Давлат қабул комиссиясига мурожаат!
Ҳурматли, Давлат қабул комиссияси раиси ва аъзолари.
Сизларнинг қимматли вақтларингизни ортиқча олиш ниятим йўқ, шу сабабли ўқишга кира олмай қолган 900 минг абитуриентларнинг бир илтимосини қисқароқ қилиб етказмоқчиман.
Гап супер-контрактлар ҳақида.
Ўқув йили бошланиб кетди, лекин ҳалигача супер-контракт нархлари маълум эмас. Юз минглаб инсонлар буни интиқлик билан кутиб, аросатда юришибди. Аммо гап бу ҳақда эмас.
Муаммо бошқа жойда. Жорий йилда илк марта учта йўналишга ҳужжат топширилди. Бу кўпчиликни қувонтирди. Ўз навбатида кўплаб саволларни келтириб чиқарди. Шулардан бири: учта йўналишдан йиқилган абитуриент ўзлари истаган йўналишида супер-контрактда ўқий оладими?
Ҳозир абитуриентларга фақат биринчи йўналишда супер-контрактда ўқий олиш мумкинлигини айтишмоқда ва 2 ҳамда 3-йўналишдаги ОТМлар аризаларни қабул қилмаяпти. Аммо буни қуйидаги асосларга кўра,
адолатсиз ва мантиқсиз, деб ҳисоблайман.
Биринчидан, мантиқан ўйлаганда ҳам ўша абитуриент учала йўналишдан йиқилган. Буни ҳеч ким инкор қилмаса керак. Айтайлик, абитуриент қуйидаги учта ОТМга ҳужжат топширган эди:
1) ЎзМУ;
2) СамДУ;
3) Шарқшунослик.
Абитуриент учала йўналишда ҳам танловда иштирок этиб, ўз бахтини синаб кўрган. Ва учаласига ҳам кира олмаган, яъни барчасидан йиқилган. Энди у, айтайлик Шарқшуносликда супер-контрактда ўқимоқчи. Нима учун бунга қаршилик қилишимиз керак? Ахир у Шарқшуносликка кира олмагани ростку! Супер-контрактнинг асосий қоидаси ҳам ўқишдан йиқилган абитуриентнинг қўшимча квота асосида қабул қилиниши эмасми?
Иккинчидан, фақат биринчи йўналишни танлай олишига асос сифатида Вазирлар Маҳкамасининг 393-сонли қарори билан тасдиқланган Низомнинг 25-бандидаги “абитуриентнинг тўплаган баллари у танлаган учала бакалавриат таълим йўналиши бўйича етарли бўлмаган тақдирда, унинг тест синови натижалари биринчи таълим йўналишида эълон қилинади” деган қоидани келтиришмоқда.
Аммо бу банд ҳуқуқий жиҳатдан қўшимча қабулга таъсир ўтказа олмайди. Бирорта Низомда
абитуриент фақат биринчи йўналишда супер-контрактда ўқиши мумкинлиги ҳақида қоидалар мавжуд эмас.
Учинчидан, агар йиқилган абитуриентнинг бали фақат биринчи йўналишда эълон қилиниши ҳақидаги қоида жуда муҳим деб ҳисобланган тақдирда ҳам, амалда ДТМ сайтида абитуриентнинг бали
барча йўналишларда эълон қилинганини унутмаслик керак. Қоида бўйича тест натижалари расман ДТМ сайтида эълон қилинади. Cabinet.dtm.uz ёки mandat.dtm.uz саҳифаларида эса учала йўналишга ҳам кира олмаган абитуриентларнинг баллари учала йўналишда ҳам эълон қилинди. Демак, ўз-ўзидан юқоридаги банд супер-контрактга амалда таъсир кўрсатмайди;
Тўртинчидан, ижтимоий адолат деган тушунча бор. Қани энди инсоф билан айтингчи, абитуриентлар қабул жараёнлари бошланмасидан олдин, агар учала йўналишдан ҳам йиқилса, фақат биринчи йўналишни танлай олишлари ҳақида бирор марта огоҳлантирилдими? Уларга бу тартиб тушунтирилдими? Йўқ, йўқ ва яна йўқ! Бас, шундай экан, ҳозир уларнинг ҳуқуқини чекловчи бундай қарор қабул қилиш қай даражада адолатли?
Бешинчидан, қонунларни қўя турайлик, келинг инсонпарварлик нуқтаи назаридан ўйлаб кўрамиз. Ҳукуматга ўқишдан йиқилган абитуриентнинг 2 ёки 3-йўналишда супер-контрактда ўқишига тўсқинлик қилишидан нима фойда? Шуни кимдир тушунтириб бера оладими? Бундан таълим тизимига қандай наф бор? Шахсан мен ҳеч қандай фойда кўрмаяпман.
Ҳурматли, Давлат қабул комиссияси масъуллари!
Илтимос, ҳеч бир мантиқли асоси бўлмаган ҳолда абитуриентларнинг эркинлигини чекловчи қарор қабул қилманг. Уларнинг ўз хоҳишлари бўйича ўзлари танлаган исталган йўналишда ўқишлари учун имкон беринг. Ўзи шундоқ ҳам бунақа катта сумма тўлаб, ўқий оладиганлар сони кўп бўлмайди.
Шунча пул тўлаганга яраша, уларга эркинлик, шароит ва имконият ҳам бериш ҳар томонлама тўғри бўлар эди, менимча.
Эътиборингиз учун раҳмат.
@Xalqning_sevimlisi
