قصيدة لطلب الحاجات بحق سيدتي ومولاتي ام البنين عليه السلام

على الله وعليهــه ـ نجا الينتخيهـــه
الحسن شفتة بيهه ـ الكريمة الوجيهة
~~~~~~~~~~~~~~~~~~~
ام البنين تگول وينه النخانــــي
لا و الخلق عباس ما أگصر انــي
لو طلبتك شتصير تاخذهه منــي
انة النطيت اسباع سهلات ذنــي
اقره الحمد بدموع واعقد النيــة
تاخذ الردته اليوم من عم رقيــة

الذكرني ذكرته ـ النخاني حضرتـه
انشف دمعتـــه ـ واطيبهه علتـــه
~~~~~~~~~~~~~~~~~~~
المشه علية احسين واجب اعينـــــه
لتضــــن يردك يوم چـف الحنينـــة
الطفله مريض وگال منچ اريـــــده
وعبد الله ..هسه يگوم سالم اوليـده
حاجتك يالمحتاج مگضية بس كــــون
تبچي اعله زينب دوم وتهل العيــون

الشريفة السبوها ـ وحگ راس اخوهـا
وحگ شيب ابــوها ـ تره انسه النسوها
~~~~~~~~~~~~~~~~~~~
غير انة ام عبــاس ذاك الفداهــــه
وگطع اچفوف اثنــين يطلب رضاهه
غير انة ام الگــال يختي بخدمتـــچ
بس لا اشوف تســيل عالخد دمعتچ
غير انة ام الجاب النــهر مچتـــوف
وطشاه حدر الخيــام وعيونچ تشوف

نذرته لخيتــه ـ بيمينة ويسرتـه
الچ اني جبـته ـ يوافي برگبتـه
~~~~~~~~~~~~~~~~~~~
لساني عذر ماشال انة ام الجــــواد
ام البنين اشلون ماتنطي المــــــراد
للحاير المسكين چفي يصب خيــــــر
ياهو النخاني وشاف من عندي تقصير
والسهم والعامود والراية والجــــود
والضل بلا تغسيل عالغبرة ممـــدود

العذر ماحچيتـه ـ نساني ونسيتــــه
النخاني اعتنيته ـ احضرة بمنيتـــــه
~~~~~~~~~~~~~~~~~~~
والمشت دون اخوان وأزرگ متنهــــه
لا.. ماگلت للناس ساعة حزنهـــــــه
والخنصر المگطوع والداسته الخيـــل
انة الصبح للعاش كل دنيتــــــه بليل
انة الضوه بكل دار انـــة ام البنيــــن
منك ردت بس هاي دمعة اعلة الحسين

القرالي قصيدة ـ يبچيني اريـــــده
يطيب وريـــده ـ الصرخ هذا عيــده
~~~~~~~~~~~~~~~~~~~
واسوني لتگصرون مختنگ صــدري
واسوني بالمذبوح ودمومه تجــري
واسوني بالعباس الماعاف اخيــــة
وما شرب دون حسين گطرة اميــة
واسوني لاتنسون ضيمي وغربتــي
كل الدهر ياناس تنسمع ونتــــــي

المصايب دهتني ـ الليالي ولتنــي
يصبحني حزني ـ ويمسيني ونــي

(لخادمكم الشاعر وسام الغراوي)
م- ٠٧٨٣٤٤٨٣٦٣٣