Savol-javoblar | Oila

Majburmanmi?

Assalomu alaykum.

Meni bir savol anchadan beri qiynayapti. Yaqinda o‘qituvchi sifatida maktabda ish boshladim. 4-kurs paytim turmushga chiqqanman va shu yilgi kontrakt pulini turmush o‘rtog‘im to‘lagan. Shuningdek, ishga kirishimga ham biroz muomalasida yordam bergan edi.

Endi "oylik olsang, hammasini onamga ber" deyaptilar. Lekin men bir oy mehnat haqqimni ularga berishga majburmanmi? Ular ikkovi ishlashadi. Shuningdek, turmush o‘rtog‘im kontrakt va ishga kirishim uchun ketgan xarajatlarni qaytarishim kerakligini aytmoqda.

Nima qilsam to‘g‘ri bo‘ladi?

G'iyosiddin Yusuf:

— Va alaykum assalom. Majbur emassiz, lekin oila tinchligi uchun shunday qilganingiz ma'qul.

#Muammo

Oilaviy muammo haqida

Assalomu alaykum.

Kelin bo‘lib tushganimga bir yildan oshdi. Uydagi holat haqida maslahat so‘ramoqchiman. Bizning oilamizda uchta qayni opam bor, xo‘jayinim esa yagona o‘g‘il. Shu vaqt ichida ikkinchi qayni opam deyarli har oyda xo‘jayinimdan katta miqdorda pul so‘raydi. Hatto uning 20 millionlab qarzlarini ham yopib berdi. Bu holat qayta-qayta takrorlanaveradi va xo‘jayinim bundan juda asabiylashadi, jahli chiqadi.

Xo‘jayinim qiynalayotganini ko‘rib, men ham xafa bo‘laman. Sog‘lig‘i bu holat tufayli zarar ko‘rayotganidan xavotirdaman. Biz shunchaki oddiy oila bo‘lib yashayapmiz, shaharda ijara uyda turamiz. Topgan daromadimiz hamma qatori, alhamdulillah, yetkazishga harakat qilamiz. Ammo qayni opam o‘zining ukasi haqida o‘ylamayapti. Kecha yana katta miqdorda pul so‘radi, shu sababli xo‘jayinim kechasi bilan siqilib chiqdi. “Nega bunday qilaveradi? Menga nahotki o‘z opamni rahmi kelmaydi?” deb aytib, juda siqildi.

Bu haqida qaynonamning xabari yo‘q. Xo‘jayinim menga bu masalani hech kimga aytmaslikni tayinladilar. Ammo men bu holatga yechim topishni xohlayman, chunki xo‘jayinimning sog‘lig‘iga zarar yetishini istamayman. Shu sababli, bu masalani qayni opam bilan ochiqchasiga gaplashib tushuntirsam yoki qaynonamga aytsam, to‘g‘ri bo‘larmikan?

Bu holatda qanday yo‘l tutganimiz ma’qul? Iltimos, maslahat bering.

G'iyosiddin Yusuf:

— Va alaykum assalom. Unday qilmang. Xo'jayiningizning o'ziga yotig'i bilan tushuntiring: o'zidan orttirib, imkon qilsa, yordam qilsin, bo'lmasa, uzr aytadi. Siqilib, asabiylashib yuradigan holat emas-ku!

#Muammo

To'g'ri qildimmi?

Assalomu alaykum, yaxshimisiz, ustoz?

Mening uch nafar farzandim bor. Hammasi o‘smir yoshida: 14 yoshli o‘g‘lim, 12 yoshli qizim va 10 yoshli kichik qizim. Ularning tarbiyasida biroz qiyinchilik bo‘lyapti. Shu masalada ikki savolim bor edi. Javob bersangiz, xursand bo‘lardim.

1. Ehson uchun yig‘ayotgan pulimni sanab qo‘ymagandim. Keyin kamayib qolganini sezib qoldim. Farzandlarimga ehson pulini olish mumkin emasligini yaxshilab tushuntirgan edim. Shunga qaramay, o‘g‘lim 100 ming so‘mdan ko‘proq pulni olib, shirinlik va paqildoq uchun ishlatganini bilib qoldim. Uni yaxshilik bilan chaqirib gaplashdim, hech kimga aytmaslikka va’da berib, sekingina bilib oldim.
O‘g‘lim: “Adamga aytmang, iltimos”, — dedi.
Men: “Xo‘p, lekin boshqa bunaqa qilmaslikka va’da berasanmi?” — dedim.
U: “Xo‘p”, — dedi.

Biroq ichimda bir xavotir bor. To‘g‘ri ish qildimmi deb o‘ylayapman. Adasiga bundan keyin o‘g‘limizga ko‘proq pul bering desam, bu to‘g‘ri bo‘larmikan?

2. Katta qizim buvisining telefonidan kanal ochibdi. Boshida indamadim, chunki taqiqlasam, mendan yashirib ishlatadi deb o‘yladim. Keyin qarasam, erta-yu kech buvisining telefoni qo‘lida. Ochgan kanalida yomon narsa yo‘q, lekin foydali ham emas. Vaqti bekor ketayotganini ko‘rib, hammasini o‘chirishini aytdim va buvisiga boshqa telefon bermasliklarini iltimos qildim. Men to‘g‘ri ish qildimmi?

G'iyosiddin Yusuf:

— Va alaykum assalom. Ikkala ishingiz ham to'g'ri. Umumiy ba'zi tavsiyalar beraman:

▪️farzandlaringizni ham ehson qilishga qiziqtiring;
▪️ehsonga yig'ayotgan va boshqa pullaringizni ham pullaringizni bolalar bilmaydigan, topa olmaydigan, ola olmaydigan joyga qo'ying;
▪️farzandlaringizga moliyaviy savodxonlik, pul bilan muomala borasida bilim bering. Savolingizdan kelib chiqib, bolalar uchun yozgan yangi kitobimdagi shunga o'xshash mavzuni dars qilib berishni o'yladim, blogimni kuzatib boring;
▪️farzandlaringizga yetarli pul berish bilan birga, ularni pulni o'rinli sarflash, ehtiyojlari uchun pul yig'ishni o'rgating;
▪️ ularni behuda ishlardan tiyishga harakat qilishingiz yaxshi, shu bilan birga, qiziqishlaridan kelib chiqib, foydali ishlar bilan band qiling.

#tarbiya

Shaxsiy chegaralar muammosi

Assalomu alaykum. Turmush qurganimizga 2 yil bo‘ldi. Onamnikiga kelgan paytlarim qayniukam yotoqxonamizga bemalol kirib, erim bilan birga yotib qolayotganini bilib qoldim (xuddi bolalik paytidagidek aka-uka bo‘lib yotishadi). Bu holat xo‘jayinimga oddiy tuyilayotgandek, lekin menga mutlaqo yoqmayapti.

Ustiga-ustak, xo‘jayinim xizmat safarida bo‘lganida yoki men uyda bo‘lmagan paytlarda ham qayniukam bizning yotoqxonamizda bemalol televizor ko‘rib, hatto kechasi ham yotib qolarkan. Maktabni bitirgan kap-katta yigitning farosati bunday qilmaslikka yetmagandek, qaynonam va erim ham bu holatni ko‘rib indamayaptilar.

Bundan tashqari, men yo‘q paytimda xonamizga boshqalar ham bemalol kirib chiqib yurishar ekan. Bu vaziyat meni noqulay ahvolga solyapti, lekin xo‘jayinimga qanday tushuntirishni bilmayapman.

Nima maslahat berasiz? Javob uchun oldindan rahmat.

G'iyosiddin Yusuf:

— Va alaykum assalom. "Shaxsiy chegara" degan narsa bor, yotoqxonangizga imkon qadar farzandlaringizni ham kiritmaslikka harakat qilish kerak — boshqalar u yoqda tursin.

Shuni turmush o'rtog'ingizga yotig'i bilan tushuntirishingiz kerak. Xonangizda xos kiyimlar, shaxsiy narsalar bo'ladi, bularga hech kimning ko'zi tushmasligi kerak. Shuni ayting.

Onangizning uyiga yotib qolgani ketmaslikka harakat qiling, xonangizni qulflanadigan qilinglar, ikkalangiz ham yo'g'ingizda qulflab yuringlar. Qaynukangiz ko'rishi uchun boshqa xonada TV qo'yib beringlar.

#Muammo

Farzandga arab alifbosini o‘rgatish

Assalomu alaykum.

5 yoshli o‘g‘limga arab alifbosini o‘rgatmoqchiman, lekin u bu jarayonga jiddiy qaramaydi va ko‘pincha kulib yuboradi. O‘rgatgan harflarni eslab qolishi ham qiyin. Yaxshi gapirib ham tushuntirdim, urishib ham ko‘rdim, lekin unchalik natija bermayapti.

Mayda suralardan endigina bittasini yodlab oldi, esda qolishi qiyin bo'lyapti. Shu holatda qanday yo‘l tutsam bo‘ladi? Javobingiz uchun oldindan rahmat.

G'iyosiddin Yusuf:

— Va alaykum assalom. To'garakka bering, mening "Arab alifbosi" nomli kitobimni olib bering.

#Tarbiya

Yangi oyi kerakmi?

Assalomu alaykum. To‘yimizga bir yarim yil bo‘ldi, 5 oylik farzandimiz bor. Erim to‘yimizdan avval meni yillar davomida yoqtirib, ota-onasiga “bundan boshqasi kerak emas”, deb muhabbat bilan uylangan.

To‘ydan keyin esa tashqi ko‘rinishimdagi ayrim nuqsonlar (yoshligimda tez vazn tashlaganim uchun teri osilishi va cho‘zilish izlari, gormonal o‘zgarishlar tufayli intim a’zolarimdagi qorayishlar) sababli o‘zlarini mendan uzoq tutib yura boshladilar.

Boshida yosh bola kabi, bunday munosabatlarini boshqa bir ayolni yoqtirib qolganlari sababli menga e’tiborsiz bo‘lib qoldilarmi deb o‘ylab, ko‘p araz qildim, janjallashdik. Keyinchalik bu muammolarni tushunib, ko‘rinishimni yaxshilashga harakat qildim, lekin hech qanday muolaja foyda bermayapti.

Hozir esa bir-birimizga mehr va e’tiborimiz yo‘qolganini his qilyapman. Xatolarimni anglab, uzr so‘radim. Oilamizni saqlab qolish uchun nima qilish kerakligini so‘rasam, “Nimani aytyapsan? Nima bo‘lyapti? Hammasi joyida”, deb gapirishni istamaydilar. Lekin men ularning ko‘ngli qolgani va mendan uzoqlashgani sezilib turibdi.

Yarim yildan beri bu muammoni hal qilish uchun qo‘limdan kelgan barcha harakatni qilyapman, lekin foydasi bo‘lmayapti. Ba’zan, “Bolamga yangi ona kerak, yangi kelin olib kelish kerak”, degan gaplaridan yuragim orqaga tortadi.

Oilamiz buzilishini istamayman, lekin qanday yo‘l tutishni bilmayapman. Javob uchun oldindan rahmat.

G'iyosiddin Yusuf:

— Va alaykum assalom. Harakatda davom etavering, tushkunlikka tushmang. Siz aytgan narsalarning davosi bor va munosabatlarni ham yana yaxshilash mumkin deb o'ylayman.

#Muammo

Yurakdagi tugunlar

Assalomu alaykum. Men qizligimda 10 yil davomida faqat bitta yigit bilan xat yozishib turardim. Bir-birimizni yoqtirar edik. Keyin u yigitning oilasi meni kelin qilishmadi, men esa boshqasiga turmushga chiqdim. Alhamdulillah, farzandlarim bor va baxtliman.

Ammo har kecha tushlarimda uni ko‘raman. Ko‘chalarda uchratib qolsam, yuragim o‘ynaydi. Uni ko‘p o‘ylayman va unuta olmaganim uchun ko‘p yig‘layman.

Iltimos, menga maslahat bering. Ota-onam yoshligimda olamdan o‘tgan, shuning uchun u yigitga qattiq bog‘lanib qolganman. Rahmat.

G'iyosiddin Yusuf:

— Va alaykum assalom. O'tmishda qilgan ishlaringiz uchun tavba qilib, uni unutishingiz lozim. Allohdan qo'rqing, turmush o'rtog'ingizga xayolan xiyonat qilyapsiz!

Eringizga ko'proq e'tibor bering. Uning yaxshi sifatlarini ko'proq o'ylang, ko'proq unga bog'laning. Asosiysi esa Allohga bog'lanish, albatta.

#Muammo

Bola uyqu rejimini to‘g‘ri yo‘lga qo‘yish

Assalomu alaykum!

Ikki yarim yoshli o‘g‘lim kechqurun uxlashga ko‘nmaydi, qo‘yib bersak, yuraveradi. Bu masala bo‘yicha qanday maslahat berasiz?

G'iyosiddin Yusuf:

— Va alaykum assalom.

Ikki yarim yoshli bolaning kechqurun uxlashga qiyinchilik bo'lishi tabiiy hol, chunki bu yoshda ular juda faol bo'ladi, atrof-muhitni o‘rganishga qiziqishadi. Lekin bu borada quyidagi tavsiyalar sizga biroz yordam berishi mumkin:

1. Kun tartibini to'g'ri yo‘lga qo‘ying: har kuni bir vaqtda uyg‘otish va yotqizishga odatlantiring. Bola organizmi bu rejimga moslashadi.

2. Ekrandan foydalanishni chegaralang: kechqurun kompyuter, planshet, telefon oldida vaqt o‘tkazishini cheklang. Uxlashdan oldin tinch, osoyishta muhit hozirlang.

3. Uyquga tayyorlang: har kuni uyqu oldidan bir xil odatlarni shakllantiring, masalan, issiq vanna qabul qilish, kitob o‘qish yoki sokin ohang eshitish. Bu bilan bolaning miyasi uyqu vaqti kelganini anglaydi.

4. Qulay sharoit hozirlang: bola yotadigan xonaning yorug‘ligi, harorati va sokinligiga e'tibor qiling. Ortiqcha shovqin yoki yorug‘lik uxlashga xalaqit beradi.

5. Ovqat va ichimlikka e’tibor bering: uyquga yaqin shirinliklar yoki kofeinli mahsulotlar iste’molini cheklang.

6. Qat’iy bo‘ling: bola uxlashdan oldin turli bahonalar bilan vaqtni cho‘zishga harakat qilishi mumkin. Mehribon, lekin qat’iy bo‘lib, uning yotishini talab qiling.

Agar bu choralar yordam bermasa yoki bolada uyqu bilan bog‘liq doimiy muammolar bo‘lsa, pediatrga murojaat qiling.

#tarbiya

Alohida yashash masalasi

Assalomu alaykum.

Men turmush qurganimga 4 yil bo‘ldi. Yoshligimdan erim va farzandlarim bilan alohida yashashni orzu qilganman. Turmushga chiqqanimda qaynonam o‘zlari alohida yashashlarini aytgan edilar. Ammo faqat 1 yilgina alohida yashadik, hozir ular bilan birgamiz.

Bu holat menga umuman yoqmayapti. Xohlagan ishlarim va o‘qishlarimga ulgurmayapman, ular bilan yashasam asabiy bo‘lib qolayapman. Alohida yashashga sharoitimiz bor, lekin bu haqda aytsam meni yomon ko‘rib qolishlaridan xavotirdaman.

Nima maslahat berasiz? Qanday yo‘l tutay?

G'iyosiddin Yusuf:

— Va alaykum assalom. Birga yashashga moslashing, asabiylashmang, asabiylashadigan narsa emas! Ishlaringizni tartiblab ulgurishga harakat qiling.

#Munosabatlar

Oilaviy muhit

Assalomu alaykum.

Mening qizim dindor, Qur’on yo‘nalishida talaba. Sovchilar kelyapti. Ularning orasidan bir yigitni ona sifatida qizimga munosib ko‘rdim. Xulqi go‘zal, namozxon yigit. U bo‘lajak farzandlari uchun soliha qizga uylanishni istab, qizimni so‘rab keldi.

Lekin yigitning otasi, ya’ni oila boshlig‘i, benamoz kishi ekan. Qizimizni o‘sha oilaga bersak, u benamoz kishiga xizmat qilib yashashi mumkinmi? Qizimizni zoye qilgan bo‘lib qolmaymizmi? Shu masala bo‘yicha xavotirdamiz. Maslahat bering.

G'iyosiddin Yusuf:

— Va alaykum assalom. Bersangiz bo'ladi.

#oila_qurish

Tengimni topolmayapman

Assalomu alaykum. Yoshim 25 da, lekin hali menga yoqadigan inson uchramadi. Ammo bir inson bor — akamning do‘sti. U men o‘ylagandek odamdek tuyuladi, lekin nimadir deyishga uyalayapman. Ko‘rganda bir-birimiz bilan gaplashmaymiz.

U inson ham hali juftini topmagan. Men qiz bola bo‘lganim uchun bu masalada xijolat bo‘lyapman. To‘g‘ri, Xadicha onamiz o‘zlari sovchi bo‘lganlar, lekin hozir zamon boshqa. Keyin odamlarning gapi ham bor. Shu sabab o‘ylanib qoldim. Sizdan maslahat so‘rayapman: nima qilishim kerak?

G'iyosiddin Yusuf:

— Va alaykum assalom. Biror dugonangiz orqali onangizga yetkazsangiz, ular akangiz bilan gaplashsalar bo'ladi.

#oila_qurish

Onam norozi

Assalomu alaykum. Bir dindor yigit sovchi yuborgan edi. Ularning uylarida ishlari ko‘pligi va sharoitlari yaxshi emasligi sababli onam rozi bo‘lmaganlar. Otam esa vafot etgan.

Men yigit bilan bir-birimizga ma’qulmiz. Ularning oilasi to‘rt marta kelishdi, ammo onam: “Sizlarga beradigan qizim yo‘q”, — dedilar. Men tushuntirishga harakat qildim, lekin onam tushunmayaptilar.

Nima qilishni maslahat berasiz? Agar onam rozilik bersalar, yigitning ota-onasi onamning avval ularni xafa qilganini yuzimga solishmaydimi deb o‘ylayapman. Bu holat meni o‘ylantirib qo‘ydi.

G'iyosiddin Yusuf:

— Va alaykum assalom. Onangiz rozi bo'lgan munosib kishiga turmushga chiqing.

#Oila_qurish

402-savol: To'yim yaqin — yoqtirgan yigitim bor!

Assalomu alaykum. Yoshim 22 da, deyarli 8 oy oldin o‘zim bilan teng yigitga unashtirildim. Bir oydan keyin to‘yim.

Lekin meni yoqtirgan insonim bor. Sovchilar kelib, oiladagilar meni unashtirmoqchi bo‘lganida yoqtirgan yigitimning oilasi uni uylantirishga rozi bo‘lmagan. Men bu haqda ota-onamga aytolmadim. Keyinchalik bilsam, men unashtirilgan yigitning ham yoqtirgan qizi bor ekan. Lekin uning yoshi katta bo‘lgani uchun ota-onasi qarshilik qilgan.

Ba’zida unashtirilgan yigit bilan sal tortishib qolsak, u mendan baxtsizligini aytadi. Men bu vaziyatda nima qilishim kerak? Bir oydan keyin belgilangan to‘y taqdirga tan berib, jim turishim kerakmi? Bizning nikohimiz to‘g‘ri bo‘ladimi? Javob uchun oldindan rahmat.

G'iyosiddin Yusuf:

— Va alaykum assalom. Shuning uchun yoqtirishib, gaplashib yurmaslik kerak! Men bu nikohni tavsiya qilmayman.

#Oila_qurish

Yanada ko'proq savol-javoblar

401-savol: Muhabbatda g‘urur bo'lmaydimi?

Assalomu alaykum va rohmatulloh.

“Muhabbatda g‘urur bo‘lmaydi”, degan fikringizni eshitgandim. Lekin ba’zi holatlarda insonning mag‘rur holda ketishiga to‘g‘ri keladigan vaziyatlar uchrab turadi. Bunga qanday qaraysiz?

G'iyosiddin Yusuf:

— Va alaykum assalom va rahmatullohi va barakotuh. Bu haqida ham aytgan gapim bor.

Mana.

#Munosabatlar

Yanada ko'proq savol-javoblar

400-savol: Ko'nglim g'ash

Assalomu alaykum va rohmatulloh. Yoshim 23 da. Shu kungacha kelgan sovchilarga ko‘nglim bo‘lmadi. Asosiy sabab — diniy fikrlar va dunyoqarash mos kelmaganida. 10 kun avval bir insonga rozilik berildi.

U inson diniy bilimga ega, ammo o‘zlariga juda e’tiborsiz: kiyinishlari va o‘zini tutishlari ko‘nglimni sovityapti. Shuningdek, moliyaviy masalada qattiqqo‘l ekanlar. Tibbiy tekshiruvga borganda biroz tobim qochdi, lekin e’tibor bermadilar, hatto oddiygina suv olib kelmadi. Tekshiruvdan ortib qolgan pullarni ham so‘rab oldilar.

Bugun fotiha bo‘lishi kerak, ammo ko‘nglim mutlaqo xotirjam emas. To‘xtamasdan istixora qilyapman, lekin bu insonni qabul qila olmayapman. Shu bilan birga, vijdonim qiynalyapti: “Umid berib, yarim yo‘lda tashlab ketamanmi?” — deb o‘ylayapman. Qo‘ni-qo‘shni xabar topgan, gap-so‘z chiqishidan ham qo‘rqyapman.

Iltimos, ustoz, menga tezroq maslahat bering. Nima qilishim kerak?

G'iyosiddin Yusuf:

— Va alaykum assalom va rahmatullohi va barakotuh. Kiyim-boshiga e'tiborsiz bo'lganini tuzatish mumkin: ayol kishi parvarish qiladi. Pulga qattiqqo'lligiga chidasa bo'lsa kerak — ehtiyojlarni qondirsa. Shu bilan birga, oila ko'rmagani uchun bu borada qanday yo'l tutishni bilmasligi mumkin hali. E'tiborsizligi yaxshi emas lekin.

Istixoraga, ko'nglingizga qarang. Hamma gap sizda qolibdi. Istasangiz, shu joyda to'xtating. O'zingizni majburiyatli his qilib, oila qurib, keyin bir umr qiynalib o'tgandan yoki ajrashib ketgandan ko'ra hozir to'xtatish yaxshiroq.

#Oila_qurish

Yanada ko'proq savol-javoblar

399-savol: Farzandga to‘g‘ri yo‘l ko‘rsatish

O‘g‘lim talaba, bir qiz bilan tanishgan. U qiz uzoq viloyatdan. O‘g‘limni xafa qilib, ko‘nglini og‘ritishdan qo‘rqaman. Qizning qanday oilada ulg‘aygani, ota-onasi kimligi haqida hech narsa bilmaymiz. O‘g‘lim ham uni yaqindan tanimaydi.

Gap orasida aytib, ogohlantirib qo‘yaman: “Bu qizga uylanolmaysan”, — deb. Siz nima maslahat berasiz? Farzandimga qanday yo‘l ko‘rsatay?

G'iyosiddin Yusuf:

— O'g'lingiz qizlar bilan tanishib, gaplashib yurmasin. Agar o'sha qizga uylanishni istasa, uzoq viloyatdan ekani muammo emas, tanishingizning tanishini tanishi orqali bo'lsa ham surishtirib, qiz haqida ma'lumot olish mumkin. Faqat ishonchli kishilar bo'lsin. Siz xolis bo'ling, niyatni yaxshi qiling.

#Oila_qurish

Yanada ko'proq savol-javoblar

398-savol: Injiq er

Assalomu alaykum. Turmush qurganimizga uch yil bo‘ldi. Kenja kelin bo‘lib tushganman, katta hovlida yashayman. Erimning fe’l-atvori juda injiq, doimo e’tibor talab qiladi, nima desa, aytgani bo‘lishi shart. Qanchalik harakat qilmay, hamma ishimdan ayb topadilar.

Hech qachon meni qo‘llab-quvvatlamaydilar, qiyin vaziyatlarda suyanch bo‘lmaydilar, tushunishni ham xohlamaydilar. Telefonda qo‘ng‘iroq qilsam, olmaydilar. Safarga chiqib ketsalar, har kuni 24 soat hol-ahvol so‘rashim kerak, yozgan xabarlariga darhol javob yozishim shart. Agar sal e’tiborsizroq bo‘lib qolsam, urish chiqazadilar.

Pul so‘rasam bermaydilar, “Hamma narsang bor” deyishadi. Kunda arzimagan sabab bilan janjal chiqadi. Nima qilishimni maslahat bering, ustoz. Oldindan rahmat.

G'iyosiddin Yusuf:

— Va alaykum assalom. Bunchalik injiqlik qilmasligini so'rab o'zi bilan ochiq gaplashib oling. Bunchalik emas-da! Yosh bola emas-ku!

#Muammo

Yanada ko'proq savol-javoblar

397-savol: Juda charchadim

Assalomu alaykum. Turmush qurganimizga bir yil bo‘ldi, kichkina farzandimiz bor. Farzandli bo‘lganimdan keyin ancha kuchsizlanib qoldim. Uy ishlariga va ayrim vazifalarga ulgurmayapman. Xuddi miyam tormozlanib qolgandek his qilyapman, lekin bu holat ixtiyorimdan tashqarida bo‘layapti.

Natijada ko‘p kelishmovchiliklar yuzaga kelmoqda. Hattoki, turmush o‘rtog‘im ham ba’zan meni tushunmayaptilar. Juda charchadim bunday janjallardan. Tinchlik xohlayapman, ketib qolishni o‘ylayapman. Nima qilishni bilmayapman. Nahotki insonning qadri faqat uy ishlari yoki ayrim narsalar bilan o‘lchanadi?

G'iyosiddin Yusuf:

— Va alaykum assalom. Bunday vaziyatda er xotinni tushunishi, yordam berishi kerak. Albatta, insonning qadri uy ishlari bilan o'lchanmaydi, siqilmang. Sabr qiling. Salomatligingizni tiklashga, ruhiy holatingizni yaxshilashga harakat qiling.

#Muammo

Yanada ko'proq savol-javoblar

396-savol: Yangi oiladagi sinovlar

Assalomu alaykum. Yangi oila qurganmiz, hali yarim yil ham bo‘lmadi. “Boshlanishida asal oyi bo‘ladi, bir-biriga yaxshi ko‘rinadi, ayblar ko‘rinmaydi” deyishardi. Lekin biz oila qurganimizdan buyon juda yaxshi chiqisha olmayapmiz. Ular e’tiborsiz, hamma narsani avval mendan kutadilar, ba’zida arazlab gaplashmay ham qo‘yadilar.

Meni xafa bo‘lishim ularga ta’sir qilmayapti. Borgan sari ko‘nglim sovib ketyapti. “Sinov oyi yoki yillari bo‘ladi” deyishardi. Bu shumi bizda? Sabr qilishim kerakmi? Nima qilishni, orani qanday isloh qilishni bilmayapman. Tushkunlikka tushib qoldim. Maslahatingiz kerak.

G'iyosiddin Yusuf:

— Va alaykum assalom. Siqilmang, aytganingizdek, bu sinov davri. Juftliklar bir-birini tushunib, qadriga yetadigan bo'lishi uchun ba'zida yillar kerak bo'ladi. Siz uning ko'ngliga yo'l topishga, ayollik vazifalaringizni komil ado qilishga astoydil bo'lavering. Duoda bo'ling. Alloh oson qilsin!

#Muammo

Yanada ko'proq savol-javoblar

395-savol: Faqat uxlaydigan xotinlar qadrlimi?

Assalomu alaykum va rohmatullohi va barokatuh. Savolimni inobatga olib, javob bersangiz mamnun bo‘lardim.

Nega hech narsaga ep bo‘lmagan, na pazanda, na ozoda, faqat o‘z qulayligini o‘ylaydigan va uyqudan boshqaga vaqt ajratmaydigan xotinlar eriga sevimli bo‘ladi-yu, epli, ozoda, pazanda, chaqqon, ilmli, hamma havas qiladigan ayollarni eri qadrlamaydi?

G'iyosiddin Yusuf:

— Va alaykum assalom va rahmatullohi va barakotuh. Unday emas, bu sizning kuzatuvingiz, sizning qarashingiz, xolos. Hamma erkaklar epsiz, faqat uxlaydigan xotinni yaxshi ko'radi deyish mutlaqo xato tushuncha.

Agar siz eplik, ozoda, pazanda, chaqqon, ilmli, hamma havas qiladigan ayol bo'lsangiz-u, turmush o'rtog'ingiz qadrlamayotgan bo'lsa, bunda muammo unda, sizda emas va hamma u kabi degani emas!

#Munosabatlar

Yanada ko'proq savol-javoblar