haqida.
"Liverpul" "Zalsburg" futbolchisi Takumi Minaminoni xarid qilishi mumkinligi haqida eshitgach, dastlab, buni doimgidek mish-mish bo'lsa kerak deb o'yladim. Keyin Jeyms Pirs, Melissa Redi, Devid Meddok va "Zalsburg" rasmiy sayti ham tasdiqlagach, bu transfer amalga oshishiga ishonchim komil bo'ldi.
Minaminoning o'yinlarini ko'p kuzatmaganman. Qisqa "haylayt"larini ko'rib chiqdim. Yaxshi futbolchiga o'xshayapti. "Enfild"dagi o'yinda ham "Liverpul"ga rosa bosh og'riq bo'lgandi. Takumi universal futbolchi, "Zalsburg" tarkibida ikkala qanot hujumlarida ham, markaziy hujumda ham, maydon markazida ham harakat qilgan. Pressingda yaxshi harakat qiladi, yaxshi driblingga ega. 24 yoshda, ancha tajriba to'plashga ham muvaffaq bo'ldi. Futbolchiga faqat "Liverpul" emas, "Manchester Yunayted", "Milan" va yana bir qancha nemis jamoalaridan jiddiy qiziqishlar bo'layotgandi.
"Liverpul" mana shunday futbolchini 7,5 mln. evaziga qo'lga kirityapti. Bu hozirgi paytda arzimagan pul. Qanday qilib deysizmi? Hammasiga Maykl Edvards sababchi. U 2 yil oldin Nabi Keyta transferi borasida ish olib borayotgan paytda "Red Bull" vakillari bilan yaqindan tanishgan va do'st bo'lib qolgan ekan. Bu jamoaga yangi universal futbolchidan tashqari boshqa imkoniyatlarni ham beradi. Chunki, "Liverpul" "Nike" bilan yangi shartnoma orqali Osiyo bozoriga kirib borishni xohlayapti. Yaponiyaliklar sevimli futbolchisi bo'lgan Takumi orqali esa bu ish yanada osonlashadi. Millionlab futbolkalar sotish mumkin. Hali transfer rasman amalga oshmadi, lekin bugunning o'zidayoq APLda "Uotford"ga qarshi uchrashuv oldidan matbuot anjumaniga yaponiyalik jurnalist tashrif buyurdi. Bu tasodif emas, albatta.
"Zalsburg"ga qarshi mehmondagi uchrashuv oldidan, Minaminoni "Liverpul" vakillari 6 haftadan beri kuzatib kelayotgan va transfer borasida deyarli kelishuvga erishib bo'lgan ekan. Bu haqida Klopp, albatta, xabardor bo'lgan. Uchrashuv yakunlangach, asosiy futbolchilar van Deyk va Henderson Klopp oldiga kelib, ushbu futbolchini jamoaga olib kelish uchun xarid qilishini so'rashgan. Klopp esa buni eshitib o'zini kulgidan to'xtata olmagan. Sababi esa Klopp ushbu futbolchini xarid qilishni allaqachon hal qilib qo'ygan.
Kloppning xursandchiligining boshqa sababi bor, chunki u xohlagan futbolchini o'z futbolchilari o'ziga taklif qilishmoqda.
Minaminoning jamoaga qanchalik moslashib keta olishi, uning qanday o'yin ko'rsatishi bu boshqa masala.
Avvalroq, yangi mavsumga tayyorgarlik ko'rayotgan "Manchester Yunayted" yozgi tayyorgarlik o'yinlaridan birini "Sporting"ga qarshi o'tkazishadi. Tanaffus paytidayoq Aleks Fergyuson oldiga Ferdinand va himoyachilar kelib, "Sporting"dagi bir bolakayni xarid qilishini so'rashadi va Fergyuson ushbu futbolchini xarid qiladi. Bu bolakay keyinchalik dunyoning eng yaxshi futbolchisiga aylanadi va 5 marta YeChL g'olibligini qo'lga kiritadi.
Biror bir futbolchining qanchalik zo'r o'ynashini, o'yinni sirtdan kuzatayotgan muxlislar, o'z jamoadoshlari yoki tahlilchilar emas, aynan unga raqib bo'lgan futbolchilargina juda yaxshi his qilishadi. Uning yaponiyalik ekanligiga yoki narxiga qaramang!
Dunyoning ayni damdagi eng yaxshi jamoasi futbolchilari Takumini xarid qilishni so'rashdimi, demak u chindan ham zo'r.Sardor Ollamberganov