Endi Matematika fani oʻquvchilarga darsda olgan bilimlarini hayotda qoʻllashga oʻrgatadi
Matematika fanidan Milliy oʻquv dasturini tuzish ishlari 2019-yilning noyabr oyidan boshlangan. Uzoq davom etgan muhokamalar, amaldagi dasturning yutuq va kamchiliklariga oid tahlil, jamoatchilik va olimlar fikri, xalqaro tajriba, xorijlik ekspertlar ishtirokidagi oʻquvlar natijasida qariyb bir yildan soʻng zamonaviy andozalarga xos dasturning yaratilishiga zamin yaratdi.
Respublika taʼlim markazi qoshida tuzilgan, Oʻzbekistondagi yetakchi matematik olimlar, malakali amaliyotchi oʻqituvchilardan iborat Ishchi guruhga UNICEF tomonidan jalb qilingan britaniyalik ekspert Metyu Goldiye-Skott bosh ekspert sifatida tanlandi.
Matematika dasturi loyihasini tayyorlash mobaynida bir necha marta xalqaro oʻquv va muhokamalar oʻtkazildi. Xususan, joriy yilning 25-iyulida Buyuk Britaniyaning “Cadbury Sixth Form College” kollejida faoliyati olib borayotgan matematik, yurtdoshimiz Mardon Yusupov ishtirokida muhokama tashkil qilindi.
“Dasturni tuzishda Singapur davlati, Oskford universiteti darsliklaridagi tajribalar inobatga olingan.
Unda matematik kompetensiyalar hamda muammolarni yecha olish koʻnikmalarini qoʻshilgani eʼtiborga molik. Shuningdek, statistika va ehtimollar nazariyasiga urgʻu berilgani ham dasturning asosiy jihatlaridan biridir”,- deydi Mardon Yusupov.
Shuningdek, joriy yilning 17-sentyabrida UNICEF tashkiloti koʻmagida Kembrij universitetining Matematika faniga oid bir qator darslik va qoʻllanmalari muallifi Marselo Starikoff ishtirokida Matematika darsliklarida hayotiy koʻnikmalarni rivojlantirishga yoʻnaltirilgan oʻquv dasturida oʻquvchining ijodiy va tanqidiy fikrlashni ragʻbatlantirishga bagʻishlangan xalqaro seminar tashkil qilindi.
Taqdim qilingan dastur loyihasi oʻquvchilarning darsda olgan bilimlarini hayotda qoʻllay olish layoqatini rivojlantirishga yoʻnaltirilgan. Uni oʻqitishda mavzular spiralsimon koʻrinishda tanlangan, yaʼni bir xil mavzular har yili sinflar kesimida soddadan murakkabga tomon oʻzgarib boradi. Mavzular ketma-ketligida Matematika fanining boshqa fanlar bilan uygʻunligi ham eʼtiborga olingan.
Matematika fanidan Milliy oʻquv dasturi qiziqarli va mantiqiy masalalar, loyiha ishlari orqali oʻquvchilarni mantiqiy va ijodiy, nostandart fikrlashga, muammoga yechim topishga va ijodkorlikka yoʻnaltiradi. Uni ishlab chiqishda Matematika fanini oʻqitish sohasida muayyan yutuqlarga erishgan Singapur, Yaponiya, Buyuk Britaniya, AQSH, Rossiya, Belorussiya davlatlari tajribalari inobatga olingan.
Istiqbolda ushbu dastur asosida zamonaviy darsliklar, “Oʻqituvchi kitobi”, oʻquvchilarning mustaqil faoliyatini qoʻllab-quvvatlash uchun “Oʻquvchi daftari” yaratiladi. Shuningdek, Matematika fanidan oʻquvchi oʻzlashtirgan koʻnikmalarni baholashning milliy tizimi joriy etiladi.
Kanalga obuna bo`lish:👇👇👇
Telegram|
Facebook|
Instagram