#قصيدة_القاسم
لسان حال والدته



جبتها لجاسم وياي... طاست حنه مو ماي
سالفة عرسه عجيبه... هو شاب بخلك شيبه
طاست حنه مو ماي


********

اول جرح... صار الصبح
شفت الولد ينكط محنه وطيبه
بالبسلمه... شايل هلا
للسيف جم ضحكه قره بترتيبه

كتله يابعد امك احجي وكال يمه احسين اعشكه
ما اعيش بلايه عمي وحسرته كامت تخنكه

منها واعرفت الورد رايد يروح
وكام من كصته بس غيره يفوح

حسين لوليدي طبيبه... هو شاب بخلك شيبه



************

راح بخلك... ينضح عشك
كل شيءٍ في سبيل حسين يعلو
ينكَل جدم... من الخيم
يصيح يمه كلشي للزهراء ينمو

فدوه اروح لكلبك انه وللحسين اتروح فدوه
خاف ارجع من يكلك لازم اتكله امشي كوه

كتله صعبه صح فركتك يا ترف
لجن فدوه اتروح لعيون الكلف

ضحك وعيونه لحبيبه.... هو شاب بخلك شيبه

**********

هاي النفس... من العرس
ذبلت وراح الولد بالطف يغاتي
بهذا الهوا... راح الضوه
وراحن بنص كربله كل امنياتي

كومي زينب خل نسوي اعله الاهل اكبر عزيه
سهله نبجي وننحب احنه الله اليعين الزجيه

رايحلها شجم كمر وبلايه روس
والهضيمه الخيل فوكاهم تدوس

طبرته براسه غريبه...  هو شاب بخلك شيبه


*********

من الضما... كل الدمه
حار ينزل عالوجه وبعيني شفته
بدمعة حزن... كلبي اليون
دمه بالحنه يهل وادم عجنته

ابني راح وروحي ظلت كل عمرها بس تعاني
بحظني جان وصعبه والله الرمل ياخذ مجاني

انه امه وحكي يالوادم اذكره
يساعد الله حسين من شاله علصدره

اجدامه بادت يا مصيبه.... هو شاب بخلك شيبه

********

شحجي بعد... عن الولد
والسوالف خلصن وكليبي ناح
ابن الحسن... عندي وطن
وطاح حيلي من شفت علكاع طاح

صحت يا عباس اخيتك اخذه من حسين وخره
تعب مايحمل ذخرنه والحوافر تجي لصدره

كلت يارمله المشه منج ولي
وعيني زينب عاليسر انت وعلي

ابني رايح وشيجيبه... هو شاب بخلك شيبه

********

سيد احمد الميالي

تم بفضل الله تعالى وأم البنين


https://t.me/ahmed_sa6